Azərbaycanda bəzi vəzifəli şəxslər və məmurlar ölkədə özəl sektora, aqrar sahəyə, kiçik və orta sahibkarlığa olan dövlət dəstəyindən sui-istifadə edirlər. Məmurların vəzifə səlahiyyətlərindən sui-istifadə etməsi isə, dövlət, yerli özünüidarə orqanları, kommersiya və qeyri-kommersiya təşkilatlarının normal fəaliyyətinə xələl gətirir. Belə hallar baş verəndə fiziki və ya hüquqi şəxslərin hüquqları, qanuni mənafeləri, eyni zamanda cəmiyyətin və dövlətin qanunla qorunan mənafeləri pozulur.
Bu kimi hallar isə özünü daha çox dövlət satınalmalarında biruzə verir. Belə ki, vəzifəli şəxslər tərəfindən formal yaradılan şirkətlər satınalmalar xətti ilə həyata keçirilən işlərdə dövlətə hərtərəfli ziyan vururlar. Bu şirkətlər həm vergilərdən yayınır, həm dövlətə heç bir sosial ödəniş etmir, həm də dövlət vəsaitlərinin təyinatından kənara yönəldilməsində vasitəçi olurlar. Digər tərəfdən də, satınalmalarda iştirak etmək istəyən sadə fiziki və ya hüquqi şəxslərin qarşısında baryer olub, onların inkişaf etməsini əngəlləyirlər. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti isə bunlara sadəcə seyrçi olaraq nəzarət edir.
Aktualinfo.org hansısa məmur, yaxud da yüksək çinli bir vəzifə sahibi tərəfindən yaradılmış belə şirkətlərin birinin barəsində kiçik bir araşdırma aparıb. Bu şirkətin adı “AZLAHİYƏ İNŞAAT”dır.
“Azlahiyə İnşaat”(VÖEN 7900064391 ) MMC 2012-ci ildə dövlət reyestrində qeydiyyata alınıb. Şirkətin nizamnamə kapitalı 10 manat, hüquqi ünvanı Səbail rayonu, Qəzənfər Əlizadə ev 4, mənzil 4 ünvanı, qanuni təmsilçisi isə Hüseynov Talıb Sabir oğludur.
MMC-nin ilk hüquqi ünvanı Xocavənd rayonu, Xocavənd ev 102, 500 ailəlik qəsəbə, ilk qanuni təmsilçisi Əliyev Yusif Fərahim oğlu olub. 17.03.2020-ci ildə bircə gün MMC-yə Məhəmmədov Hüseyn Məhəmmədoviç qanuni təmsilçilik edib. 12.10.2020-ci ildən bir gün Hüseynov Talıb Sabir oğlu, daha sonra elə həmin tarixdən 11.04.2022-ci ilə qədər Məhəmmədov Hüseyn Məhəmmədoviç yenidən MMC-yə qanuni təmsilçilik ediblər.
Qeyd edək ki, MMC yarandığı gündən 07.07.2020-ci ilə qədər “AVEY-V 2012” adını daşıyıb. Şirkətin nizamnaməsi və vergi şəhadətnaməsi (VÖEN) itdiyi üçün etibarsız sayılması barədə “Respublika” qəzetinin 3 iyul 2020-ci il tarxli sayında elan verilib. Elə göstərilən tarixdən də adının dəyişdirilərək “AZLAHİYƏ İNŞAAT” Məhdud Məsuliyyətli Cəmiyyətinə çevrildiyi barədə Dövlət vergi Xidmətinin reyestr məlumatlarında yer alıb.
“Azlahiyə İnşaat” MMC-nin maddi-texniki bazası, müqavilə ilə çalışan mühəndis və işçi heyətinin sayı, dövlət qurumlarından aldığı müvafiq lisenziyalar və qanuni təmsilçilik etmiş şəxslər barədə açıq mənbələrdə heç bir məlumat yoxdur.
Amma bununla bərabər 23.04.2021-ci il tarixdən 27.01.2022 -ci il tarixə qədər, yəni bir il 3 ay ərzində bir sıra dövlət qurumlarının müxtəlif lotlar üzrə keçirdikləri 23 satınalma müsabiqəsinin qalibi olub və ümumi dəyəri 4 294 515 manat dəyərində dövlət sifarişi alıb. MMC-nin bu müddət ərzində qalibi olduğu satınalmaların bir neçəsini diqqətinizə çatdırırıq.
MMC Ağdam rayon İcra Hakimiyyəti ilə 269.700,56, Saatlı Suvarma Sistemləri İdarəsi ilə 209.607,19, Biləsuvar rayon İcra Hakimiyyəti ilə 549.014,99, Füzuli rayon İcra Hakimiyyəti ilə 355.025,03, Füzuli Rayon Kommunal Müəssisələr Kombinatı ilə 480.003,36, Qaçqınların və Məcburi Köçkünlərin İşləri üzrə Dövlət Komitəsi Mənzil İstismar Departamenti ilə 277.351,02, “Aqroservis” Açıq Səhmdar Cəmiyyəti ilə 510.350 manat dəyərində satınalma müqavilləri bağlayıb.
MMC ilə bağlı ilginc məlumatlar bunlarla bitmir. Elektron medianın 04 Oktyabr 2023-cü ildə yaydığı məlumata görə Mərkəzi Bank tərəfindən “Azlahiyə İnşaat” MMC-nin barəsində cərimə protokolu yazılıb. Şirkət barəsində İnzibati Xətalar Məcəlləsinin 430.4-cü (Avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə) maddəsi ilə inzibati protokol tərtib edilib. Daha sonra protokol baxılması üçün bu gün Səbail Rayon Məhkəməsinə göndərilib. İş hakim Ülviyyə Şükürovanın icraatına verilib. Məhkəmənin ilkin hazırlıq iclasının vaxtı hələlik açıqlanmayıb.
Yenə də elektron medianın 03.02.2022-ci ildə Dövlət Vergi Xidmətinin məlumat bazasın istinadla yaydığı məlumatda “Azlahiyə İnşaat” MMC-nin 898 299 manat vergi borcu olub. Hazırda isə MMC-nin dövlətə 7 358 364.35 manat vergi borcu var.
Göründüyü kimi MMC-nin külli miqdarda vergi borcu var. Bu borc göründüyü kimi durmadan artır və qısa bir vaxtın borcu olmadığı açıq aydın görsənməkdədir. Yuxarıda qeyd etdiyimiz kimi MMC-nin maddi texniki bazası barədə heç bir məlumat yoxdu. Mərkəzi Bankın cərimə protokolundan da görsəndiyi kimi MMC xarici ölkələrə valyuta köçürüb. Bütün bunlar da MMC barədə açıq mənbələrdə olan məlumatlardır. Burada MMC-nin daha böyük, ciddi məbləğlərdə maliyyə maxinasiyalarında iştirakı da istisna deyil. Bəs dövlətə külli miqdarda vergi borcu olan və durmadan borcu artan bu MMC-nin qarşısı niyə alınmır?
Məlum olduğu kimi Dövlət Vergi Xidməti vergi ödəməkdən yayınma və qanunsuz sahibkarlıq fəaliyyəti ilə məşğul olma faktları üzrə araşdırmalar aparır, vəsaitin dövlət büdcəsinə ödənilməsini təmin edir. “Azlahiyə İnşaat” MMC-nin arxasında kimlər durur ki, MMC-nin borcu durmadan artır və barəsində heç bir tədbir görülmür.
Aktualinfo.org
