Lənkəran Ağır Cinayətlər Məhkəməsində xüsusi amansızlıqla qəsdən adam öldürmədə təqsirləndirilən 2011-ci il təvəllüdlü A.Əzizovun cinayət işi üzrə məhkəmə iclası başa çatıb.

Pravda.az-ın əldə etdiyi məlumata görə, hakim Vüqar Qasımovun sədrliyi ilə keçirilən prosesdə hökm oxunub.

Məhkəmənin hökmü ilə A.Əzizov 7 il 6 ay müddətə azadlıqdan məhrumetmə cəzası təyin olunub.

İttihama görə, A.Əzizov 2025-ci il tarixdə Rusiya Federasiyasından Azərbaycana gəldikdən sonra Cəlilabad rayonunda yerləşən nömrəsiz fərdi yaşayış evində dayısı, onun həyat yoldaşı Səidə Cəfərova və digər ailə üzvləri ilə birlikdə yaşamağa başlayıb.

2026-cı ilin may ayının sonlarında və iyunun əvvəllərində təqsirləndirilən şəxsdə cinsi əlaqədə olmaq istəyi yaranıb. O, cinsi tələbatını başqa şəxslərlə təmin edə bilmədiyi üçün birlikdə yaşadığı dayısının həyat yoldaşı Səidə Cəfərova ilə cinsi əlaqədə olmaq istəyib.

A.Əzizov qadına bu barədə təklif edəcəyi təqdirdə onun razılaşmayacağını və baş verənləri ailə üzvlərinə danışacağını düşünüb. Bu səbəbdən əvvəlcə qadınla zorla cinsi əlaqədə olmaq niyyətinə düşsə də, əlverişli şərait olmadığı üçün istəyini həyata keçirə bilməyib.

İttihamda qeyd olunur ki, bu il iyunun 3-də işlədiyi avtoyuma məntəqəsində tərkibində spirt olan pivə içkisi qəbul edən təqsirləndirilən şəxs daha sonra yaşadığı evə gəlib. Həmin vaxt evdə Səidə Cəfərova və onun azyaşlı övladı olub.

A.Əzizov uşağın evin digər otağında, Səidə Cəfərovanın isə mətbəxdə tək qalmasından istifadə edərək qadınla cinsi əlaqədə olmaq istəyini həyata keçirməyə qərar verib. Lakin qadının onun təklifini qəbul etməyəcəyini, zor tətbiq edəcəyi halda isə hadisəni ailə üzvlərinə bildirəcəyini düşünərək onu öldürdükdən sonra cinsi əlaqədə olmaq qərarına gəlib.

Hadisə günü saat 16 radələrində Səidə Cəfərovanın mətbəxdən çıxaraq evin digər otağına keçməsini fürsət bilən A.Əzizov mətbəx bıçağını götürüb və öz otağına qayıdıb.

Bir qədər sonra qadının yenidən mətbəxə getdiyini görən təqsirləndirilən şəxs onun ardınca həmin otağa daxil olub. Gündəlik məişət işləri ilə məşğul olan və arxası ona tərəf dayandığı üçün A.Əzizovun gəldiyini görməyən Səidə Cəfərovaya sağ əlində tutduğu bıçaqla sol bel-böyür nahiyəsindən bir neçə zərbə vurub.

Zərbələrdən sonra ona tərəf dönən qadın yenidən bıçaq zərbələri endirməməsi üçün təqsirləndirilən şəxsə yalvarıb. Lakin o, Səidə Cəfərovanın yalvarışlarına məhəl qoymayaraq bıçaqla qadının bədəninin müxtəlif nahiyələrinə çoxsaylı zərbələr endirməyə davam edib.

İstintaq materiallarında bu hərəkətlərin A.Əzizov tərəfindən xüsusi amansızlıqla törədildiyi, onun qadına əzab və iztirab verdiyini dərk etdiyi göstərilir.

İttihamda qeyd olunur ki, Səidə Cəfərovaya ümumilikdə 11 kəsilmiş-deşilmiş yara yetirilib. Bunlardan üçü həyat üçün təhlükəli olmaqla sağlamlığa ağır zərər vuran xəsarətlər olub.

Qaraciyərin və ağciyərin sol payının zədələnməsi nəticəsində yaranan qanitirmə Səidə Cəfərovanın ölümünə səbəb olub.

Beləliklə, A.Əzizov qadını xüsusi amansızlıqla qəsdən öldürüb.

Hadisədən sonra yeniyetmə ərazidən uzaqlaşıb. Daha sonra o, saxlanılaraq cinayət məsuliyyətinə cəlb edilib.