Binəqədi rayon Ağamirək İsfahani küçəsi, ev 9-da yaşayan Vəli Əhməd Tapdıq oğlu “Hürriyyət”in redaksiyasına müraciət edərək, atası Əhmədov Tapdıq Əhməd oğlunun öldürüldüyünü iddia edir. Oktyabrın 7-də özünü Binəqədi rayon İcra Hakimiyyətinin işçiləri kimi təqdim edən şəxslər Tapdıq Əhmədovun yaşadığı ünvana gələrək, evi sökməklə hədələyiblər. Evində təmir işləri aparan 68 yaşlı ahıl kişi tikinti işləriylə bağlı əvvəlcədən qəsəbə nümayəndəsi Qadir Məmmədov ilə razılığa da gəlib. Buna baxmayaraq, özünü Binəqədi rayon İcra Hakimiyyətinin əməkdaşları kimi təqdim edən şəxslər evi sökməyə israr ediblər. Daha sonra, Tapdıq Əhmədov onları evindən çıxardıb.
Bunu həzm edə bilməyən nümayəndələr əraziyə Post Potrul Xidmətinin (PPX) əməkdaşlarını cəlb ediblər. Əraziyə gələn polis əməkdaşları Tapdıq Əhmədovun ahıl şəxs olduğunu görüb, sözügedən ünvanı tərk ediblər. Bunun da faydası olmadığını görən evə zorla girməyə çalışan bir qrup şəxs əlbir olduqları sahə müvəkkilərini hadisə yerinə dəvət ediblər. Ahıl kişinin əsəbləşdiyini və əl-ayaqlarının əsdiyini görən şəxslər, hadisə yerini bir göz qırpımında tərk ediblər. Anında heç bir müdaxilə edilməməsi səbəbindən Tapdıq Əhmədov hadisə yerində dünyasını dəyişib. Hadisənin tam təfərrüatlarını mərhumun oğlu Vəli Əhməd "Hürriyyət"ə danışıb:
"Oktyabrın 7-də atam Əhmədov Tapdıq Əhməd oğlunu yaşadığı mənzildə Binəqədi rayon İcra Hakimiyyətinin işçiləri öldürüblər. Hadisə Binəqədi qəsəbəsi Ağamirək İsfahani küçəsi, ev 9-da baş verib. Atam evinin yaşamağa yararsız vəziyyətdə olduğuna görə, Binəqədi rayon İcra Hakimiyyətinin ərazi üzrə qəsəbə nümayəndəsinə müraciət edib. Onlar nümayəndə göndəriblər ki, evə baxış keçirilsin. Baxış keçiriləndən sonra evin həqiqətən də yaşamağa yararsız vəziyyətdə olduğunu görüblər. Atama evi bərpa etmək üçün icazə veriblər. Özüm də bu evdə qeydiyyatdayam və yaşayıram. Atam evi bərpa etmək istəyərkən, Binəqədi rayon İcra Hakimiyyəti qoçu dəstəsini evimizə göndərib. Onlar gəlib qapını döyüblər. Atam həmin gün evdə istirahət edib. Atam qapını açanda, əvvəlcə kim olduqlarını soruşub. Deyiblər ki, İcra Hakimiyyətinin əməkdaşlarıyıq. Atam onlardan sənədlərinin olub-olmamasını soruşub. Heç bir sənədlərinin olmadığını deyiblər. Niyə gəldiklərini soruşduq da isə "evi sökməyə gəlmişik" deyə cavab veriblər. Atamla söhbətlərində bizim onlara pul verməli olduqlarını deyiblər. Nəticədə, atam onları evdən çıxardıb.
