Sabirabadın Yenikənd kənd sakini Cəlilov Qanı Ərzulla oğlu Baş Prokuroru Zakir Qaralova müraciət edib.
TİA.AZ-a müraciətin bir surətini göndərən Q.Cəlilov məmur özbaşınalığı ilə üzləşib:"2011-ci ilin sentyabrında Quruzma bələdiyyəsinə müraciət edərək 2000-ci ildən keçmiş sədri olan Əliyev Fazil Balaqardaş oğlunun icarəsində olan Yenikənd kəndi ərazisində yerləşən 30 ha torpaq sahəsini sub icarəyə götürdüm. Mən Quruzma bələdiyyəsi ilə 15 illik sub icarə müqavilə bağladım. Bu müqavilə əsasında mən qoyunçuluğu inkişaf etdirməyə başladım.
Bundan sonra mənimlə şəxsi-qərəzliyi olan iki nəfər Yenikənd sakini həmin torpaq sahəsini əldə etmək məqsədi ilə Quruzma bələdiyyəsinin keçmiş sədri Fazil Əliyevdən və Şirvan Regional Ədliyyə Şöbəsinin rəisi Nizami Hüseyinovdan müxtəlif dövlət orqanlarına müraciətlər etməyə başladılar.
Yazılı çəkişmələr nəticəsindən öz vəzifəsini qorumaq üçün bələdiyyə sədri Fazil Əliyevə Nizami Hüseyinov təzyiqlər göstərərək mənimlə bağlanmış sub icarə müqaviləsini ləğv etməsini tələb edib. Fazil Əliyevi zərbə altında qoyaraq özünü sığortalamış oldu.
Beləliklə Fazil Əliyev Nizami Hüseyinovun təzyiqləri nəticəsində mənə sub-icarəyə verilmiş torpaq sahəsinin boşaldılmasına dair mənim və bələdiyyə üzvlərinin iştirakı olmadan özbaşına qərar vermişdir. Mən isə Şirvan İnzibati-İqtisadi Məhkəməsinə müraciət etdim. Məhkəmə prosesi zamanı Sabirabad rayon İcra Hakimiyyətinin Başçısı tərəfindən təklif aldım. Təklif bundan ibarət oldu ki RİHB-nın Quruzma Bəldiyyəsinin sədri , Şirvan Regional Ədliyyə Şöbəsinin rəisi Nizami Hüseynovun qarşılıqlı razılaşma əsasında mənim Yenikənd ərazisində olan 30 ha torpaq sahəsini boşaldım və bunun əvəzində qonşu kəndin ərazisindən sahibkarlıq fəaliyyətimin davam etdirməsi üçün torpaq sahəsi ayrılsın.
Çəkişmələrin bitəcəyi barədə mənə təminat verən hər üç şəxsə inanaraq razılaşdım və bu təklifin icrasını Nizami Hüseyinov şəxsən öz üzərinə götürdü.Lakin bu çəkişmələr daha da qızışdı.Buna görə də Nizami Hüseyinov və Fazil Əliyevə təzyiqlərini davam etdi”.
Şikayətçi deyir: “Bu təzyiqlərə tab gətirməyən Fazil Əliyev pisxoloji gərginlik nəticəsində infarkt və insult diaqnozu ilə uzun müddət xəstəxanada qalaraq həkimlərin məsləhəti ilə vəzifəsindən istefa verdi. Bundan sonra Quruzma bələdiyyəsinin sədr əvəzi seçilən Ə. İbrahimov N.Hüseynovun göstərişi ilə 2014-cü ilin dekabrında məni yenidən Sabirabad rayonu məhkəməsinə verərək mənim üçün qonşu kənd ərazisindən ayrılmış torpaq sahəsini də boşaldılması tələbini qoydu. Ə.İbrahimovdan bu müraciətin səbəbini məhkəmədə soruşduqda bildirdi ki ,mən Nizami Hüseyinova tabeyəm onun göstərişləri mənim üçün qanundur. Halbuki, bütün bu göstərişləri verən Nizami Hüseyinov mənim ayrılmış 10 ha torpaq sahəsi barədə keçirilən 18.02.2013.-cü il tarixli iclas protokolundan çıxarışı şəxsən özü Şirvan Regional Ədliyyə Şöbəsində qeydiyyatdan keçirmişdir.
Necə olur ki Nizami Hüseyinov öz vəzifə səlahiyyətlərini aşaraq,özünü idarəetmə orqanı olan bələdiyyənin işinə birbaşa müdaxilə edə bilər? Nizami Hüseyinovun bu tələblərini qeyri-qanuni olduğunu görən Ələmdar İbrahimov Quruzma bələdiyyəsi adından rəsmi olaraq müraciət etmiş,məndən şikayətçi olmadığını bildirdi və məhkəmə prosesinin dayandırılmasını xahiş etmişdir.Faktlar üçün sənədlərin surətini təqdim edirəm.
