Suriyada baş verən son hadisələr, bölgədəki geosiyasi gərginliyin yeni bir mərhələyə keçdiyini göstərir. Xüsusilə PKK/YPG kimi silahlı qruplaşmaların fəaliyyətləri, yalnız yerli təhlükəsizliyə deyil, həm də regional sabitliyə ciddi təhdid yaradır. Suriya xəbər agentliyi SANA-nın məlumatına görə, bu terror təşkilatının üzvləri Hələb şəhərinin Deyr Hafir bölgəsində yerləşən Humeyma və əl-Keyta kəndlərini kiçik çaplı raketlər və artilleriya qurğularından atəşə tutublar. Hücum nəticəsində mülki yaşayış məntəqələri hədəf alınıb. Cavab olaraq Suriya ordusu dərhal qarşılıq verərək terrorçuları susdurub və bölgədə əməliyyatlara başlayıb. Bu cür hücumlar göstərir ki, PKK/YPG problemi artıq nə yalnız Suriyanın daxili məsələsi, nə də sadəcə lokal təhlükə olaraq qiymətləndirilə bilər. Məsələ bütövlükdə regionun sabitliyinə qarşı yönəlmiş transsərhəd bir təhdid olaraq gündəmdə qalmaqda davam edir.
Politoloq Tural İsmayılov Sherg.az-a açıqlamasında Suriyada baş verən bu hadisənin PKK/YPG-nin bölgədə nə sülh, nə də sabitlik amili olmadığını bir daha sübut etdiyini bildirib:
"Bu qruplar Suriyanın suverenliyinə və ərazi bütövlüyünə birbaşa təhdiddir. Hələb kimi strateji şəhərin yaxınlığında hücumlar həyata keçirmək isə açıq təxribat xarakteri daşıyır. Deyr Hafir bölgəsi həm logistika baxımından, həm də Suriya ordusunun nəzarət xəttinə yaxınlığına görə çox həssas bir nöqtədir. PKK/YPG-nin burada mülki yaşayış məntəqələrini hədəf alması, onların “mülki müdafiə” adı altında gizlətdikləri terror mahiyyətini tam üzə çıxarır. SANA-nın məlumatına görə, terrorçular kiçik çaplı raketlər və artilleriya qurğularından istifadə ediblər. Bu isə hücumun planlı və məqsədli olduğunu göstərir. Suriya ordusunun cavab atəşi və sonrakı əməliyyatları bölgədə yenidən balans yaratmaq məqsədi daşıyır. Amma bu, sadəcə lokal əməliyyat deyil. Burada böyük geosiyasi oyun var. Çünki PKK/YPG hələ də ABŞ-nin müəyyən dairələrinin himayəsində fəaliyyət göstərir. Onlara silah, təlim və kəşfiyyat dəstəyi verildiyi faktını heç kim inkar etmir. Bu hadisə həm də Türkiyənin təhlükəsizlik maraqlarına birbaşa toxunur. Ankara uzun müddətdir Suriyanın şimalında belə hadisələrin baş verəcəyini xəbərdarlıq edirdi. Türkiyə üçün PKK ilə YPG arasında fərq yoxdur, hər ikisi eyni terror strukturunun qollarıdır. Suriyanın bu bölgələrində gərginliyin artması həm də Astana prosesi çərçivəsində əldə olunmuş nisbi sabitliyə zərbə vurur".
Politoloq terror aktının zamanlamasının da təsadüfi olmadığını söyləyib:
"Regional qüvvə balansının dəyişdiyi, ABŞ-nin bölgədəki varlığının sorğu-sual edildiyi bir vaxtda bu tip hücumlar “biz hələ buradayıq” mesajıdır. Amma bu mesaj artıq keçmir. Çünki həm Suriya ordusu, həm də Rusiya və İran bu tip təxribatlara qarşı daha sərt mövqe tutmağa başlayıb. Ümumilikdə, Hələbdə baş verən bu hadisə göstərir ki, PKK/YPG problemi nə Suriyanın iç məsələsi, nə də lokal bir təhlükədir. Bu, bütövlükdə regionun sabitliyini hədəfə alan transsərhəd terror infrastrukturudur. Onun kökü kəsilməyincə, nə Suriyada sülh bərqərar olacaq, nə də bölgədə real təhlükəsizlikdən danışmaq mümkün olacaq".
