Son günlərdə Azərbaycan Respublikası Kinematoqrafçılar İttifaqından çox sayda istefalar olduğu iddia olunur. “Yeni Müsavat”a daxil olan məlumata görə, istefa verənlər ittifaqı fəaliyyətsizlikdə ittiham edir. Ən maraqlısı isə qurumu tərk edənlər digər - Rüstəm İbrahimbəyovun rəhbəri olduğu Kinematoqrafçılar İttifaqına üz tutur.
2018-ci ildə də adı çəkilən ittifaqdan çoxlu sayda istefalar olduğu haqda məlumatlar yayılmışdı. O zaman da istefaların səbəbi ittifaqın fəaliyyətsizliyi ilə əsaslandırılırdı.
Xatırladaq ki, Azərbaycan Respublikası Kinematoqrafçılar İttifaqı 2012-ci il 21 iyunda təsis edilib. Qurumun sədri Azərbaycan Respublikasının xalq artisti Şəfiqə Məmmədovadır. İttifaqın təşəbbüs qrupunun və idarə heyətinin üzvləri aşağıdakılardır: Şəfiqə Məmmədova, Mais Ağabəyov, Ramiz Fətəliyev, Müşfiq Hətəmov, Səyavuş Kərimi, Cəmil Quliyev, Yusif Quliyev, Vaqif Mustafayev, Nəriman Məmmədov, Oqtay Mirqasımov, Ayaz Salayev.
Rüstəm İbrahimbəyovun rəhbəri olduğu Kinematoqrafçılar İttifaqına gəldikdə isə, bu qurum 1963-cü il yanvarın 13-də yaradılıb. Rüstəm İbrahimbəyov 1981- ci ilin mayında təşkilatın idarə heyətinin birinci katibi, 2003-cü ilin yanvarında isə sədri seçilib. İttifaqın idarə heyətinin üzvləri aşağıdakılardır:
Xalq yazıçısı Anar, şair Baba Bəziroğlu, Xalq artistləri Rasim Balayev, Həmidə Ömərova, Məbud Məhərrəmov, Şükufə Yusupova, rejissorlar Mirbala Səlimli, Firəngiz Qurbanova, Cavid İmamverdiyev, Oleq Səfərəliyev, Ziya Şıxlınski, Əsəd Əsədov, Cəmil Fərəcov, Tahir Əliyev, Nizami Abbas, prodüser Lalə Əfəndiyeva.
Bəs kinematoqrafçıları Şəfiqə Məmmədovanın ittifaqından qaçaq salan əsl səbəb nədir? Rüstəm İbrahimbəyovun ittifaqına üz tutanların hansı gözləntiləri var?
Məsələ ilə bağlı Azərbaycan Respublikası Kinematoqrafçılar İttifaqını tərk etdiyi deyilən tanınmış aktrisa Münəvvər Əliyevanın mövqeyini öyrənməyə çalışdıq. Aktrisa ittifaqın uzun illərdir ki, heç bir işə yaramadığını dedi:
“Yaxın vaxtlarda 50 yaşım tamam olacaq. Amma adım heç “it dəftərində” də yoxdur. Bu yaşıma qədər o ittifaqdan bir şey görməmişəm. Ona görə də Rüstəm İbrahimbəyovun rəhbəri olduğu ittifaqa yazılmaq qərarına gəldim.
İttifaq nə üçündür? - Aktyorlara dəstək olmaq, onları dəvət etmək üçün. Əgər qurum mənim üçün heç bir iş görmürsə, nə üçün mən nəsə etməliyəm?”
“Rüstəm İbrahimbəyovun rəhbərlik etdiyi qurumdan hansı gözləntiləriniz var?” sualımıza isə aktrisa bu cür cavab verdi: "Bilmirəm. Hər şeyi zamana buraxmışam".
Bir məsələni də xatırladaq ki, 2012-ci ilin sentyabrında bir qrup kino xadimləri Rüstəm İbrahimbəyovun sədri olduğu ittifaqdan çıxaraq, Şəfiqə Məmmədovanın qurumuna üzv olmaq üçün müraciət etmişdi. Onlarən arasında aktrisa Münəvvər Əliyevanın da adı çəkilirdi.
Şəfiqə Məmmədovanın rəhbəri olduğu ittifaqın üzvü olan rejissor Məzahir Həşimov da Rüstəm İbrahimbəyova müraciət etdiyini bildirib: “Əslində ittifaqdan çıxmamışam. Lakin Rüstəm İbrahimbəyovla görüşümdə ona bildirdim ki, kino ilə məşğul olmaq üçün hər iki ittifaqın üzvü olmaq istəyirəm. Mənə bildirildi ki, problem yoxdur, hər iki ittifaqda ola bilərəm".