Yeni bələdiyyə seçkilər nəticəsində Ə.İbrahimov vəzifəsindən uzaqlaşdırılmış Quruzma bələdiyyəsinin sədri olaraq Nəcəf Allahverdiyev seçilmişdir. N.Allahverdiyev başladıqdan sonra bu proseslər barədə söhbətimiz əsasında onun mənimlə heç bir şəxsi-qərəzliyinin olmadığını və sahibkarlıq fəaliyyətimin inkişafında mənə yardımçı olduğunu bildirdi. Həmkəndlim və xoş münasibətdə olduğum N.Allahverdiyevin bu sözləri mənim üçün təbii idi.
Lakin bir müddət keçdikdən sonra şəxsi, xoş münasibətlərimizə baxmayaraq N.Allahverdiyev Quruzma bələdiyyəsi adından mənim üçün gözlənilməz şəkildə həmin torpaq sahəsinin boşaldılmasına dair Sabirabad rayon Məhkəməsi qarşısında iddia qaldırdı. Halbuki Quruzma bələdiyyəsinin ərazisində məndən başqa 1000 hektarlarla torpaq sahəsi müxtəlif sahibkarların iştifadəsindədir. Əlbəttə iddianın qaldırılması ilə bağlı N.Allahverdiyevlə telefon əlaqəsi saxladım. Söhbət əsnasında N.Allahverdiyev bildirdi ki, yaranmış vəziyyət qarşısında acizdir. Bu iddianı qaldırılmasında ondan yenə də Nizami Hüseynov tələb edir. Axı nə üçün beş kəndi əhatə edən Quruzma bələdiyyəsi ərazisində bu qədər qanunsuz tikililər zəbt olunmuş sahələr ola-ola yalnız mənim sahəm boşaldılmalıdır? N.Allahverdiyevin bu sözlərindən sonra mən Nizami Hüseyinovla görüşdüm və mənim sahibkarlıq fəaliyyətimə nə üçün mane olması ilə maraqlandım.
O bildirdi ki, həmin iki nəfər qərəzli qonşularla razılıq əldə olunmasa onlar mənim iş fəaliyyətimdən müxtəlif hüquq mühafizə orqanlarına müraciətlər edərək təzyiqlər göstərəcəklər.
Bu da mənim tabe olduğum Ədliyyə Nazirliyində mənə qarşı mənfi münasibətin formalaşmasına səbəb olacaq. Deməli belə çıxır ki, mən Nizami Hüseyinovun vəzifəsinin qurbanı olmalıyam”.
Maraqlıdır ki, Nizami Hüseyinov hansı əməllərinə görə iki nəfərin hədələrindən qorxaraq mənim dörd il ərzində inkişaf etdirdiyim sahibkarlıq fəaliyyətimi bitirməyə çalışır. Belə ki o, mənə söz verərək 30 ha sahəsini boşaltdıqdan sonra mənə kömək etmək əvəzinə söz verərək və üzərində özlərinin mənim üçün inşa etdikləri müvəqqəti tikililərin sənədləşməsinə mane olmağa başladı.
Quruzma bələdiyyəsi 13 fevral 2014-cü il tarixli 03 saylı iclas keçirərək mənim üçün ayrılması nəzərdə tutulmuş 10 ha torpaq sahəsinin hərrac və müsabiqə komisiyasına çıxarılması barədə qərar vermişdir. 14 fevral 2014-cü il tarixdə 148 nömrəli məktubla DT və XK-nin Sabirabad rayon Torpaq Hərrac və Müsabiqə komisiyasına müraciət etmişdir. Lakin hərrac komisiyası müsabiqə elan etməmişdir. Hərrac komisiyasından səbəbini soruşduqda bildirmişdilər ki, Şirvan Regonal Ədliyyə şöbəsinin rəisi N. Hüseynov hərrac komisiyasına məktubla müraciət edərək sözü gedən 10 ha torpaq sahəsinin hərraca çıxarılmasının dayandırılması barədə xahiş etmişdir. Bu məsələ ilə bağlı mən Nizami Hüseyinovla görüşərək səbəbini soruşdum.Cavab olaraq iki nəfər qərəzli şəxslərdən qorxduğunu bildirdi.
Bununla kifayətlənməyən N.Hüseyinov 30 ha torpaq sahəsi boşaldıqdan sonra da öz qərəzliyini yenidən göstərərək Sabirabad Rayon Məhkəməsinin icraçısı Gülmalı Əzizova təzyiqlər edərək şifahi şəkildə ondan tələb etdi ki, mənim qonşu Qəzli kəndi ərazisində yerləşən10ha torpaq sahəsini əvvəlki 30ha torpaq sahəsinə daxil etsin. Halbuki öz araşdırmasında Gülmalı Əzimov Əmlak Məsələləri Dövlət Komitəsinin Yanında Daşınmaz Əmlakın Dövlət Reyestri Xidmətinin 13 saylı Ərazi idarəsinin Ədliyyə Nazirliyinin Sabirabad rayon İcra Qurupuna13.02.2015-ci il tarixli 153820000216 saylı məktubuna əsaslanaraq icrayə xitam vermişdir və nəticə olaraq mənə Sabirabad rayon məhkəməsinin 15 aprel 2015-ci il tarixli 8 (056) -37 / 2015 saylı (İcra sənədi üzrə icrata xitam verilməsi barədə) qərardadın surətini göndərmişdir.
