“Biz, Bakı şəhəri, Səbail rayonu, Rostropoviçlər küçəsi, Ev 7-15 ünvanında yerləşən və “Pilot Residence” MTK tərəfindən inşa olunmuş yaşayış binasının mənzil mülkiyyətçiləri mülkiyyət hüquqlarımızın müdafiəsi istiqamətində Sizin iştirakınızı xahiş edirik”.
“AzPolitika” xəbər verir ki, bu barədə sakinlərin Prezident İlham Əliyevə və hüquq mühafizə orqanlarının rəhbərlərinə, Ali Məhkəmənin sədri İnam Kərimova, Dövlət Şəhərsalma və Arxitektura Komitəsinin sədri Anar Quliyevə və Ombudsmana ünvanladıqları müraciətdə bildirilir.
Sakinlər yazırlar ki, binanın tikintisi Səbail Rayonu İcra Hakimiyyətinin (İH) müvafiq Sərəncamı, həmin qurumun 2 iyun, 2017-ci il tarixli, 3/10-497 saylı təsdiqlənmiş rəsmi layihəsinə uyğun həyata keçirilmiş, 30 Yanvar, 2023 il tarixində isə icra hakimiyyəti tərəfindən dövlət qəbulu aktlaşdırılıb. Qeyd olunur ki, mənzil sahibi olaraq mülkiyyət hüquqları Daşınmaz Əmlakın Dövlət Kadastrı və Reyestri tərəfindən “Çıxarış”-larla təsdiqlənib.
Müəlliflər daha sonra yazırlar:
“2019-cu ildən etibarən, hələ inşaat prosesi davam etməkdə olan müddət ərzində, “Pilot Residence” MTK dövlət əlaqələndirilməsi prosesinə riayət etmədən və müvafiq dövlət orqanlarının təsdiqini almadan Səbail RİH-nin 2017-ci ildə təsdiq etdiyi layihədən əhəmiyyətli dərəcədə kənarlaşmalara yol verərək, binamızın həyətində 850 m2 qanunsuz ticarət obyekti və digər qanunsuz tikililər inşa edib. Layihədənkənar qanunsuz tikililərin mövcudluğu Ədliyyə Nazirliyinin Məhkəmə-Ekspertiza Mərkəzi və digər səlahiyyətli dövlət orqanları (FHN-nin Tikinti Təhlükəsizliyi, FHN-nin Yanğına Nəzarəti və s.) tərəfindən təsbit olunmuş, müvafiq rəy və arayışlarla təsdiqlənib. Nəticədə, MTK binada yaşayan bütün sakinlər üçün qarşısıalınmaz maneələr törədib, onların həyat və sağlamlığımızı təhlükə altına atıb.
Şikayətimizin mediada işıqlandırılmasından sonra müvafiq dövlət qurumlarının müdaxilələri nəticəsində 2021-ci ildə qanunsuz tikililərin genişlənməsi dayandırılıb. Mövcud qanunsuz tikililərin ləğv olunması tələbi isə Səbail Rayon Məhkəməsi və Bakı Appelyasiya Məhkəməsi tərəfindən 2023 və 2024-cü illərdəki müvafiq qətnamələrlə tam təsdiqlənib”.
Mükiyyətçilər daha sonra bildirirlər ki, “Pilot Residence” MTK və onun sahibi Babək İsmayılov üçün binanın ərazisində 2019-2021-ci illər ərzində inşa etdiyi bu qanunsuz obyektlər kifayət etmir:
“Belə ki, qonşuluqdakı “Kaspian” MTK ilə birgə binamızın giriş-çıxış yolunda yeraltı tunnel inşa etməklə, qanunsuz tikililəri genişləndirmək səylərindən hələ də çəkinmir. Bu məqsədlə “Pilot Residence” və “Kaspian” MTK-lar dövlət təsdiqli 2017-ci ilin rəsmi layihəsindən və Həyətin Baş Planından əsaslı kənarlaşmaları əsaslandırmaq məqsədilə tamamilə yeni layihələr hazırlayıb. Eyni zamanda güya, FHN-nin “Dövlət Ekspertiza İdarəsindən” 2019 və 2021-ci illərdə dövlət təsdiqi əldə ediblər. Halbuki, nə Şəhərsalma və Tikinti Məcəlləsi, nə də ki FHN-nin daxili qaydalarına görə FHN-nin çoxmərtəbəli yaşayış binaları və ya ərazisində hansısa əsaslı inşaat nəzərdə tutan tikinti layihələrinə dövlət təsdiqi vermək səlahiyyəti mövcud olmayıb və yoxdur. Müraciətimizə cavab olaraq FHN-nin Tikintidə Təhlükəsizliyə Nəzarət Dövlət Agentliyi “Pilot Residence”-in ərazisində hansısa obyekt və ya qazma işlərinin aparılmasına dövlət təsdiqi vermədiyi, əksinə “Pilot Residence” MTK-nın 2019-2021-ci ildəki qanunsuz işlərinə görə FHN tərəfindən ciddi sanksiyalara məruz qaldığı bildirilib. Təəssüflə bildiririk ki, Səbailin icra başçısı Vüqar Zeynalov və onun birinci müavini Vüqar Şixəmmədov həyətimizin yarısını zəbt etmiş mövcud qanunsuz tikililərə bəraət qazandırıb. 2017-ci ilin “Pilot” layihəsi olan “Pilot Residence” yaşayış layihəsinin icraatına məhz yerli icra hakimiyyəti dövlət nəzarəti funksiyasını həyata keçirir. Belə halda təbii sual yaranır, icra başçısı Vüqar Zeynalov və onun aparatı 2017-ci ildə rəsmi təsdiqli layihədən bu qədər kənarlaşmalara necə yol verib?”
