“Four Seasons” hotelində deputat Ramil Həsənlə Vəkillər Kollegiyasının sədr müavini Muxtar Mustafayev arasında yaranan “maska qalmaqalı” sosial şəbəkələrdə və mediada müzakirə olunmaqda davam edir. Daxili İşlər Nazirliyinin deputatı cərimələməsi isə məsələni daha da böyüdüb.
Oxuculara aydın olsun deyə qalmaqal barədə məlumat verək.
Virtual.org saytı sözügedən “Four Seasons” hotelində R.Həsənovla M.Mustafayev arasında ciddi mübahisə olması ilə bağlı görüntülər yayımlayıb. Həmin məkanda M.Mustafayev Moldova əsilli, britaniyalı biznesmen Almari Vael Süleymanın qanuni nümayəndəsi qismində iştirak edib.
Almari Vael Süleymanın keçmiş həyat yoldaşının hazırda deputat Ramil Həsənlə evli olduğu bildirilir. Yayılan məlumata görə, britaniyalı biznesmenin həmin evlilikdən olan qızı indi Bakıda deputatın evindədir. Vael Süleyman qızı ilə görüş hüququ almaq üçün məhkəməyə müraciət edib.
Təmin edilən bu görüş həmin hoteldə müəyyənləşdirilmiş və həmin vaxt deputatın icraya müdaxilə etdiyi bildirilir. Bu barədə vəkil açıqlamasında bildirib ki, əslində məhkəmə qərarının icrasında iştirak etmək hüququ olmayan deputat qəsdən qarşıdurma yaradıb: “Böyük Britaniya vətəndaşı, Moldovada yaşayan məşhur iş adamı Almari Vael Süleymanın uşağı ilə görüşü təmin edilməli idi. Görüş həmin hoteldə müəyyənləşdirilmişdi. Görüş zamanı Ramil Həsən icraya müdaxilə edirdi”.
Məsələ ilə bağlı R.Həsən də fikirlərini REAL TV ilə bölüşüb: “Qanunverici hakimiyyətin təmsilçisi olaraq, hər birimiz sadə Azərbaycan vətəndaşı kimi qanunlara riayət edirik. Konstitusiyanın müvafiq bəndlərinə görə, bizim hüquqlarımızın biri də bundan ibarətdir ki, icazəmiz olmadan hər hansı bir şəxsin və ya o şəxsin nümayəndəsinin videoçəkiliş aparmasına icazə verilmir.
Şəxsi həyatın toxunulmazlığı konstitusiyada təsbit edilib. Təəssüf ki, buna baxmayaraq, vəkilliklə məşğul olan bir şəxs bilavasitə mənim gözümün qarşısında ətrafındakı adamlara təlimat verir ki, belə bir videoçəkiliş həyata keçirsin.
Təəssüf edirəm ki, Vəkillər Kollegiyasının nümayəndəsi, eyni zamanda bəzi mətbuat orqanları təxribatçı addımlarla ölkə gündəmini şəxsi zəmində başqa istiqamətlərə yönəltməyə cəhd edirlər".
R.Həsənlə bağlı bu qalmaqal ilk deyil. Təxminən 20 gün öncə məhkəmə qərarından sonra deputatın mənzilinə gələn icraçıların qarşısına R.Həsən şortiklə çıxmış, onlara qarşı xoşagəlməyən ifadələr işlətmişdi.
Ana Vətən Partiyasının sədri, Milli Məclisin İntizam Komissiyasının sədr müavini Fəzail Ağamalı komissiyada həmkarının işinə baxıb-baxmayacaqları barədə sualımıza belə cavab verdi: “Millət vəkili xalq tərəfindən seçilən, mandat verilən, qanunvericiliklə kifayət qədər statusu olan şəxslər olur. Bu baxımdan hər məsələyə görə millət vəkilinin fəaliyyətini İntizam Komissiyasına qoyub, onu tənbeh etmək təcrübəsi mənə elə gəlir ki, təqdir edilən olmaz. Hansı hallarda millət vəkillərinin fəaliyyəti İntizam Komissiyasına verilir? Parlamentin nizamnaməsi pozulanda, eyni zamanda onun hərəkət və davranışları ictimai təhlükəlilik təşkil edərsə, açıqlamaları dövlətçiliyimizə ciddi problem yaradarsa, etdiyi çıxışlar, yazmış olduğu yazılar, müsahibələr dövlətlərarası münasibətlərdə xoşagəlməz gərginlik yaradırsa, bu hallarda İntizam Komissiyası bu məsələlərə baxır. Müzakirələrdən sonra komissiyanın müvafiq qərarı qəbul olunur. Amma Ramil Həsənin hoteldə bir vəkillə mübahisə etməsi İntizam Komissiyası səviyyəsində müzakirə ediləcək məsələ deyil. Verilən açıqlamalardan da məlum olur ki, bu, mübahisə xarakteri daşıyır. Tərəflərdən biri digərinin fikirlərini qəbul etməyib və hər kəs özünün haqlı olduğunu ortalığa qoyub, beləliklə də mübahisə yaranıb. Ona görə də bunun İntizam Komissiyasında müzakirə edilməsinə, məncə, ehtiyac yoxdur. Mübahisə özü belə ictimai təhlükə təşkil etməyib. Burada təbii ki, əxlaqi qaydalardan, amillərdən kənarda olan fikirlərin səslənməsi barədə mətbuatda məlumatlar getməyib. Bu baxımdan mübahisənin İntizam Komissiyasına çıxarılması barədə fikirlər, tələblər qeyri-ciddi səslənir. Hər birimiz hətta ailədə belə mübahisə edirik. İş yerində, həyatda yaxın olanlar şəxslər, dostlar arasında belə mübahisələr yaşanır. İndi buna görə onlar cəza almalıdırlar? Düşünürəm ki, bu məsələnin İntizam Komissiyasında müzakirəsinə ehtiyac yoxdur. Buna əsas da görmürəm. Amma millət vəkilinin üzərində ictimai nəzarətin güclü olduğunu unutmamalıyıq. Deputat bütün situasiyalarda özünü cilovlamağı bacarmalıdır. Onun demiş olduğu söz, atmış olduğu addım, yol vermiş olduğu hərəkətlər cəmiyyətdə ciddi rezonans doğurur. Bunu millət vəkilləri nəzərə almalıdır. Ümidvaram ki, bundan sonra yəqin hörmətli həmkarımız Ramil Həsən davranış və hərəkətlərində emosiyalara yol verməyəcək, istənilən situasiyada daha çox təmkin nümayiş etdirəcək”.
