“ƏSLA BELƏ DEYİL”
Vəhdət Partiyasının sədri Tahir Kərimlinin APA-ya müsahibəsi.
- Vəhdət Partiyasının hazırkı durumu və fəaliyyəti sizi qane edirmi?
- Əlbəttə, partiyanın fəaliyyəti məni qane etmir. Burada obyektiv səbəblərlə yanaşı, subyektiv məqamlar da var. İlk növbədə partiyanın maddi-texniki baxımdan və qərargahla bağlı bir sıra problemləri yaranıb. Partiya keçmiş qərargahından çıxıb, yeni qərargahla isə tam təmin olunmayıb. Bu da partiyanın fəaliyyətinə mənfi təsir edir. Bu, həm də müxalifətdə təmsil olunmağımızla bağlı idi. Həmin illərdə siyasi prosesləri izləyənlər bilir ki, Vəhdət Partiyası yarandığı ilk illərdə təbliğat işini yaxşı qurmuşdu. İndi isə mətbuatla təmaslarımız zəifləyib. Bu cəhətdən də zəifləmiş durumdayıq. Elə vəziyyət yaranıb ki, partiya cəmiyyətin inkişafı ilə ayaqlaşa bilmir. Aydın məsələdir ki, bizim cəmiyyətdə kapitalın rolu artır. Ona görə də müəyyən məsələləri arzu etdiyimiz səviyyədə qura bilmirik. Ancaq yenə də fəaliyyət göstəririk və partiya dövlət başçısı İlham Əliyevin siyasi kursunu müdafiə edir.
- Vəhdət Partiyası siyasi kursunda dəyişiklik etdi və iqtidarı dəstəkləməyə qərar verdi. Keçən bu müddətdə nə dəyişdi?
- İlk növbədə onu deyim ki, Vəhdət Partiyası müxalifətdən gedəndə bunu açıq şəkildə bəyan etdi. Bunu deyən zaman zərbələrlə və ittihamlarla qarşılaşacağımızı bilirdik. Bu gün də bir çoxları özlərini müxalifət kimi təqdim edirlər və bununla da müxalifət pərdəsi altında gizlənirlər. Biz isə ikiüzlü siyasət apara bilməzdik. Müxalifətdə olan zaman bu siyasi xəttə və əqidəyə sadiq olmuşuq. İstərdim bir də bu məsələyə qayıdaq. Həmişə deyirdim ki, bizdə müxalifətçilik düz qurulmayıb, ona görə də xalqdan üzr istəməliyik ki, millət bizə inansın. Bu nə demək idi? Hər şeydən əvvəl müxalifətçiliyin bünövrəsi və fəlsəfəsi düzgün qurulmayıb. Bugünkü müxalifət liderləri Heydər Əliyevi dost kimi hakimiyyətə dəvət etdilər, amma bizdən tələb olundu ki, ona düşmən münasibət bəsləyək. Bu, yalançı müxalifətçilik idi və heç vaxt bu xətlə qalib gəlmək mümkün deyildi. Belə də oldu. Tarix göstərir ki, müxalifət qalib gələ bilmir. Ən ağrılı məqam isə müxalifət liderlərinin əqidə nümayiş etdirməməsidir. Onlar həmişə öz mənafelərindən çıxış etdilər. Rəsul Quliyevlə müqaviləni şişirdib, bizə sıradan biri kimi baxırdılar. Axı sirr deyil ki, Vəhdət Partiyasının minlərlə üzvü birgə keçirdiyimiz mitinqlərdə meydanları doldururdu. Bir-bir sadalamaq istəmirəm. Mən onlarla əqidə qardaşlığından çıxdım. Səmimi şəkildə deyirəm. Müxalifət liderləri əqidəni yalnız əldə bayraq ediblər. Bunun arxasında mənafe durur. Nə üçün mən bəziləri kimi gündüz müxalifət gecə iqtidar olmalıydım? Belə olmaqdansa kişi kimi deyərəm ki, mən iqtidarı dəstəkləyirəm. Ona görə də açıq şəkildə prezidenti müdafiə etmək barədə qərar qəbul etdik.
- Müxalifət birlik istiqamətində müəyyən addımlar atır. Məsələn İctimai Palata yaradılıb. Bu qurumun fəaliyyətini necə dəyərləndirirsiniz?
- Mən bir az əvvəl müxalifətçiliyin bünövrəsi ilə bağlı fikir deyərkən bunu elə-belə söyləmədim. İctimai Palata başqa məqsəd üçün yaradılmışdı. Lakin bəziləri “Ərəb baharı”ndan ilham alaraq bu ictimai qurumu müxalifət təşkilatlarının birliyinə çevirmək istədi. Burada da bütün müxalifəti birləşdirə bilmədiklərindən, güc nümayiş etdirə bilmirlər. Əvvəlki dövrlərdə xalqı öz arxaları ilə aparıb o qədər məğlub ediblər ki, bu dəfə cəmiyyət mitinqlərdən çəkindi. Aksiyalara qatılan gənclər isə müxalifət liderlərini tanımayanlardır. Hətta xalqı ruhlandırmaq məqsədilə xarici ölkə səfirlikləri ilə də onların görüşləri keçirildi. Yenə nəticə olmadı. Hər şeyi xarici ölkələrin köməyinə bağlayırlar. İctimai Palata güc adından imitasiya edir.
- Həm müxalifət, həm də iqtidarla münasibəti olan partiya sədri kimi müxalifət-iqtidar dialoqunun baş tutması təşəbbüsü ilə çıxış edə bilərsinizmi?
- İndiki vəziyyətdə yox. Çünki Azərbaycan müxalifəti iqtidarı barışığa çəkə biləcək gücdə deyil. Bu dialoq yalnız iqtidar razı olduqda baş tuta bilər.
- Müxalifətçi olmaq asandır, yoxsa iqtidar təəssübkeşi?
- Mənim üçün müxalifət düşərgəsində təmsil olunmaq daha asan idi. Bu, səmimi sözümdür. Döyülməkdən və mübarizədən çəkinməmişəm. Bir də ki, müxalifətdə fikirlərini sərbəst deyə bilərsən. Amma prezidenti müdafiə edən şəxsin fəaliyyətində bir qədər korrektələr olmalıdır. Kənardan baxanlar deyir ki, Tahir Kərimli iqtidarı dəstəkləyir, yəqin problemləri olmaz. Əsla belə deyil.
- İqtidarı dəstəkləyən partiyalarla ikitərəfli əməkdaşlığınız nə səviyyədədir?
- Rəsmi sazişlər olmasa da, ikitərəfli əlaqələrimiz mövcuddur. Ancaq Yeni Azərbaycan Partiyası iqtidarı, prezidenti dəstəkləyən partiyaların bir qurumda təmsilçiliyi haqda düşünməlidir. Bu birliyin yaradılması və gücünün artırılması üçün Yeni Azərbaycan Partiyası addım atmalı, yəni koordinator rolunu oynamalıdır. Yoxsa, bizim təşəbbüslərimiz havadan asılı vəziyyətdə qalacaq.
