“Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti” publik hüquqi şəxsi Xankəndi şəhəri, Ağdərə və Xocalı rayonunda yaşayış məntəqələri, məhəllə, küçə, meydan və parkların abadlaşdırılması, yaşıllaşdırılması, yaşıllıqların mühafizəsi və təmizlənməsi xidmətləri üzrə bir mənbədən satınalma metodu tətbiq etməklə “MİNT SERVİCES” Məhdud Məsuliyyətli Cəmiyyəti ilə 1.489.348,8 manat dəyərində müqavilə bağlamışdır. Məlumat satınalmaların portalında 21.07.2026-cı ildə dərc edilmişdir.
Qeyd edək ki, bu Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti ilə “MİNT SERVİCES” MMC arasında bağlanan ilk satınalma müqaviləsi deyil. Tərəflər arasında son illər bir neçə müqavilə bağlanılmışdır.
Xankəndi şəhərinin və Xocalı rayonunun həyətyanı sahə, prospekt, küçə, park və meydançaların təmizlənməsi, işıqlandırılması, həmçinin yaşıllıq sahələrinə qulluq xidmətlərinin satın alınması üzrə 2.165.351,02 manat dəyərində müqavilə 16.01.2026-cı ildə bağlanılıb. .
Xankəndi şəhərinin, Ağdərə və Xocalı rayonlarının baxımı, həyətyanı sahə, prospekt, küçə, park və meydançaların təmizlənməsi, işıqlandırılması, həmçinin yaşıllıq sahələrinin salınması və qulluq üzrə 2.989.889,29 manat dəyərində müqavilə 01.04.2025-ci ildə bağlanılib.
Xankəndi şəhərinin, Ağdərə və Xocalı rayonlarının baxımı, həyətyanı sahə, prospekt, küçə, park və meydançaların təmizlənməsi, işıqlandırılması, həmçinin yaşıllıq sahələrinin salınması və qulluq üzrə 932.169,6 manat dəyərində müqavilə 16.12.2024-cü ildə bağlanılıb.
Xankəndi şəhərində, Ağdərə və Xocalı rayonlarında prospekt, küçə, meydan və binaların həyətinin süpürülməsi, işıqlandırılması, yaşıllıq sahələrin salınması və qulluq edilməsi xidmətlərinin satınalınmasıı üzrə 677.944,02 manat dəyərində müqavilə 19.08.2024-cü ildə bağlanılıb.
Göründüyü kimi Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti 2024-cü ilin avqustundan bu yana, yəni iki il ərzində bir mənbədən satınalma metodu tətbiq etməklə “MİNT SERVİCES” MMC ilə ümumi dəyəri 8 254 701 manat olan 5 satınalma müqaviləsi bağlamışdır.
Qeyd edək ki, Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti göstərilən müqavilələri ərazidə prospekt, küçə, meydan və binaların həyətinin süpürülməsi, işıqlandırılması, yaşıllıq sahələrin salınması və qulluq edilməsi xidmətləri üzrə bağlayıb. Maraqlıdır, “MİNT SERVİCES” MMC -nin bu sifarişləri yerinə yetirmək üçün maddi texniki bazası varmı?
Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “MİNT SERVİCES” (VÖEN: 1702104551) Məhdud Məsuliyyətli Cəmiyyətinin 27.02.2017-ci il tarixdə Milli Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının BAKI ŞƏHƏRİ, YASAMAL RAYONU, CƏFƏR CABBARLI, ev.609, GLOBUS CENTER, 7-Cİ MƏRTƏBƏ, qanuni təmsilçisi kimi isə Hümmətov Aqil Habil oğlu qeyd olunub. MMC-ni müxtəlif vaxtlarda İsmayılova Gülər Füzuli qızı da təmsil edib.
MMC barədə rəsmi məlumatlar ancaq bu qədərdir.Açıq mənbələrdə “Mint Services” MMC haqqında heç bir məlumat yoxdur. Son iki ildə milyonlarla manat dəyərində tenderlər udan şirkətin nə rəsmi internet səhifəsi, nə də əlaqə telefonlarına rast gəlinir. Amma internetdə müxtəlif platformalarda təmizlik işinə dair vəzifələrə vakansiya elanlarının verildiyini aşkar etdik.
