Ötən ilin son aylarından etibarən Azərbaycan müxalifətində müəyyən bir aktivlik müşahidə olunurdu. AXCP sədri Əli Kərimlinin birlik yaratmaq istiqamətində döymədiyi qapı qalmamışdı, sabiq daxil işlər naziri İsgəndər Həmidov Azərbaycan Xalq Hərəkatı yaratmaq üçün ciddi səylə çalışırdı, Qarabağ Komitəsi isə özünün fəaliyyətindən doğan uğurlarının “dadını çıxarırdı”.
Faktiki olaraq müxalifət bir növ “hücum taktikası” həyata keçirirdi. Amma son iki ayda durum tamamilə dəyişib, müxalifətin aktivliyindən əsər-əlamət yoxdur. İndi iqtidar üstün mövqelərə sahib görünür, ictimai rəy onun tərəfindədir.
Ekspertlər bunu daha çox prezident İlham Əliyevin sosial və iqtisadi sahələrdə inqilab xarakterli fərmanları, sərəncamları ilə əlaqələndirirlər.
Ana Vətən Partiyasının sədri, deputat Fəzail Ağamalı “Yeni Müsavat”a məsələni bu cür şərh etdi: “Ən müxtəlif vaxtlarda müxalifət bu və ya buna bənzər aktivlik nümayiş etdirib, müəyyən birliklər, qurumlar yaradılıb. Müxalifətin radikal qanadı və onun ətrafında olan ayrı-ayrı qurumlar ora cəlb olunub. Prinsip etibarı ilə bu qurumlar heç bir effekt verməyib. Az müddət keçəndən sonra artıq onlar tarixin arxivinə göndərilib. Ötən ilin noyabr, dekabr aylarında radikal müxalifət, iqtidara barışmaz münasibət ifadə edən ayrı-ayrı şəxslər elə düşünürdülər ki, cəmiyyətdə bir fəallıq, narazılıq var və bundan istifadə edib iqtidarın üzərinə getmək olar, bunu kütləvi aksiyalara çevirmək mümkündür. Belə xülyalarla yaşayırdılar. Bununla özlərini reabilitasiya edəcəklərini düşünürdülər, hadisələri diktə edəcəklərini zənn edirdilər. Bu düşüncələrlə onlar aktivləşdilər. Lakin köhnə simaların, cəmiyyətdə nüfuzu olmayanların, siyasi baxımdan tükənənlərin bu addımlarının nəticə verməyəcəyi əvvəlcədən görünürdü. Belə də oldu.
Ölkə prezidenti 2018-ci ilin aprelində keçirilən prezident seçkiləri ərəfəsində islahatların davam edəcəyinin, daha geniş miqyas alacağının anonsunu vermişdi. Prezident seçkilərindən sonra artıq bu istiqamətdə addımlar atılmağa başlanıldı. Sosial və iqtisadi sahələrdə inqilab xarakterli sərəncamlar, fərmanlar imzalandı. Şəhidlərin sığortası ilə bağlı müəyyən qisim insanların narazılığından istifadə edib insanları ətrafına toplamağa çalışan, Milli Şuranın çətiri altında özünü yenidən ifadə etməyə səy göstərən Əli Kərimlinin cəhdlərinin şahidi olduq. Lakin bu mümkün olmadı. Hələ ondan qabaq ölkə rəhbərinin sığortaların verilməsi ilə bağlı tapşırığı var idi ki, bu məsələ ciddi şəkildə araşdırılsın, burada kimsə kənarda qalmasın. Eyni zamanda bu fikirlər Milli Məclisdə də səsləndirildi. Onu səsləndirənlərdən biri də mən idim. Bu məsələ cənab prezidentin diqqətində idi. Bəzi qüvvələr bu məsələdən ölkə daxilində qarşıdurma yaratmaq üçün istifadə etməyə çalışırdılar. Amma qısa zaman kəsiyində məsələ araşdırıldı və həll olundu. Radikal qüvvələrin bundan istifadə cəhdləri nəticəsiz qaldı. Mehman Hüseynovla bağlı da ajiotaj yaradıldı. Avropa Parlamenti ilə Milli Şuranın eyni vaxtda bu məsələni qabartması çox sualların cavabı oldu. Amma bundan da bir nəticə qazana bilmədilər. Mehman Hüseynovun müraciəti əsasında ölkə prezidentinin tapşırığı ilə bu məsələ araşdırıldı. Artıq Mehman Hüseynov azadlığa çıxıb. Digər tərəfdən, prezident seçkilərindən