Milli Şuranın “zoom konfransı”ndan yayılan son video cəmiyyət tərəfindən hiddətlə qarşılanıb. Həmin kadrlarda qurumun Koordinasiya Şurasının üzvü Gültəkin Hacıbəyli bir müddət öncə Azərbaycan neftinin 14 dollara düşdüyü barədə yayılan dezo xarakterli məlumatlara sevinir.
Hətta o, bu xəbəri verdiyinə görə təbrik almaq istəyir: “Gözünüz aydın, neft artıq 14 dollara düşüb, məni təbrik edin”.
Ardınca Amerikada yaşayan MŞ sədri Cəmil Həsənli rişxəndlə bunları deyir: “Bu, son hədd deyil də, yoxsa təbrik edərdim, gözləyək axıracan düşsün, sonra təbrik edərəm”.
Göründüyü kimi, bu qüvvələr neftin kəskin ucuzlaşması nəticəsində xalqın aclıq, səfalət içərisinə düşməsini istəyir və bu yolla iqtidar dəyişikliyi edəcəklərinə ümid edirlər. Onların bu mövqelərinə demokratik düşərgədə təmsil olunan digər qüvvələr də sərt təpki verirlər.
AĞ Partiya başqanı Tural Abbaslı sərt danışdı: “Milli Şuranın məlum zoom iclasının görüntülərinə mən də baxdım. Sözün düzü, xeyli təəssüf hissi keçirdim. Çünki müxalifət olsan belə neftin dünya bazarında kəskin ucuzlaşmasına sevinmək və buna görə təbrik tələb etmək nəinki düzgün deyil, həm etik deyil. Çünki bu gün kimsəyə sirr deyil ki, iqtidarın yürütdüyü yanlış siyasət nəticəsində Azərbaycan iqtisadiyyatı tam olaraq neft gəlirlərindən asılı vəziyyətə düşüb. Və yenə də kimsəyə sirr deyil ki, neftin qiymətinin kəskin ucuzlaşması iqtisadiyyatımızın tamamən çökməsinə, insanlarımızın iş yerlərini itirməsinə, çörəksiz qalmasına səbəb olacaq.
Belə iqtisadi fəlakətə rəğmən hakimiyyətə gəlməyi düşünmək üçün ya ağılsız, ya da kürsü hərisi olmalısan. Nə olursa-olsun, təki mən hakimiyyətə gəlim düşüncəsi qətiyyən yetişkin və vətənpərvər siyasətçi yanaşması deyil. Həm də insan nə qədər dayaz siyasətçi olmalıdır ki, düşünməsin ki, iqtisadi fəlakət dönəmində iqtidara gəlmək olar, ancaq o iqtidarı saxlamaq olmaz. Hələ mən bu qafalı insanların iqtisadiyyatı yenidən dirçəldib, dövləti normal düzənə qaytarmasından danışmıram. Çünki belə düşüncəli fürsətcillərin nəsə bacaracağına inanmıram. Biz, AĞ Partiya olaraq nəyin bahasına olursa-olsun iqtidara gələk düşüncəsinin tam əleyhinəyik və yanaşmanı dövlətə və dövlətçiliyə ziyanlı hesab edirik. Hər hansı bir müxalif qurumun iclaslarının qanunsuz olaraq izlənilməsini və yayılmasını cinayət hesab edirik. Ancaq əgər kiminsə gizli fikir və düşüncələri bu və ya digər formada ictimailəşirsə, onlar da bunun hesabını verməyə hazır olmalıdır. Bu videogörüntülər həmin qurumun və o qurumda təmsil olunan ayrı-ayrı siyasilərin imicinə ciddi şəkildə zərbə vurdu. Bu zədənin bərpasının isə xeyli ağır olacağını, bəlkə də ümumiyyətlə bərpa olunmayacağını düşünürəm”.
ADP sədri Sərdar Cəlaloğlu: “Dünyanın bir çox yerlərində bəzi müxalif qüvvələr ölkədə sosial-iqtisadi vəziyyətin gərginləşməsində maraqlı olurlar. Düşünürlər ki, bu vəziyyət nə qədər gərgin olarsa, insanlar aktivləşər. Halbuki müasir hüquq nəzəriyyələri birmənalı şəkildə sübut edir ki, insanlar sosial-iqtisadi hüquqlarını müdafiə edərkən siyasi hüquqlarından imtina edirlər. Məsələn, mitinqə gəlsəm işdən çıxarılaram, yaxud bu qohumumun başına gələ bilər. Onların düşündüyü kimi, neftin ucuzlaşması nəticəsində sosial-iqtisadi durum lap ağırlaşsa belə istədikləri olmayacaq. Onlar bütün bunları bilmirlər. Çünki nəzəriyyədən xəbərsizdirlər. Ona görə boş-boş şeylərə ümid edirlər. Bu, sadəcə, şüursuzluq əlamətidir. Çox təəssüflər olsun ki, Azərbaycanda bu düşüncəyə sahib qüvvələr var”.
