Azərbaycan Prezidentinin “Avropa Siyasi Birliyi”nin 6-cı Zirvə toplantısında iştirakı, ölkənin Avropa məkanında artan siyasi çəkisinin və etibarlı tərəfdaş imicinin növbəti təzahürüdür. Bir zamanlar Avropa İttifaqı ilə münasibətlərdə müşahidə olunan soyuqluq və müəyyən qüvvələrin Azərbaycana qarşı ədalətsiz yanaşmaları artıq arxada qalıb. Bu dəyişiklik, ilk növbədə, rəsmi Bakının prinsipial və ardıcıl mövqeyi, Prezident İlham Əliyevin qətiyyətli siyasəti sayəsində mümkün olub. Bu gün Aİ də regionda reallıqları qəbul edərək Azərbaycanın Cənubi Qafqaz, Mərkəzi Asiya və Yaxın Şərqdə strateji mövqeyini anlayır və onunla əməkdaşlığa üstünlük verir. Azərbaycan bir tərəfdən Çinlə hərtərəfli strateji tərəfdaşlıq quraraq Mərkəzi Asiya və Yaxın Şərq ölkələri ilə əlaqələrini gücləndirir, digər tərəfdən isə Aİ ilə münasibətlərini qarşılıqlı maraqlara əsaslanan platformada inkişaf etdirir. Bütün bu amillər Azərbaycanın geosiyasi əhəmiyyətini, orta güc aktoru kimi qəbul edilməsini və beynəlxalq arenada etibarlı tərəfdaş statusunu bir daha təsdiqləyir.
Politoloq Zeynal Əmrəliyev Sherg.az-a bildirib ki, Prezident İlham Əliyevin “Avropa Siyasi Birliyi” 6-ci Zirvə toplantısında iştirakı Azərbaycan diplomatiyasının böyük uğuru kimi təqdim olunmalıdır:
“Çünki dövlət başçısının keçirdiyi çoxtərəfli və ikitərəfli görüşlərdə Azərbaycanın milli maraqlarının müdafiəsi və ölkəmizin qalibiyyətinin daha da möhkəmləndirməsi istiqamətində adımlar atıldı. Şübhəsiz ki, toplantılar içərisində ən çox diqqət çəkəni Cənab Prezidentin Ermənistanın Baş naziri Nikol Paşinyanla keçirdiyi ikitərəfli görüş oldu. Həmin görüş zamanı yayılmış fotoşəkillər və söylənilən fikirlər deməyə əsas verir ki, artıq Ermənistan tərəfi faktiki olaraq Azərbaycanın gücünü qəbullanıb. Eynilə Fransa Prezidenti Emmanuel Makronun İlham Əliyevlə görüşmək üçün göstərdiyi səylər onların rəsmi Parisin sərgilədiyi hərəkətlərin nəticəsiz olduğunu başa düşdüklərini göstərir. İlham Əliyevin çox yüksək səviyyədə qarşılanması, tədbir çərçivəsində ona göstərilən maraq dövlət paşçısının şəxsi nüfuzunun və Azərbaycan dövlətinin gücünün kifayət qədər yüksəkdə olduğunun bariz nümunəsidir. Eyni zamanda İlham Əliyevin Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas ilə görüşü və səmimi görüntüləri Azərbaycan-Avropa münasibətlərinin yeni mərhələyə qədər qoyduğunu göstərir. Kaya Kallasın sələfi Cozef Borelin dövründə Azərbaycan-Avropa Birliyinin münasibətləri kifayət qədər gərgin idi. Ancaq indiki zamanda bunun inkişafı üçün müsbət şərait var. Düşünürəm ki, bu məsələdən Avropa Birliyinin rəhbərliyi də istifadə edəcək və əvvəlki rəhbərliyin səhvlərini təkrarlamayacaqlar”.