Daha sonra sözügedən şəxslər gedib, evin əvvəlcədən yararsız vəziyyətdə olduğuna qərar verən şəxslə yenidən evimizə gəliblər. Atam həmin şəxsi tanıdığına görə evə buraxıb. Həmin şəxslə birlikdə digər şəxslər də fürsətdən istifadə edib evə daxil olublar. Daha sonra atam onları evdən qovmaq istəyib. Onlar isə Post Patrul Xidmətinə (PPX) zəng ediblər. Evə gələn post patrul atamın yaşlı olduğunu görüb, çıxıb gediblər. Sonra ərazi üzrə polis müvəkkilinə zəng ediblər. Bizim ərazi üzrə sahəyə Fuad adlı şəxs baxır. O, Binəqədi rayon 43-cü polis bölməsinin işçisidir. O, mülki geyimdə əraziyə gəlib. Bizim sahəyə aid olmayan mayor rütbəsində olan İldırım adlı şəxs isə polis formasında gəlib. Atamın əsəbləşdiyini və əl-ayağının əsdiyini görən Binəqədi rayon İcra Hakimiyyətinin əməkdaşları vəziyyətin pis olduğunu görüb ərazidən qaçıblar. İldırım adlı polis mayoru da onların qaçmasına şərait yaradıb. Bizim əraziyə baxan və hadisə yerinə mülki geyimdə gələn polis müvəkkili Fuad adlı şəxs isə sadəcə hadisəni kənardan izləyib və sonra vəziyyətin pis olduğunu görüb o da ərazini tərk edib.
Anam Gülsümxanım Əhmədova da hadisəyə şahiddir. Anam deyib ki, "kişini öldürdünüz". Deyiblər ki, yox ölməyib, sağdır. Atam ölüm vəziyyətində olmasına baxmayaraq, heç bir yardım edilməyib. Təcili yardım belə çağırılmayıb. Qonşularımız atamı yerdən götürüb, evdə uzandırıblar. Sonra təcili yardıma zəng olunub".
Bu hadisədən sonra atasını itirən Vəli Əhməd deyir ki, Binəqədi rayonu İcra Hakimiyyəti onlardan xəbərsiz yaşadıqları şəxsi evlərinə xeyli sayda insanı da qeydiyyata salıb:
"Burda birbaşa Binəqədi rayon İcra Hakimiyyəti, qəsəbə nümayəndəsi Qadir Məmmədov, onun müavini Əlikram Haqverdiyev iştirak edib. Mən qəsəbə nümayədəsindən soruşuram ki, bu gələnlər kimin işçisidir? Deyir ki, bizim işçidir. Ardınca deyirəm ki, axı sən tikintiyə icazə vermişdin, niyə işçilərini göndərmisən? Cavabında deyir ki, mən göndərməmişəm. Gələnlərə də polis birbaşa dəstək verir. Əgər, onları həyətdən qovsaq, bizi həbs edəcəklər. Bizi həbs edəndən sonra, evimizi də sökürlər. Vurğulayım ki, ərazidə evlər də var. Hamısı da köhnə evlərdir. Eyni zamanda, evimizin rəsmi sənədi də var. Qeyd edim ki, Binəqədi rayonu İcra Hakimiyyəti şəxsi evimizə bizdən xəbərsiz xeyli sayda insanı qeydiyyata salıb".
Tapdıq Əhmədovun ölümündən sonra hadisə yerinə gələn hüquq-mühafizə orqanları müxtəlif şəxslərdən izahat alıb. Baş vermiş hadisə ilə bağlı həmin ərazidə olan müstəntiq, Tapdıq Əhmədovun ölməsini yaşı çox olduğuna görə normal şəkildə qəbul edib:
"Həmin vaxt evdə olmamışam. Anam zəng edəndən sonra evə gəlmişəm. Evə gəldiyimdə görüdüm ki, 43-cü polis bölməsinin bütün əməkdaşları bizim həyətdədir. Təcili yardım gəldiyi zaman atam artıq dünyasını dəyişmişdi. Mən şikayətçi olduğunu bildirdim. Binəqədi rayon məhkəməsinə zəng etdilər. Hadisə yerinə müstəntiq gəldi. Hadisəni araşdırmaq üçün meyiti morq apardılar. Müstnətiq hadisə yerinə gəlib deyir ki, atanın 68 yaşı var da, ölməli idi... Müstəntiq mənimlə birbaşa Binəqədi rayon İcra Hakimiyyətinin vəkili kimi danışırdı. Müstəntiq məni izahat almağa aparmışdı. Gördüm ki, Binəqədi rayon DTX-dan iki əməkdaş da gəlib. Onlar mənim qohumlarımdan hadisənin necə baş verdiyini soruşublar. DTX əməkdaşları bildirib ki, bizə hadisəyələ bağlı yanlış məlumat veriblər.
İşi məhkəməyə verəcəm. Bizə ayrılan müstəntiq Binəqədi rayon İcra Hakimiyyətinin vəkili kimi danışır. Hazırda anamın vəziyyəti də pisləşib. Qeyd edim ki, hadisə anında evimizdə işləyən usta da orda olub".