Rejissor üzvü olduğu ittifaqın fəaliyyətsizliyi haqqında səslənən ittihamlarla razı olduğunu bildirdi:
"İttifaqda dəxlisiz işlər görülür, yəni kino ilə bağlı ortada heç bir iş yoxdur. Əslinə qalsa iki ittifaq heç bir işlə məşğul olmur. Sadəcə indi biri kitab buraxır, biri də məzarların üstünü təmizləyirlər. Nə master-klasslar, nə görüşlər keçirilir. Üzvü olduğum ittifaqı tərk etdim, ya etmədim - bir fərqi yoxdur. Tanıdıqlarımdan heç kəs hələlik digər ittifaqa keçməyib. Ola bilsin ki, nədənsə çəkinirlər və sairə. Yəni, hələlik hər kəs yerində oturub, sayır, nə bir yenilik, nə bir iş yoxdur. Özüm neçə ilərdir ki, artıq ittifaqın qapısını açmıram".
Məsələ ilə bağlı Azərbaycan Respublikası Kinematoqrafçılar İttifaqının mövqeyini öyrənməyə çalışdıq. Qurumun mətbuat xidmətinin rəhbəri Əli Vəliyev iddialara bu cür aydınlıq gətirdi: “Buyursunlar, istənilən adam ittifaqa daxil ola və yaxud çıxa bilər. Biz burada avtoritar rejim qurmamışıq. Yəni, hər kəs seçimində sərbəstdir. Lakin belə bir qayda var ki, digər ittifaqa üzv olan şəxslər bizim ittifaqa üzv ola bilməzlər. Biz oradan çıxış ərizəsi alınmayınca şəxsi ittifaqımıza qəbul etmirik. Lakin onlarda belə bir qayda yoxdur, yəni, kim gəldi quruma daxil edirlər. Hələlik heç kəs ittifaqdan çıxmaqla bağlı istefa ərizəsi verməyib. Kim ittifaqı tərk etmək istəyirsə, gəlib qurumda ərizə yazmalıdır".
Əli Vəliyev ittifaqın fəaliyyətsizli haqqında səslənən ittihamlara da mövqe bildirib: "Bizi fəliayyətsizlikdə necə ittiham edə bilərlər ki, pandemiya şəraiti davam etməsinə baxmayaraq, hazırda “Qarabağ Azərbaycandır” adlı böyük ssenari müsabiqəsi gedir. Bu məsələ yüksək səviyyədə bizə həvalə olunub. Bununla bağlı mətbuatda, mediada elanlar vermişik. Hazırda nəinki Azərbaycanın özündən, hətta xarici ölkələrdən belə ssenarilər gəlir. Həətta çoxsaylı müraciətləri nəzərə alaraq, müsabiqənin vaxtını 1 ay uzatmışıq. Həmçinin vaxtaşırı yubiliyarlarla bağlı tədbirlərimiz olur. Gənc tələbələr üçün təqaüdlər, mükafatlar təsis edirik. Bizi fəaliyyətsizlikdə ittiham edən adamlar bu günə qədər bəlkə nəsə təklif, xahiş ediblər? Biz onları heç bir dəfə də olsun ittifaqda görməmişik".
Qurumun 2012-ci ildən icraçı katibi olan Cəmil Quliyev isə istefalarla bağlı məlumatı olmadığını bildirdi:
"Bu məsələyə gərək katibin özü rəy bildirsin. Çünki kimin istefa verib, çıxdığı barədə məlumatım yoxdur, yəni bu haqda məlumat verilməyib. İttifaqın aparatı ilə əlaqə saxlayıb, kimlərinsə istefa verib-verməməsi ilə maraqlandım. Mənə bildirdilər ki, heç kəs bununla bağlı ərizə yazmayıb. Hər halda bu ittifaq sərbəst qurumdur. Hər kəsin öz fikri, mövqeyi var, kim istəsə çıxa, tərk edə bilər. Əgər başqa ittifaqda onlara yaxşıdırsa, təbii ki, ora gedəcəklər".
Cəmil Quliyev ittifaqın fəaliyyəti haqqında da məlumatsız olduğunu bildirdi:
"Bu haqda da daha yaxşı məlumatı sədr verməlidir. Mən qurumun ictimai əsaslar katibiyəm. Hazırda orada nə baş verdiyindən xəbərsizəm. Aparatdan öyrənmək lazımdır ki, onlar hazırda orada nə işlə məşğuldur, nə edirlər".
