Bir neçə gün əvvəl Bizimesr.com olaraq Sabirabad rayonunun Sərxanbəyli kəndində təxminən bir il əvvəl uçan körpünün hələ də bərpa edilməməsi ilə bağlı videogörüntü yaymışdıq.

Qeyd olunurdu ki, körpünün uçması nəticəsində 1 nəfər həyatını itirib. Buna baxmayaraq, hadisədən uzun müddət keçməsinə rəğmən körpünün yenidən tikilmədiyi bildirilir.

Videoda kənd sakinləri körpünün bərpa olunmaması səbəbindən kəndə giriş-çıxışın ciddi şəkildə çətinləşdiyini, alternativ piyada keçidinin isə qəzalı vəziyyətdə olduğunu qeyd edirlər. Onların sözlərinə görə, bu vəziyyət gündəlik hərəkəti və təhlükəsizliyi ciddi risk altında qoyur.

Videoda həmçinin iddia olunur ki, problemlə bağlı səsini çıxaran və ya aidiyyəti qurumlara müraciət edən şəxslər Sabirabad Rayon İcra Hakimiyyətinin başçısı tərəfindən təzyiqlərlə üzləşir. Sakinlər, həmçinin, şikayət üçün rayon icra hakimiyyətinə üz tutan vətəndaşların qəbul edilmədiyini və geri qaytarıldıqlarını iddia edirlər.

Məsələ ictimailəşdirildikdən sonra Sabirabad Rayon İcra Hakimiyyəti Bizimesr.com-a açıqlama göndərib.

İlk öncə açıqlamanı olduğu kimi təqdim edirik:

"Bildiririk ki, rayonunun Sarxanbəyli kəndi ərazisində Azərbaycan Dövlət Su Ehtiyatları Agentliyinin Salyan “Aşağı Muğan” Meliorativ Sistemləri İstismarı İdarəsinin balansında olan 2-ci Küryanı magistral kollektorunun üzərində olan 25-30 metr uzunluğunda, 6 metr enində olan, 4 aşırımlı qəzalı körpünün 1 aşırımı uçmuşdur. Sabirabad Rayon İcra Hakimiyyəti tərəfindən körpünün qəzalı vəziyyətdə olması barədə bir neçə dəfə aidiyyatı qurumlar qarşısında məsələ qaldırılmışdır. Həmin körpü Sarxanbəyli kəndinin Şirvan-Noxudlu-Salyan magistral avtomobil yoluna çıxan yolun üzərində yerləşir. Körpüdən əsasən Moranlı, Sarxanbəyli və Bala Həşimxanlı kənd sakinləri əkin sahələrinə, Salyan rayonuna, eləcə də Aqroparklar istiqamətində gedərkən istifadə edirlər. Uçan körpüdən 6 km məsafədə qonşu Bala Həşimxanlı kəndi ərazisində alternativ yol mövcuddur."

Bu açıqlama isə yeni suallar doğurur.

Əgər Sabirabad Rayon İcra Hakimiyyəti etiraf edirsə ki, körpünün qəzalı vəziyyəti ilə bağlı dəfələrlə aidiyyəti qurumlara müraciət edib, bəs bir il ərzində problemin həlli üçün hansı konkret nəticə əldə olunub? Rayonda dövlət hakimiyyətini təmsil edən qurumun işi yalnız məktub yazmaqdan ibarətdirmi?

Açıqlamanın ən diqqətçəkən hissəsi isə "alternativ yol mövcuddur" ifadəsidir. Bir körpünün uçması nəticəsində insan həyatını itirdiyi, kənd sakinlərinin gündəlik hərəkətinin çətinləşdiyi şəraitdə 6 kilometr aralıdakı başqa bir yolu alternativ kimi təqdim etmək problemin həlli deyil. Bu, sadəcə mövcud vəziyyətlə barışmağa çağırış təsiri bağışlayır.

İcra hakimiyyəti açıqlamasında nə körpünün nə vaxt bərpa ediləcəyinə dair tarix göstərilir, nə məsul qurumların hansı işləri gördüyü izah olunur, nə də sakinlərin narahatlığını aradan qaldıracaq konkret plan açıqlanır. Əvəzində yalnız texniki məlumatlar və məsuliyyətin başqa qurumun balansında olması barədə izahat təqdim edilir.

Belə çıxır ki, Sabirabad Rayon İcra Hakimiyyəti hesab edir ki, insanlar vəziyyətə uyğunlaşmalı, kənd sakinləri isə illərlə təhlükəli və çətin yollarla hərəkət etməyə məcbur qalmalıdır.

Rayon rəhbərliyindən gözlənilən isə məsuliyyəti müxtəlif qurumlar arasında bölüşdürmək deyil, problemin operativ həllinə nail olmaq, nəticə əldə etmək və sakinlər qarşısında hesabat verməkdir. Çünki dövlət idarəçiliyinin əsas meyarı yazılan məktubların sayı yox, həll olunan problemlərin sayıdır.

Əgər bir il ərzində insan həyatına təhlükə yaradan körpü bərpa olunmayıbsa və cavab olaraq yalnız "alternativ yol var" deyilir, bu, təbii olaraq rayon sakinlərində idarəetmənin effektivliyi ilə bağlı ciddi suallar yaradır.