"Eyni şablon cavabı təkrar göndərmək çıxış yolu deyil..."

"Kapital Bank / Birbank nümayəndələrindən məsələyə ciddi şəkildə baxmağı xahiş edirəm..." "DİA-AZ" xəbər verir ki, bunu özünün sosial şəbəkə hesabında Ceyhun Mollayev adlı istifadəçi yazaraq gileylənir.

Narazı vətəndaş daha sonra başına gələnləri belə nəql edir: "2014-cü ildən Kapital Bankın müştərisiyəm. Hazırda Birbank hesabıma daxil ola bilmirəm və təəssüf ki, dəfələrlə müraciət etməyimə baxmayaraq, problemim real şəkildə həll olunmur.

Birbank tətbiqinə daxil olarkən sistem məndən SİMA rəqəmsal imzası yaratmağı və biometrik identifikasiyadan keçməyi tələb edir. Lakin SİMA-da üz tanıma yoxlaması hər dəfə uğursuz nəticələnir.

Bunu dəfələrlə sınamışam. Müxtəlif məkanlarda, müxtəlif işıqlandırmada, telefonu düzgün və sabit tutaraq, üz tam şəkildə görünməklə bütün tələb olunan qaydalara əməl etmişəm. Buna baxmayaraq, yoxlama keçmir.

Üstəlik, məsələ yalnız Birbank daxilində deyil. Ayrıca SİMA tətbiqində də eyni biometrik yoxlamadan keçə bilmirəm.

Mənim şəxsiyyət sənədim DYİ (daimi yaşayış icazəsi) vəsiqəsidir və FİN kodum 5 simvoldan ibarətdir. Problemin bununla və ya sistemdəki biometrik məlumatlarla bağlı olub-olmadığını bilmirəm. Bunu müəyyən etmək artıq müştərinin yox, aidiyyəti texniki xidmətin işidir.

Eyni zamanda myGovID və ASAN Login məndə problemsiz işləyir.

Kapital Banka rəsmi müraciət etmişəm. Müraciət nömrəsi: #4446122.

Təəssüf ki, müraciətim ətraflı izah olunmasına baxmayaraq, mənə sadəcə standart cavab göndərilib: “üz kamerada aydın görünsün, telefonu düz saxlayın, işıqlı yerdə olun və s.”

Burada əsas problem odur ki, müştəriyə fərdi yanaşma yoxdur. Mən konkret texniki problemi izah edirəm, amma mənə ümumi şablon cavab verilir. Bu isə problemin araşdırılması və həlli deyil.

Məndə belə təəssürat yaranır ki, məsələni həll etmək əvəzinə sadəcə standart təlimat göndərməklə müraciət bağlanmağa çalışılır.

Bir məqamı da xüsusi vurğulamaq istəyirəm:

Birbank-a giriş məndə əvvəllər problemsiz işləyirdi. Yeni SİMA əsaslı giriş sistemini mən tətbiq etməmişəm — bunu bank tətbiq edib. Ona görə də yeni sistemin işləməməsinin nəticəsi müştərinin üzərinə qoyulmamalıdır.

Müştəri kimi mənim məsuliyyətim bütün tələb olunan identifikasiya addımlarını düzgün şəkildə yerinə yetirməkdir. Mən bunu edirəm. Əgər yeni tətbiq edilmiş sistem məni tanımırsa və hesabıma girişə imkan vermirsə, bu problemin alternativ həllini təqdim etmək bankın məsuliyyətidir.

Mən bankdan ümumi təlimat istəmirəm. Xahiş edirəm:

hesabım və identifikasiya məlumatlarım ayrıca yoxlanılsın, 5 simvollu FİN və DYİ sənədi ilə SİMA inteqrasiyasında problem olub-olmadığı araşdırılsın və SİMA identifikasiyası mümkün deyilsə, mənə Birbank hesabıma daxil olmaq üçün alternativ identifikasiya üsulu təqdim edilsin.

Hazırda xaricdəyəm və filiala fiziki şəkildə yaxınlaşmaq imkanım yoxdur. Lazım olan bütün sənədləri təqdim etməyə, videoidentifikasiyadan keçməyə və şəxsiyyətimi bankın tələb etdiyi təhlükəsiz üsulla təsdiq etməyə hazıram.

Amma eyni şablon cavabı təkrar göndərmək çıxış yolu deyil.

2014-cü ildən müştərisi olduğum bankdan gözləntim fərdi yanaşma, real texniki araşdırma və konkret həll yoludur.

Əgər qrupda Kapital Bank/Birbank nümayəndəsi varsa, müraciət #4446122 üzrə məsələyə baxılmasına kömək etməyinizi xahiş edirəm..."