ALDP rəhbəri Fuad Əliyev cavabı daha kəskin oldu: “Milli Şuranın online iclaslarda qurumun rəhbərliyinin küçə söyüşləri ilə danışması onların səviyyəsinin göstəricisidir. Bunlar iclaslarda siyasi, sosial və iqtisadi məsələləri müzakirə etmək əvəzinə, qeybətlə məşğuldurlar. Başqalarını təhqir edirlər. Həyatda heç nəyə nail olmayan biri professoru təhqir edir. Başqası isə universitetdə dərs dediyi bir zaman var idi, tələbələrdən qiymət yazmaq üçün rüşvət alırdı, indi isə xalqa mənəviyyatdan və əxlaqdan dərs deməyə çalışır. Neftin barelinin 14 dollara düşməsi hadisəsi ilə əlaqədar iclasda bir qadın hamını böyük ruh yüksəkliyi ilə Şura rəhbərliyini təbrik etməyə çağırır. ”Rüstəm Şou-Maski Şou"nu davam etdirən professor “yox, qiymət hələ axıra qədər aşağı düşməyib, düşüb başa çatsın sonra təbrik edərəm”- deyir. Bu nə yanaşmadı, bu nə düşüncədir? Böyük bir adı daşıyan Şura, xalqın ümidini elə yaranan gündən puç etdi və xalqın mənafeyinə yox, şəxsi maraqlarına xidmət etdiyini göstərdi".
KXCP İdarə Heyətinin üzvü Xəzər Teyyublu: “Bu gün neft o qədər də ucuz deyil. Amma bu qiymətlərin necə olmasının sadə insanlara bir dəxli yoxdur. Ölkəmiz hazırda təhlükəli pandemiya ilə üz-üzədir. Xalq olaraq, gələcəyi düşünmək zorundayıq. Hakimiyyətə gəlməyin yolu demokratik mübarizə aparan qüvvələrin birləşib, ölkədə azad seçkini təmin etmələrindən gedir. Əks halda, neftin qiymətinin aşağı düşməsi ilə nəyəsə nail olmaq çətindir”.
AMİP katibi Əli Orucov bunu abtallıq hesab edir: “Dünya bazarında neftin qiymətlərinin dəyişməsi siyasi amillərlə bağlıdır. Dünya ağalığı uğrunda gedən mübarizənin nəticəsində dəyişir. Azərbaycanın da neft qiymətlərinin dəyişməsində heç bir rolu yoxdur. Bunlar məlumdur. Lakin dünya bazarında neftin ucuzlaşması Azərbaycanın ziyanınadır və buna sevinənləri anlamaq olmur. Dövlət büdcəsinin çox hissəsi neft-qaz satışından əldə olunan gəlirlərdən formalaşdırılır. Neft ucuzlaşırsa, büdcədə problemlər yaranır və bu da büdcədən maliyyələşən on minlərlə insanımızın ya işsiz, ya da aylarla maaşsız qalması, iqtisadiyyatın və digər bütün sahələrin ciddi çətinliklərlə üzləşməsi deməkdir. Nəzərə almaq lazımdır ki, bu pullardan Azərbaycan vətəndaşı da bəhrələnir. Mən inana bilmirəm ki, neftin ucuzlaşmasına Azərbaycan vətəndaşı sevinsin. Milli Şura mənsublarının bu ucuzlaşmaya gözaydınlığı verməsini abtallıq adlandırardım. Guya neft ucuzlaşanda hakimiyyəti dəyişərək özləri gələ biləcəklər ki? Əksinə, bahalaşmanı arzulamaq lazımdır ki, ölkə əhalisinin maddi rifah halı yaxşılaşsın. Ən pis şərtlərlə hakimiyyətə gəlməyi arzulayanlar böhranda ölkəni necə idarə edə biləcəklər? Müxalifət olaraq məqsəd Azərbaycanın milli və dövləti maraqlarının müdafiəsidir, yoxsa əksinə, öz çıxarları naminə xalqa çətinlikləri arzulamaq. Mən bu cür yanaşmanı qınayıram. Məncə, Milli Şuranın bəzi yetkililərinin neftin ucuzlaşmasından duyduğu şadyanalıq xoş məramdan xəbər vermir və onların özünüifşasından başqa bir şey deyil.
“Yeni Müsavat”
