Azərbaycanda ümumi təhsil müəssisələrində vahid məktəbli forması ilə bağlı Nazirlər Kabinetinin müvafiq qərarının tətbiqindən istifadə edən bəzi xarici mərkəzlər məsələyə siyasi rəng verməyə və dini-ideoloji zəmində təxribat törətməyə çalışırlar.

Son günlər Azərbaycanda hicabın qadağan edilməsi, baş örtüsündən istifadə edən şagirdlərin və müəllimlərin guya təzyiqə məruz qalmasına dair feyk təbliğat aparılır.

Bu təxribatçı qüvvələr Azərbaycanda sabitliyi pozmaq, inanclı insanlarla dövlət arasında qarşıdurma yaratmaq məqsədilə sistemli şəkildə informasiya müharibəsinə başlayıb. Azərbaycançılığa qarşı hücum kampaniyasının arxasında isə İran rejimi və onların digər ölkələrdəki əlaltıları dayanır.

İrandan, Türkiyədən hicabın müdafiəsi adı altında Azərbaycan əleyhinə qarayaxma kampaniyası aparılır. Bütün bunlar isə Azərbaycanın daxilıi işlərinə kobud müdaxilədir. Halbuki, Azərbaycanda mövcud olan dini tolerantlıq adları çəkilən ölkələrin heç birində yoxdur.

İnsanları məzhəb ayrıseçkiliyinə görə edam edən İran Azərbaycana qarşı dövlət-din münasibətlərinin necə müəyyən edilməsini diqtə edə bilməz. Azərbaycanın İstanbuldakı Baş konsulluğunun binası qarşısında etiraz aksiyası keçirən “Özgür-Der” Fondu özünü söz azadlığının və təhsil hüququnun müdafiəsi ilə məşğul olan dərnək kimi təqdim edir.

Əgər belədirsə, o zaman bu qurum nə üçün İranda yaşayan 35 milyondan artıq Güney Azərbaycan türkünün ana dilində təhsil almaq hüququndan məhrum edilməsi problemini gündəmə gətirmir?

Çünki “Özgür-Der”in Türkiyədə radikal dini baxışları ilə tanınan rəhbəri Rıdvan Kaya “Hizb ut-Təhrir” terror təşkilatına və “Hizbullah”a bağlı adamdır. Bütün bunlar onun İran rejiminin sifarişi ilə hərəkət etdiyini göstərir. Oktyabrın 12-də Bakıdakı orta məktəblərin birinin qarşısında “İmam Rza gələcək” şüarlarının səsləndirilməsi və azyaşlı uşaqların bu aksiyaya cəlbi təxribatın ideya qaynağının İran olduğunu bir daha təsdiq edir.

Azərbaycan Şərqdə demokratik, dünyəvi dövlət quran, qadınların səsvermə hüququnu qanunla tanıyan yeganə dövlətdir. Azərbaycanın dövlət bayrağında islamçılığın rəngi milli və müasirliyin rəmzləri ilə bərabər tutulur. Ona görə də siyasi islama dinin fəlsəfi mahiyyətindən daha çox bağlı olan bəzi Türkiyə rəsmilərinin Azərbaycan əleyhinə bəyanatları yalnız ideoloji təxribat kimi qiymətləndirilə bilər.

Azərbaycanda milli mənsubiyyətindən, siyasi və sosial statustundan asılı olmayaraq, bütün vətəndaşların dini hüquqları bərabər səviyyədə təmin olunur.

Azərbaycan dini azadlıqlarla bağlı beynəlxalq müqavilələrə qoşulub və ona əməl edir. Azərbaycan qanunverciliyi məhz beynəlxalq hüquqa uyğun formalaşıb. Həm Azərbaycan Konstitusiyasında, həm də “Dini etiqad azadlığa haqqında” Qanunda hər kəsin etiqad, dinə münasibəti ilə bağlı əqidəsini ifadə etmək hüququ tanınır.

“Dini etiqad azadlığa haqqında” Qanun dinin məktəbə münasibətini də tənzimləyir. Qeyd edilir ki, dövlət təhsil sistemi dindən ayrıdır. Yəni vahid məktəbli fortmasının tətbiqi zamanı baş örtüsündən istifadə edilməməsi qanunlara uyğundur. Digər hallarda dövlət hər bir şəxsin dini hüquqularını tanıyır və müdafiə edir.

Odur ki, Azərbaycanla bağlı bu qəbildən hansısa ittiham qəbuledilməzdir və reallığa uyğun deyil. Bu, sadəcə bəzi dairələrin Azərbaycana qarşı təxribat xarakterli əməllərinə din donu geyindirmək cəhdidir.

Müşfiq Abdulla
“Cebheinfo.az”