sonra sosial xarakterli verilən sərəncamlar və fərmanlar bu ilin əvvəllərində başa çatdı. Dalbadal ölkə rəhbəri inqilab xarakterli fərman və sərəncamlar verdi. Problemli kreditlərin həlli ilə bağlı prezidentin imzaladığı sənəd, demək olar, radikal qüvvələri istifadə etmək istədikləri bu amildən də məhrum etmiş oldu. 2003-cü ildən etibarən prezident İlham Əliyev ölkədə gedən prosesləri çox diqqətlə izləyir, sosial sifarişləri təhlil edir, cəmiyyətin önə çəkmiş olduğu aktual problemləri dərhal həll etmək üçün konkret addımlar atır. Bütün bunlar müxalifəti bazalardan məhrum edir, onun sosial bazalarına ağır və sarsıdıcı zərbələr vurur. Sadə Azərbaycan vətəndaşı düşündüklərinin həyata keçirildiyini, narahatlıq doğuran məsələlərin həll edildiyini görürsə, bunlar ölkə prezidentinin atmış olduğu addımların içərisindədirsə, artıq onun müxalifətin yanında bir işi yoxdur. Ölkə rəhbərinin xalqın maraqlarına yönəlik atdığı addımlar həmin qüvvələrin fəallaşmasının qarşısını alır. O qüvvələr xaricdən qrantlar almaq üçün bu cür fəaliyyət aparırlar. Onların niyyətləri həyata keçməyəcək. Çünki xalq onları boykot edib. Keçirilən mitinqlərdə tribunaya baxanda cəmiyyətin tanıdığı simaları görmək mümkün deyil. Tanınan 1-2 nəfərin isə xalq içərisində nüfuzları yoxdur. Bundan sonra da radikal müxalifət niyyətlərinə çata bilməyəcək”.
AĞ Partiya başqanı Tural Abbaslı aktivliyin yaşandığının göz önündə olduğunu bildirdi: “Sizinlə o məsələdə razıyam ki, son bir neçə ayda Azərbaycan siyasi arenasında xüsusi aktivlik yaşanır. Bu aktivliyin səbəbləri kimi hakimiyyətdaxili problemləri, beynəlxalq aləmin hazırkı iqtidara açıq və gizli basqıları, müxalifət arenasında başlamış hərəkətliliyi, ölkədən kənarda yaşayan mühacirlərin sosial şəbəkələrdəki təbliğatını və ən nəhayət, insanların artıq bu şərtlər altında yaşamaq istəməməsini göstərmək olar. Mən deməzdim ki, son zamanlar açılımların və ya başqa hansısa proseslərin təsiri ilə siyasi aktivlik azalıb. Əksinə, hazırda siyasi aktivlik özünün, belə demək mümkündürsə, ikinci mərhələsinə qədəm qoyub. Hazırda müxalifət arenasında təmərküzləşmə və mövqelərin aydınlaşması prosesi gedir. Bundan sonrakı mərhələdə isə xalqın proseslərdə birbaşa iştirakının şahidi olacağımızı düşünürəm.
Baxın, əgər vəziyyət həqiqətən də siz dediyiniz kimi, passivlik istiqamətində hərəkət edirsə, niyə hakimiyyət son aylarda heç bir təşkilat və partiyaya mitinq keçirməyə razılıq vermir? Hətta fəaliyyətində heç bir siyasi çalarların olmadığını artıq sübut etmiş Qarabağ Komitəsinə də ”Qarabağa azadlıq" mitinqi keçirməsinə razılıq verilmir. Əslində son illər ərzində ən çox siyasi aktivliyin yaşandığı dönəm indidir. Bunu hakimiyyət də gözəl bilir və anlayır. Son zamanlar iqtidarın etdiyi açılımlar da bu aktivliyə görədir. Ancaq unudulmamalıdır ki, bunlarla cəmiyyətdə köklü müsbət dəyişikliklərə nail olmaq mümkün olmayacaq. Bu islahatların nəticə verməyini istəyirlərsə, islahatlar artıq siyasi sahəyə keçməlidir. Çünki ölkədə köklü siyasi islahatlar olmayacaqsa, milli barışıq mühiti yaradılmayacaqsa, nəticə hamımız və dövlətçiliyimiz üçün təhlükəli olacaq. Mən bir daha iqtidarı qeyd etdiyim nüanslara diqqətlə yanaşmağa və lazımi nəticələr çıxardaraq, addımlar atmağa səsləyirəm".
