106.3 FM-də mahnıların müəlliflik hüquqları ilə bağlı sorğu keçirilib.
Axşam.az xəbər verir ki, sorğuda iştirak edən bəstəkarlar mahnının sahibinin kim olması, ifaçıların hüquqları və müəlliflərlə müğənnilər arasında müqavilələrin əhəmiyyəti barədə fikirlərini bölüşüblər.
Xalq artisti, bəstəkar Aygün Səmədzadə bildirib ki, mahnının müəllifləri bəstəkar və söz müəllifidir, ifaçı isə əsəri dinləyiciyə təqdim edir. Onun sözlərinə görə, ifaçılar illər ərzində dəyişə bilər, lakin mahnının müəllifləri dəyişməz qalır. Bəstəkar vurğulayıb ki, mahnını ifa etmək üçün razılıq əldə olunması müəlliflik hüquqlarının avtomatik olaraq müğənniyə keçməsi demək deyil.
Bəstəkar Xanım İsmayılqızı da mahnıların müəlliflərinə məxsus olduğunu bildirib. O, ifa üçün qonorar ödənilməsinin əsərin müəllif hüquqlarının müğənniyə satılması anlamına gəlmədiyini qeyd edib. Xanım İsmayılqızı gələcəkdə yarana biləcək mübahisələrin qarşısını almaq üçün ifaçılarla müəlliflər arasında rəsmi müqavilələrin bağlanmasını dəstəklədiyini açıqlayıb.
Müğənni-bəstəkar Pərviz Mahmudov isə mahnı müəllifliyi ilə bağlı mübahisələrin illərdir davam etməsinə diqqət çəkib. O bildirib ki, müğənnilər mahnıları konsertlərdə, toylarda və digər tədbirlərdə ifa edərək gəlir əldə edirlərsə, müəlliflər də öz əsərlərinə görə qonorar almalıdırlar. Bəstəkarın fikrincə, mahnının ifaçısı olmaq həmin əsərin bütün hüquqlarına sahib olmaq demək deyil.
Əməkdar artist Elza Seyidcahan da məsələyə münasibət bildirərək mahnının sahibinin bəstəkar və şair olduğunu vurğulayıb. O, yaradıcı insanların bir-birinin əməyinə hörmətlə yanaşmasının vacibliyini qeyd edib.
Meyxanaçı Vüqar Əbdülov isə müəlliflərlə ifaçılar arasında münasibətlərin rəsmiləşdirilməsinin vacibliyindən danışıb. O, müğənnilərin bəzən geyim və saç düzümü ilə bağlı göstərilən dəstəyə görə təşəkkür etdiklərini, lakin mahnının yaranmasında əməyi olan bəstəkar və şairləri unutduqlarını bildirib.
Bəstəkar və ifaçı Kazımcan da mahnının müəlliflərinin bəstəkar və söz yazarı olduğunu deyib. O, Aygün Kazımovanın “S.O.S” mahnısının Rusiyada Sabi adlı ifaçı tərəfindən rus dilində səsləndirilməsini nümunə göstərib. Kazımcanın sözlərinə görə, əsərin başqa ifaçı tərəfindən ifa olunmasına münasibətdə müəllifin qərarı əsasdır. Bəstəkar əlavə edib ki, son illərdə mahnılarını müqavilə əsasında təqdim edir və hüquqlarının qorunmasına xüsusi diqqət yetirir.
Bəstəkar İsmayıl Əsədov isə bəstəkarın eyni mahnını bir neçə müğənniyə vermək hüququnun olduğunu bildirib. O, müəlliflik hüquqlarının bəstəkar və söz müəllifinə, ifaçının hüquqlarının isə öz ifasına aid olduğunu vurğulayıb.
