Azərbaycanın Qarabağ üzərində suverenliyini tam bərpa etməsindən sonra mübarizə yalnız hərbi və diplomatik müstəvidə deyil, həm də beynəlxalq ictimai rəyin formalaşdırıldığı intellektual platformalarda davam edir. Bu platformalarda bəzən humanitar ritorika ilə təqdim olunan bəzi şəxslər və strukturların fəaliyyətinə dair ciddi hüquqi, maliyyə və təhlükəsizlik sualları arxa plana keçirilir. Halbuki davamlı sülhün əsas şərti emosional simpatiyalar deyil, hüququn aliliyi və məsuliyyət prinsipinin hamıya eyni şəkildə tətbiq olunmasıdır.

Ergün Kırlıkovalının Nassim Nikolas Talebə ünvanladığı məlum açıq məktub da məhz bu prinsipdən çıxış edərək Ruben Vardanyan ətrafında formalaşdırılan beynəlxalq narrativləri yenidən müzakirəyə çıxarır.

• Bu addım əslində nəyə xidmət edir?

Milli Məclisin deputatı Hikmət Babaoğlu Bizimyol.info xəbər portalına açıqlamasında bildirib ki, biz olduqca maraqlı bir hadisədən danışırıq. Doğrudan da ilk növbədə Azərbaycanın lehinə görünən bu yazışmanın, bu dialoqun hansı məqsədə xidmət etdiyini və onun alt məntiqində nə gizləndiyini araşdırarkən qəribə bir reallıqla üzləşirik: “Hər şeydən əvvəl hansısa amerikalı professorun Azərbaycana gəlib mühazirə oxumaması nə cəmiyyətin yaddaşında xüsusi yer tutur, nə də geniş ictimai maraq doğurur. Belə olan halda birdən-birə Ergün Kırlıkovalının buna cavab vermək, hadisəni şərh etmək istəyi ortaya çıxır və o, öz güclü mühəndislik fəaliyyətini bir kənara qoyaraq Vardanyanın xeyriyyəçilik və ya qeyri-xeyriyyəçilik fəaliyyətini araşdırmağa başlayır. Bu həm gülməli, həm də ağlamalı bir tragikomediyadır”.

Onun sözlərinə görə, süni şəkildə bir dialoq yaradılır və nəticədə “Vardanyan kimdir?” məsələsi əsas müzakirə mövzusuna çevrilir. Qarabağ probleminin niyə başladığı, erməni separatizminin mahiyyəti isə arxa plana keçir.

Deputat vurğulayıb ki, birdən-birə hər şeyi kölgədə qoyan əsas sual “Ruben Vardanyan gerçək xeyriyyəçidir, yoxsa deyil?” kimi təqdim olunur və sanki 30 illik problemin əsas ölçü vahidi kimi müəyyənləşdirilir.

Deputatın fikrincə, bu, ictimai şüuru manipulyasiya etmək cəhdindən başqa bir şey deyil.

Hikmət Babaoğlu bildirib ki, sosial şəbəkələrdə baş verənləri diqqətlə izləyir və burada da eyni metoddan istifadə olunduğunu görür: “Cəmiyyəti öz dəyərlərinə qarşı qoymağa çalışırlar”.

Deputat misal olaraq Şah İsmayıl Xətai ilə bağlı mübahisələri göstərib və bildirib ki, XVI əsrdə baş vermiş hadisələr müzakirə olunduğu halda, 2025-ci il dekabrın 28-də İran hakimiyyətinin özünün 3500 vətəndaşını öldürdüyünü etiraf etməsi yada salınmır. O vurğulayıb ki, bu gün müzakirə olunmalı aktual məsələ məhz İran rejiminin öz vətəndaşlarına qarşı həyata keçirdiyi zorakılıqdır.

Deputatın sözlərinə görə, kütləvi manipulyasiyanın yeni metodlarından biri də məhz budur və təəssüf ki, bizim ictimai auditoriyada da bu tələyə düşənlər olur.

“Sosial şəbəkələrdə bəzi yüksək ranqlı ictimai xadimlərin və özünü intellektual hesab edən vətəndaşlarımızın əsas müzakirə mövzusu artıq Güney Azərbaycan və Quzey Azərbaycan qarşıdurmasına çevrilib. Halbuki əsas məsələ fars imperializmi ilə Azərbaycan arasındakı qarşıdurma olmalıdır və Azərbaycan bütöv şəkildə fars şovinizminə qarşı dayanmalıdır.

İndi isə cənublu-quzeyli qarşıdurmasına sürüklənirik, özümüz özümüzlə savaşırıq və fars manipulyatorları bunu məharətlə bizim cəmiyyətə transfer edə biliblər”-deyə o bildirib.

Deputat hesab edir ki, Kırlıkovalının Vardanyan haqqında yazışması da məhz bu sxemi xatırladır.

Hikmət Babaoğlu vurğulayıb ki, informasiya müharibəsində ayıq-sayıqlığımızı itirməməliyik. Onun fikrincə, əks təqdirdə elə bir kütləvi ictimai rəy formalaşa bilər ki, bu rəy həm dövlət maraqlarımızın, həm də tarixi Zəfərimizin əleyhinə işləyər.

“Belə yazışmaların və yanaşmaların əsas məqsədi də məhz bundan ibarətdir” - deyə deputat əlavə edib.