Bu gün milli azadlıq hərəkatının rəhbərlərindən biri və Azərbaycan Respublikasının ikinci prezidenti (1992-1993) Əbülfəz Elçibəyin doğum günüdür.

Ə.Elçibəy 1938-ci il iyunun 24-də Ordubad rayonunun Kələki kəndində anadan olub. 1957-ci ildə Azərbaycan Dövlət Universitetinin Şərqşünaslıq fakültəsinin ərəb filologiyası şöbəsinə daxil olub. 1962-ci ildə universiteti bitirərək, təyinatla SSRİ Hidrolayihə İnstitutunun Bakı şöbəsində tərcüməçi işləyib. 1963-cü ilin yanvarında Misir Ərəb Respublikasına göndərilən Əbülfəz Elçibəy, 1964-cü ilin okyabrına kimi Asuan bəndinin tikintisində tərcüməçi kimi çalışıb. Xarici ezamiyyətdən dönərək, 1965-ci ildə ADU-nun aspiranturasına daxil olub və aspirantura təhsilini 1968-ci ildə uğurla tamamlayıb.

Ə.Elçibəy 80-ci illərin sonlarında Azərbaycanda başlayan milli azadlıq hərəkatının rəhbərlərindən, Azərbaycan Xalq Cəbhəsinin qurucularından biri olub. 1992-ci ildə Azərbaycan Respublikasının Prezidenti seçilən Ə.Elçibəy 1 il sonra Gəncə hadisələri ilə əlaqədar paytaxtı tərk edərək, Kələki kəndinə gedib. Daha sonra siyasi fəaliyyətini Azərbaycan Xalq Cəbhəsi Partiyasının sədri kimi davam etdirib.

Ə.Elçibəy 2000-ci il avqustun 22-də 62 yaşında Gülhanə Hərbi Tibb Akademiyasında vəfat edib. O, Fəxri xiyabanda dəfn olunub.

Gununsesi.info -ya danışan mərhum prezidentin köməkçisi Əli Mürsəloğlu bu günün onun üçün əlamətdar olduğunu bildirib:

“Hər il olduğu kimi, bu il də bəyi ziyarətə gedəcəm. Onun vətən sevgisi, vətən uğrunda mübarizəsi mənim üçün böyük örnəkdir. Elçibəyin sadəliyi, xalqla ünsiyyəti və millətinə inamı unudulmazdır. O, yalnız siyasi lider deyil, həm də ideoloji sima idi. Millətini sevən və sonadək onun yanında olan bir şəxsiyyət kimi yadda qaldı. Bizim borcumuz onun ideallarını yaşatmaq və gələcək nəsillərə çatdırmaqdır.

Elçibəyin ən böyük arzusu Azərbaycanın tam müstəqil, azad və demokratik bir dövlət kimi möhkəmlənməsi idi. O, milli kimlik, dil və mədəniyyət məsələlərinə xüsusi önəm verirdi. Həyatı və mübarizəsi bugünkü gənclər üçün bir örnək, ilham mənbəyidir. Onun adı Azərbaycan tarixində mübariz, qürurlu və əqidəli lider kimi həmişə hörmətlə xatırlanacaq.

Elçibəyin ideologiyasının əsasında bütöv Azərbaycan və xalqına sevgi dayanırdı. O, xalq üçün fədakarlığı hər şeydən üstün tuturdu. Həmişə Azərbaycanı vahid, parçalanmaz bir dövlət kimi görmək istəyirdi. Müstəqil Azərbaycanın bünövrəsini qoyurdu və bu yolda yorulmadan çalışırdı. Onun ən böyük arzularından biri Türk dünyasını bir görmək, Güneyli-Quzeyli Bütöv Azərbaycan yaratmaq idi.

Əgər Elçibəy bu gün sağ olsaydı, Qarabağın azad olunmasına, o torpaqlara qayıdışımıza sonsuz sevinc və qürurla yanaşardı. Onun ruhu bu zəfərlə yaşayır, idealları isə bu gün də davam etdirilir. Bəy bizim üçün çox böyük bir şəxsiyyət olub. Onun qoyub getdiyi yolun yolçularıyıq və ideyaları bu gün də yaşayır”.

Qeyd edək ki, yaxın günlərdə Əli Mürsəloğlu ilə mərhum prezident Əbülfəz Elçibəy haqqında müsahibəmiz yayımlanacaq.