ABŞ-ın birinci xanımı Melaniya Tramp artıq təkcə protokol fiquru deyil, həm də ölkənin xarici siyasətinə təsir göstərən mühüm simaya çevrilib.

Moderator.az xəbər verir ki, bu barədə "The Times" nəşri yazıb.

Diplomatik arenada yeni oyunçu

Nəşr qeyd edir ki, ikinci prezidentlik dönəmində o, daha fəal və müstəqil siyasi rol oynamağa qərar verib, bəzən hətta öz ərinə qarşı əks mövqe nümayiş etdirərək balans yaradır. Bu həftə Melaniya Tramp "Lotte New York Palace" otelində xüsusi təşəbbüsünü - texnologiyaların uşaqlara kömək məqsədilə istifadəsinə həsr olunmuş "ilk xanımlar klubu"nu təqdim edib.

Tədbirdə İordaniya kraliçası Raniya və Ukraynanın birinci xanımı Yelena Zelenskaya iştirak ediblər. Bu, Melaniya ilə Zelenskayanın ilk şəxsi görüşü olub. Donald Tramp BMT Baş Assambleyasında sərt çıxışlar edərkən, Melaniya sadəcə dörd dəqiqəlik nitqində ailə, uşaqlar və ümidli gələcəkdən danışıb.

Onun sözlərinə görə, şəhər işıqlarına baxarkən hər bir insan öz övladının sabahı barədə düşünür. Tədbirdən sonra isə qonaqlar çay süfrəsi və musiqi ilə əylənib. Melaniya digər ilk xanımlara yeni layihəsinə - süni intellekt və digər texnologiyaların uşaqların təhsili və onlayn təhlükəsizliyi üçün istifadəsinə qoşulmağı təklif edib. Bu təşəbbüs gələn il Ağ Evdə birgə iş formatında davam etdiriləcək.

Birinci dövrün kölgəsindən ikinci dövrün liderliyinə

İlk dəfə prezidentin xanımı olduğu illərdə Melaniya çox da ön planda görünməyib, hətta onu "istəksiz birinci xanım" adlandırıblar. Trampın qızı İvanka hətta "Birinci xanım ofisi"ni "Ailə ofisi" adlandırmağı təklif edib. İndi isə vəziyyət fərqlidir: Melaniya ərinə təsir göstərir, onun mövqelərini yumşaldır, bəzən Ukrayna məsələsində və ya Putinlə yazışmalarda söz sahibi olur. Hətta Ukraynada "agent Melaniya Trampenko adlı satirik memlər də yaranıb. Vladimir Zelenski Oval ofisə gəldikdə həyat yoldaşının məktubunu şəxsən Melaniyaya çatdırıb.

Yeni imic və daha çox təsir

ABŞ diplomatları hesab edir ki, bu dəfə Melaniya öz rolunda daha rahatdır. "Fox News"-a müsahibəsində o, ilk dövrdə özünü qəbul etdirə bilmədiyini, amma indi daha yaxşı anlaşıldığını bildirib. Bu dəfə onun konkret gündəliyi, komanda dəstəyi və hətta Vaşinqtonda daha çox iştirakı var. Oğlu Berron Tramp artıq Ağ Evə yaxın kampusda təhsil alır. Ətrafında yalnız sədaqətli müşavirlər toplayan Donald Tramp üçün həyat yoldaşının səsi bəlkə də ən müstəqil mövqedir. Melaniya açıq deyir: "Mənim öz fikirlərim var, həmişə ərimlə razılaşmıram və bu normaldır. Bəzən o məni dinləyir, bəzən yox".

Sakit gücün strategiyası

Melaniya Tramp özünü ərinin tam əksi kimi təqdim edir: o, sakitdir, Donald sərt; o, beynəlmiləlçidir, Donald millətçi; o, yumşaqdır, Donald isə təzyiq edən. Bu fərqli üslub onu Vaşinqtonda maraq obyekti edib. ABŞ-ın müttəfiqləri üçün isə artıq aydındır: Trampın ikinci prezidentlik dövründə Oval kabinetə gedən yol çox vaxt Şərq qanadından -birinci xanımın vasitəsilə keçir.