"Məmləkətdə çox ciddi daxili iqtisadi, sosial gərginlik var – hamı, ya da, əksəriyyət narazıdır, gələcəklə bağlı ümidlər azalır, gənclər ölkədən köçmək istəyir, iş adamları qan ağlayır, qiymətlər artır, real gəlirlər inflyasiyaya üstün gələ bilmir, vergi-rüsum-cərimə-icazə-lisenziya burulğanı iqtisadi aktivliyi azaldır. Bu narazılıq yaxşı bir şey deyil, vətəndaşı rahatlatmaq lazımdır..." "DİA-AZ" xəbər verir ki, bunu özünün sosial şəbəkə hesabında ReAL Partiyasının sədri Natiq Cəfərli qeyd edib.

O daha sonra fikrini belə davam etdirir: "Hökumət olaraq cəmi 5 addım atsalar, ölkədə vəziyyət xeyli yaxşılaşar – təbii ki, şəxsən mən daha fundamental islahatların tərəfdarıyam, Konstitusiya dəyişikliyi ilə bütün sistemin ayarlarının müasir tələblərə, qalib ölkə və vətəndaş gözləntilərinə cavab verməsini istəyirəm. Amma, hələ ki, bu islahatlar üfiqdə görünmür deyə, 5 addımla rahatlıq planını qəbul etmək olar:

1) Quru səhədlərin açılması, sərhədyanı ticarətin canlandırılması,

2) Kiçik-orta sahibkarlar üçün ƏDV-yə düşməyən dövriyyənin 1 milyon manata qaldırılması, Bakı və Abşeronda dövriyyədən cəmi 4%, regionlarda isə 2%-lik vergi sisteminin tədbiqi, digər bütün ödənişlədin (DSMF xaric) ləğv edilməsi və paralel olaraq Dövlət vəsaiti hesabına aqrar və isvestisiya bankının təsis edilməsi – fermerlərə və istehsalla, xidmətlə birbaşa məşğul olub əlavə dəyər və iş yerləri yaradan sahibkarlara simvolik olaraq 2%-lə kreditlərin verilməsi (kreditlər ancaq kiçik-orta sahibkarlığı əhatə etməlidir),

3) Müxtəlif proqramlarla ölkədə 500 minə yaxın uşaqlara müavinatlar verilir, onların birləşdirilərək böyük və pilləli proqramın qəbulu, ikinci uşaqdan başlayaraq hər bir övlad üçün 100 manat dövlət dəstəyinin qəbul edilməsi,

4) Aşırı tənzimləmə üçün nəzərdə tutulan bir çox dövlət-hökumət qurumlarının ləğvi, və ya, səlahiyyətlərinin kəskin azaldılması, onların məsləhətçi orqanlara çevrilməsi,

5) DSMF-də vətəndaşların yığım kapitalına çıxış imkanlarını (müxtəlif formalarda – bu məsələ ilə bağlı ayrıca qanunvericilik təşəbbüsü ilə çıxış edəcəyik) təmin etmək üçün qanunlara dəyişikliklərin edilməsi.

Bu addımları ilin sonuna qədər atsaq, məmləkətdə vətəndaş rahatlayar, gələcəyə ümidi artar, ölkəmizin iqtisadi daralma burulğanından çıxmasına yardımçı olar. Azərbaycanın bir nömrəli problemi iqtisadi aktivliyin zəifləməsi, daralmasıdır – qalan hər şey bundan doğan nəticədir. Səbəb dəyişməsə, nəticəni dəyişdirmək mümkün olmaz..."