Bəlli olduğu kimi, Naxçıvan Hərbi Məhkəməsində Naxçıvan Muxtar Respublikasının (MR) həbsdə olan sabiq milli təhlükəsizlik naziri Vəli Ələsgərov 14 il müddətinə azadlıqdan məhrum edilib.
“Hürriyyət”in oxucularına artıq məlumdur ki, V.Ələsgərov Naxçıvan MR-in milli təhlükəsizlik naziri vəzifəsində çalışdığı 15 il ərzində çoxsaylı cinayətlərə yol verib. Belə ki, ötən saylarımızda Naxçıvan MR Babək rayonunun Qahab kənd sakini, II qrup əlil, müharibə veteranı, təqaüddə olan müəllim Əliyev Novruz Səfər oğlunun və Naxçıvan şəhərində anadan olan, hazırda şəhərin Təbriz küçəsi ev 1, mənzil 55-də yaşayan, 10 il Ağdamda döyüş bölgəsində kəşfiyyatçı kimi fəaliyyət göstərən və bir çox əməliyyatlarda iştirak edən Ağasiyev Nizami Rəsul oğlunun redaksiyamıza müracəti ilə oxucularımızı tanış etmişdik. Qeyd etmişdik ki, Naxçıvan MR-in keçmiş milli təhlükəsizlik naziri Vəli Ələsgərov şikayətçilər Novruz Əliyev və Nizami Ağasiyevi həbs etdirərək, onlara dəhşətli işgəncələr verdirib.
Bu arada isə “Hürriyyət”in əməkdaşı özəl mənbələrdən Vəli Ələsgərovun maliyyə maxinasiyaları ilə bağlı şok faktlar əldə edib. Məlumata əsasən, Naxçıvan MR Maliyyə Nazirliyinin apardığı yoxlama zamanı V.Ələsgərovun törətdiyi cinayət əməlini təsdiq edən çoxsaylı sübutlar aşkara çıxarılıb. Hansı ki, təqsirləndirilən şəxs Vəli Ələsgərov tərfindən külli miqdarda dövlət əmlakının mənimsənilməsi faktı istintaq müddətində dindirilən şahidlərin ifadələri və digər sənədlərlə də tam sübut edilib.
(Əvvəli ötən sayımızda)
MTN rəisinin qəzəbinə gələn sahibkar
Keçmiş nazirin cinayət əmllərinin qurbanlarından biri də fərdi sahibkar Muxtarov Tağı Mübariz oğludur. O, 2007-ci il tarixdən Naxçıvan şəhəri Atatürk küçəsi 8 ünvanında yerləşən “Gold Computers” adlı mağaza işlədib. Həmin mağazada müxtəlif markalı mobil telefon, kompüter və onların aksessuarlarının satışı ilə məşğul olub. Qeyd edək ki, T.Muxtarov hazırda həmin obyekti işlətmir, Heydər Əliyev prospekti 26 ünvanında “Alo Naxçıvan” adlı mağazada işləyir və yenə də mobil telefon, kompüter və onların aksessuarlarının satışı ilə məşğul olur.
Mənbə deyir ki, o, 2014-cü il tarixdə “Gold Computers” mağazasını işlədərkən Naxçıvan Milli Təhlükəsizlik Nazirliyinin iki nəfər əməkdaşı mağazaya gəlib. Onlardan birini əvvəllər müştərisi olduğu üçün tanıyıb, digərini isə tanımayıb. MTN əməkdaşları ona “rəisimiz Elnur Quliyev deyir ki, mağazada olan telefonları və Tağını götürüb MTN-ə yanıma gətirin” – deyiblər. T.Muxtarov onlardan bunun səbəbini soruşduqda, heç bir cavab verməyiblər və “gedək orda öyrənərsən” deyiblər.
“Sən qaçaqmalçılıqla məşğul olursan...”
MTN əməkdaşları 3200 manat dəyərində 9 ədəd müxtəlif markalı mobil telefonu və bir ədəd də 1200 manat dəyərində “Toshiba İ-7” markalı kompüteri götürərək, onunla birlikdə MTN-ə - Elnur Quliyevin yanına gediblər. Tağı Muxtarovun dediyinə görə, Elnur Quliyevi də əvvəldən tanıyıb. Belə ki, bu hadisədən bir müddət öncə onun restoranlarına ratsiya sistemi qoşub.
