Ermənistan Milli Təhlükəsizlik Xidməti (MTX) Şaki kəndində saxlanılan Azərbaycan ordusunun əsgəri Nəsimi Musayevin Sərhəd Qoşunlarının, yoxsa Silahlı Qüvvələrin mövqelərinin yanından keçməsi barədə suala cavab verməkdən imtina edib.
Teleqraf xəbər verir ki, bu barədə “Sputnik Ermənistan” məlumat yayıb.
Agentlik MTX-dan Musayevin Ermənistan ərazisinə haradan, hansı gün və saatda keçdiyini, həmçinin həmin əraziyə kimin - MTX-nin sərhədçilərinin, yoxsa Müdafiə Nazirliyinin nəzarət etdiyini açıqlamasını istəyib. Həmçinin onun sərhədi necə görünmədən keçdiyi ilə bağlı sual ünvanlanıb.
Qurum bunun “dövlət sirri” olduğunu əsas gətirərək, suallara cavab verməkdən imtina edib. Qeyd olunub ki, Ermənistan MTX tərəfindən açıqlanmasına icazə verilən məlumatlar artıq dərc olunub.
Xatırladaq ki, Azərbaycan Baş Prokurorluğunun mətbuat xidməti oktyabrın 1-də bəyan edib ki, 26 sentyabr 2026-cı il tarixində Nəsimi Musayevin xidmət yerində olmaması və olduğu yerin müəyyən edilməməsi ilə əlaqədar onun axtarışına başlanılıb, Müdafiə Nazirliyi və Fövqəladə Hallar Nazirliyinin aidiyyəti qüvvələri tərəfindən zəruri axtarış tədbirləri həyata keçirilib.
Bununla yanaşı, hadisənin hallarının araşdırılması məqsədilə Hərbi Prokurorluqda müvafiq araşdırma aparılmış və araşdırma nəticəsində Nəsimi Musayevin hərbi hissəni özbaşına tərk etməsinə əsaslı şübhələr müəyyən edilib. Araşdırma zamanı toplanmış materiallar əsasında Hərbi Prokurorluğun İstintaq idarəsində Cinayət Məcəlləsinin müvafiq maddəsi ilə cinayət işi başlanılıb, hazırda iş üzrə zəruri istintaq və digər prosessual hərəkətlər davam etdirilir. Həyata keçirilən tədbirlər nəticəsində Nəsimi Musayevin Ermənistan Respublikasının ərazisində olduğu və həmin ölkənin aidiyyəti orqanları tərəfindən saxlanıldığı müəyyən edilib.
Hazırda Nəsimi Musayevin Ermənistan Respublikası ərazisində olması, saxlanılması, habelə hadisənin digər hallarının aydınlaşdırılması məqsədilə Azərbaycan Respublikasının aidiyyəti dövlət qurumları tərəfindən qarşı tərəfin müvafiq qurumları ilə zəruri təmaslar davam etdirilir. Cinayət işi üzrə istintaqın gedişi və nəticələri barədə qanunvericiliyin tələblərinə uyğun olaraq ictimaiyyətə əlavə məlumat veriləcək.