Aydınlar Partiyasının sədri, hüquqşünas Qulamhüseyn Əlibəyli məsələnin hüquqi tərəflərinə toxundu: “Bu insidentin təfərrüatları barədə tam məlumatlı deyiləm. Düşünürəm ki, tam dolğun məlumata malik olanlar da azdır. Belə mübahisələr olur. Sadəcə, onu bilirəm ki, deputat tərəf kimi çıxış edib və vəkil bunun üçün onunla mübahisə edib. Hər halda, onun dediyindən çıxış edirəm. Məhkəmə valideynin uşağı ilə görüşməsi üçün qərar verməlidir. Hesab edirəm ki, məhkəmədə baş verən bu mübahisəni o qədər də şişirtmək lazım deyil. Məhkəmə zamanı bir-birinə qarşı bundan da kəskin davranışların olduğunu, ifadələrin işlədildiyini görmüşük. Bizdə adətən belə fikirlər var ki, vəzifə statusu varsa, deputatdırsa, etik qaydalara daha çox əməl etməlidir. Əgər mübahisə zamanı söyüş, təhqiredici ifadələr varsa, o zaman bu məsələyə baxıla bilər, yəni Milli Məclisin İntizam Komissiyası tərəfindən. Bu komissiya tənbehedici tədbirlər görə bilər. Xəbərdarlığın edilməsi, töhmətin verilməsi mümkündür. Düşünürəm ki, mübahisə deputat mandatından məhrum edilməyə qədər gəlib çıxmayıb. Qanunvericiliyə görə, əgər deputat etik qaydaları kobud şəkildə pozursa, mandatından məhrum oluna bilər. Amma bu olayı etik qaydaların pozulması kimi qələmə vermək olar, kobud pozulma kimi deyil”.
Milli Cəbhə Partiyasının sədri Razi Nurullayev həmkarının müdafiəsinə qalxıb. O bununla əlaqədar öz facebook səhifəsində status paylaşıb: “Ramil Həsən yalnız deputat həmkarım olduğu üçün yox, həm də ədalətli olmaq üçün yazıram. Maska taxmayıb deyə deputatı öldürmək, asmaq lazımdır? Nədir bu aqressivliyin səbəbi? Bir vətəndaş cərimə olunanda elə bilirəm ki, məni cərimələyiblər. Yəni mənim vətəndaşa mövqeyim budur, ona doğma yanaşmamdır. İnanmıram ki, elə deputat olsun ki, o, vətəndaşın cərimə edilməsinə sevinsin.
Əslində qanun qəbul olunanda, doğru xatırlayıramsa, deputatlara şamil olunmaması qeyd edilmişdi. Etiraz etmirəm, qanunu dəyişək və sonra isə hamısını tutub cərimələsinlər. Amma indiki qanunla Ramil müəllimin cərimələnməsi qanuna ziddir. Bir də qanunu açıb baxacam. Demirəm ki, deputat kimdənsə artıqdır. Deputat da sadə bir vətəndaşdır.
Mən onun ailə məsələsində kimin haqlı, kimin haqsız olduğunu bilmirəm. Bunu aidiyyəti orqanlar araşdırır. Hər kəsin bir haqlı və haqsız tərəfi olur.
Mənə həyatda xoş gəlməyən bir cəhət var və istəməzdim ki, bunu insanlarımızda görüm. Axı bizim gözəl insanlarımız var. Kiminsə toruna düşüb maşınında vint olmaqdan çəkinin. Onların həm maddi, həm də digər maraqları var? Sizlər isə bu deputatın üzərinə getməklə dəllallara pul qazandırırsınız.
Bizim cəmiyyətdə ədalət tərəzisi tam pozulub və ədalət deyilən məfhum yaddaşlardan silinir. Belə getsə, qanundan kənar işlər çoxalacaq və bu da cəmiyyətin əsaslarını söküb atır".
“Yeni Müsavat”