Elnur Quliyev ona “sən qaçaqmalçılıqla məşğul olursan, bu telefonları qaçaq yolla gətirmisən” deyib. O, rəisə satdığı telefonların və digər malların heç birini özü gedib gətirmədiyini, onları Naxçıvanda Faiq adlı şəxsdən aldığını bildirib. Hətta onu da deyib ki, deyilən tarixdə ölkədən kənara çıxmadığını təsdiq etmək üçün pasportuna da baxa bilərlər.
Bundan sonra Elnur Quliyev mobil telefonları və kompüteri götürüb otaqdan çıxıb. O, 15-20 dəqiqə sonra geri qayıtsa da, mobil telefonları və komputeri özü ilə geri gətirməyib. Daha sonra onun izahatını alan E.Quliyev “bir də belə işlərlə məşğul olma” deyərək, T.Muxtarovu MTN-dən evə buraxıb.
Sahibkar bu hadisədən bir müddət sonra Elnur Quliyevə zəng edərək, telefonlarını və komputerini nə üçün qaytarmadıqlarını soruşub. O isə, həmin telefonların və kompüterin MTN tərəfindən müsadirə edildiyini vurğulayıb.
Məlumat üçün bildirək ki, MTN-nin qanunsuz olaraq müsadirə etdiyi telefon markaları bunlardan ibarət olub - 2 ədəd hər biri 420 manat dəyərində “Samsung”, 3 ədəd hər biri 300 manat dəyərində “Nokia”, 2 ədəd hər biri 450 manat dəyərində “Sony Xperiya” və 2 ədəd hər biri 280 manat dəyərində “Black Berri”.
Vəli Ələsgərov zərgəri nə üçün həbs etdirib?
Vəli Ələsgərovun MTN-ə rəhbərlik etdiyi dövrdə nazirin qanunsuz əməllərinin qurbanı olanlardan biri də Niftiyev Azər Həsən oğludur. Onun sözlərinə görə, 2006-cı ildə Naxçıvan MR MTN-nin bir nəfər əməkdaşı işlədiyi Atatürk prospektində yerləşən zərgərlik sexinə gələrək, onu özü ilə MTN-ə getməyə dəvət edib. Onlar birlikdə Vəli Ələsgərovun xidməti otağına gediblər. Orada Vəli Əlsəgərov ona “sən işlədiyin sexdə saxta üzük düzəltməklə məşğul olmusan” deyib. A.Niftiyev nazirdən nə zaman belə bir fəaliyyətlə məşğul olduğunu soruşub. Nazir Vəli Ələsgərov ona bir ədəd kişi üzüyü göstərib. Zərgər həmin üzüyə baxaraq, həqiqətən də öz əl işi olduğunu görüb və bunun nəyinin saxta olduğunu soruşub. Nazir üzüyün üzərinə həkk olunmuş oraq və çəkici əks etdirən möhürü göstərib, bu probanı vurmağın qəti qadağan olduğunu deyib.
Bundan sonra Azər Niftiyevi axşama kimi MTN-də saxlayıblar. Axşam onu MTN-ə dəvət edən qurumun əməkdaşı onun izahatını aldıb və birlikdə mağazaya gəliblər. MTN əməkdaşı orada olan nə qədər qızıl sifarişləri olubsa, hamısını yığıb özü ilə aparıb. Lakin istər mağzada axtarış aparılan zaman, istərsə də oradakı əşyaları apardıqda ona heç bir sənəd təqdim etməyib. Çıxanda isə ona “heç yerə getmə, otur evində, səni çağıracağam” deyib.
Nazir 18 min manat rüşvət istəyib...
Azər Niftiyevin sözlərinə görə, bu hadisənin səhərisi günü onu təkrar MTN-ə çağırıblar. Orada bir gün əvvəl qızılları özü ilə gətirən MTN əməkdaşının xidməti otağına gedib. MTN əməkdaşı ona bildirib ki, nazir Vəli Ələsgərovun göstərişi əsasında 18 min manat pul verməlidir. Qurumun rəsmisi əlavə edib ki, “Vəli Ələsgərov deyir ki, 18 ildir işləyir, çox istəmirəm, hər ilinə min manat versin”. Sonra isə ona hədə-qorxu gələrək, “pulu verməsən, səni həbs edəcəyik” deyib.