Təəssüflə bildiririk ki, yaranmış situasiyanı görməməzliyə vuran, Səbail Rayon İcra Hakimiyyətinin başçısı cənab Vüqar Zeynalov və onun 1-ci müavini Vüqar Şixəmmədov həyətimizin yarısını zəbt etmiş mövcud qanunsuz tikililərə bəraət qazandırıb, onların inşaatına şərait yaratmaqdadır.
2017-ci ilin “Pilot” layihəsi olan “Pilot Residence” yaşayış layihəsi üzrə məhs yerli icra hakimiyyəti icraatına dövlət nəzarəti funksiyasını həyata keçirir. Belə halda təbii sual yaranır: Layihəyə birbaşa nəzarəti həyata keçirən icra başçısı Vüqar Zeynalov və onun aparatı 2019-2021-ci illər ərzində rəsmi təsdiqli layihədən bu qədər kənarlaşmalara necə yol verib?
Diqqətinizə çatdırırıq ki, yaşayış binamız 2023-cü ildə Dövlət Qəbulundan keçdikdən sonra Azərbaycan Respublikası Mənzil Məcəlləsinin tələblərinə tam uyğun şəkildə “Pilot Residence” yaşayış binasındakı mənzil və digər sahə mülkiyyətçiləri Ümumi İclasını keçirməklə, binamızı Mənzil Mülkiyyətçilərinin Müştərək Cəmiyyəti formatında idarəetməsini həyata keçirməyi qərarlaşdırmışıq. Bu məqsədlə Mənzil Mülkiyyətçiləri sırasından binada daimi yaşayan 5 nəfərdən ibarət İdarə Heyəti və 3 nəfərdən ibarət Təftiş Komissiyası formalaşdırılmış, bina idarəetməsini əhatə edən müvafiq sənədlər hazırlanmışdır”.
Sakinlər onu da vurğulayırlar ki, MTK-nın təsisçisi və faktiki rəhbərliyi həyata keçirən Babək İsmayılov bina təsərrüfatının Sakinlərin Təşəbbüs Qrupuna təhvil verilməsindən müxtəlif bəhanələrlə imtina edir:
“Mənzil Məcəlləsinə tam zidd olaraq MTK qanunsuz inşaatların genişləndirilməsi və əsassız kommunal yığımlarını nəzarətində saxlamaq məqsədilə 2023-2024-cü illər sakinlərin adına Mənzil Mülkiyyətçiləri Müştərək Cəmiyyəti yaratmaq niyyətinə düşüb, “Səbail-23” Cəmiyyətinin qurulması barədə mənzil sahiblərinin imzalarını saxtalaşdırmaqla etibarsız protokolu qeydiyyatdan keçirmək üçün Ədliyyə Nazirliyinə bir neçə dəfə təqdim edilib. Belə ki, imzaların əhəmiyyətli qismi mənzil sahibləri tərəfindən atılmayıb, digər bir qisminin etibarsız olduğuna isə ciddi əsaslar mövcuddur. Bəllidir ki, Babək İsmayılovun niyyəti yeni qanunsuz kommersiya tikililəri və binamızın girişndə yeraltı dayanacaqlar üçün qazma işlərinə şərait yaratmaqdır”.
