Azərbaycanda abortların sayı kəskin artıb.
Son 15 ildə Azərbaycanda abort halları 30% artıb. Belə ki, ötən il Azərbaycanda 95 875 doğuş və 95,1 min abort qeydə alınıb.
Bununla da ölkədə hər 100 doğulan körpəyə 99 abort faktı düşür. Maraqlıdır ki, 2010-cu ildə 1 milyondan çox abortun qeydə alındığı Rusiyada 2025-ci ildə abort sayı 64% azalaraq 235 minə düşüb.
Ötən il Gürcüstanda 11 800 abort qeydə alınıb ki, bu da 26% azalma deməkdir. Ermənistanda abort statistikası da 18,7 min təşkil edib və 23% geriləyib. Qardaş Türkiyə də Azərbaycanda olduğu kimi abort halları son 15 ildə artıb.
Ötən il ölkədə 74 min abort həyata keçirilib və 2010-cu illə müqayisədə 80% yüksəlib. İran İslam Respublikası da abort trendinin artdığı ölkələr sırasındadır. İranda ötən il abort halları 61% artaraq 305,2 minə yüksəlib. Son vaxtlar ölkədə doğum sayının azalması ilə bağlı müzakirələr davam etsə də, hələ ki, yaxşıya doğru irəliləyiş müşahidə edilmir.
Ölkədə doğum sayının artmasını stimullaşdırmaq üçün müxtəlif təkliflər təqdim edilir. Həmin təkliflərdən biri olan “uşaq pulu”nun verilməsi reallaşarsa, doğum sayında artım ola bilərmi?
Məsələ ilə bağlı Ağ Partiyasının sədri Tural Abbaslı “Cebheinfo.az”-a bildirib ki, hamiləliyin yarımçıq saxlanılması ilə bağlı yayılan statistik rəqəmlər rəsmi məlumatlardır:
“Mən əminən ki, ən azı bu statistikanı ikiyə vura bilərik. Real nəticələr bundan iki dəfə çoxdur. Bir çox hallarda abort faktları qeydiyyata düşmür.
Azərbaycanda faktlar kifayət qədər çoxdur. Bunun isə yeganə səbəbi sosial problemlərdir. İnsanlar dünyaya gətirəcəkləri növbəti uşaqları saxlaya bilməyəcəklərindən qorxduqları üçün hamiləlikləri yarıda kəsirlər və dünyaya uşaq gətirmirlər.
Bu da dövlətin sosial, iqtisadi siyasətinin yalnış olduğunu göstərir. Biz təklif etmişdik ki, 1 yaşa qədər uşaqlara ayda 100 manat həcmində “uşaq pulu” verilsin.
Bu isə 2 milyard manat civarında vəsait idi və Azərbaycan büdcəsinə xüsusi yük deyil. Mərkəzi Bankın binası 650 milyon manata tikilir. Ancaq “uşaq pulu” verilsə, əhali artımının stimullaşacağını görmək olar”.
Partiya sədri digər stimullaşdırıcı addımları da istisna etməyib:
“Məsələn, 1-ci övlada görə birdəfəlik ödənişlər, 2-ci, 3-cü övlada görə ödəniş vermək, eləcə də çoxuşaqlı ailə anlayışını 5 uşaqdan 3 uşağa salmaq olar. Ümumiyyətlə, çoxuşaqlı ailələr üçün imtiyazların sayı artırılmalıdır.
Bizim təklifimizə görə, 4 və daha artıq uşaqları olan ailələrə dövlət pulsuz ev verməlidir. Məsələn, bir ailənin dörd uşağı varsa, onlara dördotaqlı, beş uşağı varsa, beşotaqlı ev verilməlidir.
Bundan başqa doğum xərclərini dövlət öz üzərinə götürməlidir. İlk 6 ayda uşaqların həm tibbi xərclərini, həm də qidalanma, geyim xərclərini dövlət ödəməlidir. Bütün dünyada bu addımlar atılır.
Çünki XXI əsr öz eqosuna yönəlik insan formalaşdırıb. Ona görə belə dünyaya uşaqların gətirilməsini stimullaşdırmaq üçün dövlət mütləq addımlar atmalıdır. Bu, insanların öz ümidinə buraxılsa, Azərbaycan kimi ölkələrdə geriləmə gedəcək.
Təəssüflə qeyd edim ki, artıq nazirlər belə, bunu qəbul edib. Məsələn, elm və təhsil nazirinə sual verirlər ki, məktəbdə uşaqlara niyə yer çatmır?
Deyib ki, 2030-cu ildə demoqrafik durum onsuz da geriləyir, uşaq sayı az olduğuna görə onsuz da bütün məktəblərdə uşaqlara yer olacaq. Görünən odur ki, Azərbaycanda uşaqların sayının artırılması maraqlı deyil”.