Bu görüşdən sonra zərgər A.Niftiyev ondan tələb edilən 18 min manat pulu Mərkəzi Poçtun yanında sözügedən MTN əməkdaşına verməyə məcbur olub.
Həmin vəsaiti ödədikdən bir gün sonra onu təkrar MTN-ə çağırıblar və qurumun tanımadığı əməkdaşı tərəfindən qızıllar ona qaytarılıb. Lakin həmin qızıllardan 3 dənə əl işi – bir təkqaş brilyant sırğa, 1 ədəd nişan, 1 ədəd də “fantaziya” üzüyü kəsir gəlib. Bu haqda MTN əməkdaşına bildirsə də, onda olan əşyaların bunlardan ibarət olduğu bildirilib. Odur ki, dediyinə görə, zərgər həmin qızıllara görə sahiblərinə toplam 1600 manat pul ödəmək məcburiyyətində qalıb.
“Səni, oğlunun qızla görüşməsi ilə bağlı çəkilmiş kassetə görə çağırmışıq...”
Yaxınları deyir ki, bu hadisədən sonra Azər Niftiyev ürəktutmasından xəstələnərək yatağa düşüb. Hadisənin üzərindən bir neçə il keçdikdən sonra - 2013-cü ildə Türkiyə Cümhuriyyətindən müalicədən qayıtdığı günün səhərisi tanımadığı 2 nəfər şəxs işlətdiyi mağazaya gələrək, ona “bizimlə MTN-nin Babək rayon şöbəsinə gedəcəksən”, deyiblər.
Səbəbini soruşanda isə, “bilmirik, gedək orda səbəbi aydına olar” deyə cavab veriblər. Bundan sonra onlar MTN-nin Babək rayon şöbəsinə gediblər. Bu zaman şöbədə ona bildirilib ki, oğlu azyaşlı qızla cinsi əlaqədə olduğu üçün çağırılıb. “Səni, oğlunun qızla görüşməsi ilə bağlı çəkilmiş kassetə görə çağırmışıq, oğlunu həbs edəcəyik” deyiblər. Sonra isə ona oğlunun azyaşlı qızla cinsi əlaqədə olması barədə videoçəkiliş göstərilib. A.Niftiyev bu çəkilişə baxdıqda oğlunun həqiqətən də ona məxsus mağazada qızla əlaqədə olduğunu görüb.
“Nazir deyir ki, 50 min manat pul versə, onu və oğlunu bağışlayacaq”
Bundan sonra MTN-nin Babək rayon şöbəsində ona “nazir Vəli Əlsəgərov deyir ki, 50 min manat pul versə, onu və oğlunu bağışlayacam, yox əgər verməsə cinayət işi başlayıb oğlunu tutacağam” deyilib. A.Niftiyev isə xərçəng xəstəsi olduğunu, müalicə üçün onsuz da çoxlu pula ehtiyacı olduğunu bildirib. Şöbədə bu haqda nazir Vəli Ələsgərova məlumat veriləcəyi və pulu nazirin istədiyi bildirilib.
Bu görüşdən qaytıqdan dərhal sonra A.Niftiyev maklerlərə təcili pul lazım oldğunu, 3 gün içərisində kim gələrsə mağazanı 50 min manata satacağını deyib. Bundan sonra mağazanı 50 min manata “Cahan”da işləyən, adını xatırlamadığı bir nəfərə satdığını deyir.
Bundan sonra MTN-nin Babək rayon şöbəsinin məsul şəxsinə zəng edən A.Niftiyev onunla Naxşıvan şəhərindəki Olimpiya İdman Kompleksinin arxasında görüşərək, pulu ona verib. Maraqlıdır ki, bu zaman həmin şəxs pulun 10 min manatını qaytarıb və “Vəli Ələsgərov deyir ki, getsin bu pulla müalicə olunsun” deyib.
(Ardı var)Hurriyyet.org