Mənzil mülkiyyətçiləri Səbailin icra başçısından Babək İsmayılovun qanunsuz fəaliyyətinə verdiyi dəstəyi dayandırmasını, Şəhərsalma və Tikinti Məcəlləsi və Mənzil Məcəlləsinin tələblərinə riayət etməyi tələb edirlər.
“Möhtərəm Prezident, pozulmuş hüquqlarmızın bərpa olunması və yaşadığımız binanda qanunsuz tikilərin sökülməsi tələbi ilə bağlı Səbail Rayon Məhkəməsinə sakinlər olaraq iddiaçı qismində müracət etmiş və iddiamız qismən təmin olunmuşdur. Dövlətimizin qanunlarına, ədalətli və müstəqil məhkəmə sistemimizə inanırıq”, - müəlliflər ölkə rəhbərliyinə müraciətdə bildiriblər.
Qeyd olunur ki, Bakı Apellyasiya Məhkəməsinin 2(103)-3511/2024 saylı, 29.08.2024-cü il tarixli qətnaməsindən “Pilot Residence” MTK və MTK-nın təsisçisi və faktiki rəhbərliyini həyata keçirən Babək İsmayılovun atası İsmayılov Əli Museyib oğlu kassasiya şikayətləri veriblər:
“Özbaşınalıq edən MTK-nın rəhbəri Babək İsmayılov qəbul etmək istəmir ki, mənzil sahibləri qanunsuz tikililərin sökülməsini ondan tələb etmək hüququnun sahibdir. Babək İsmayılov hələ də dövlətimizin qanunlarını və ədalət mühakiməsini anlamaq istəmir və başa düşmür ki, biz sakinlərin ümumi istifadəsində olan binanın hər bir sahəsində hüquqlarımıza toxunulan hər hansı bir hərəkətə görə tələb hüququmuz var. Məhkəmə prosesləri ərzində bizim hüquqlamızın pozulması keçirilmiş dövlət ekspertiza rəyləri, dövlət qurumlarının protokolları və rəylərində açıq-aşkar təsdiqlənib.
Son olaraq onu qeyd etmək istərdik ki, Babək İsmayılov bir neçə yerdə bildirib ki, sakinlərin məhkəmədə verdiyi tələbləri Ali Məhkəmədə ləğv elətdirəcək. Çünki Ali Məhkəmənin sədri cənab İnam Kərimov güya onun yaxn qohumudur, onunla yaxın münasibəti var. İnam müəllimin göstərişi ilə bizim iddiamız üzrə çıxarılmış Bakı Apellyasiya Məhkəməsinin 2(103)-3511/2024 saylı, 29.08.2024-cü il tarixli qətnaməsi ləğv olunacaq və o yenidən qanunsuz hərəkətlərini davam etdiricək. Biz təbii ki, belə yalan və boş ifadələrə inanmırıq. Dövlətimizin qanunlarına, ədalətli və müstəqil məhkəmə sistemimizə inanırıq. Babək İsmayılovun danışdığı belə şər və yalan ifadələrin düzgün olmadığını bilirik”.
Sakinlər müraciətin yekununda Prezidentə xitab edərək yazırlar:
“Son çıxışınızda vurğulamışdınız ki, “Xalqımla birliyimiz unikaldır. Mən bilirəm ki, arxamda Azərbaycan xalqı dayanır və xalqımız da bilir ki, mən onun arxasında dayanıram”. Biz tam əminik ki, buğunkü yaranmış vəziyyətdə də siz bizim haqlı və qanuni tələblərimizin müdafiəsində bizə kömək edəcəksiniz. Məktubumuzda qeyd etdiklərimizə əsasən Sizdən artıq dərəcədə xahiş edirik:
“Pilot Residence” MTK və MTK-nın təsisçisi və faktiki rəhbərliyini həyata keçirən Babək İsmayılovun qanunsuz hərəkətlərinə son qoyulmasına;
Ali Məhkəmənin icraatında olan 2 (102)-462/2025 saylı mülki işin nəzarətə götürülərək pozulmuş hüquqlarmızın bərpa olunması və qanuni şəkildə həqiqi Müştərək Cəmiyyətimizi yaradıb, binamızı idarə etmək, hüquqlarımızın reallaşması üçün məsul dövlət orqanı olan Səbail Rayonu İH-nin müvafiq şərait yaratmasına göstəriş verəsiniz.
Qarşı tərəfin mövqeyini işıqlandırmağa hazırıq.
“AzPolitika.info”
