“RASİM ABDULLAYEV BUNU DESİN GÖRƏK”...
Silahlı Qüvvələrə Demokratik Vətəndaş Nəzarəti Azərbaycan Mərkəzinin sədri, hüquq müdafiəçisi Ələkbər Məmmədovla müsahibə.
- Ələkbər müəllim, siz, Mahmud Tağıyevin polis əməkdaşı tərəfindən aldadılması faktı ilə necə tanış olmuşdunuz?
- Keçmiş polis işçisi Mahmud Tağıyev mənə müraciət etmişdi ki, Daxili işlər orqanlarında çalışan bir neçə şəxs öz vəzifə səlahiyyətlərindən sui-istifadə edərək, qeyri-qanunu yolla işə götürmə və buna bənzər digər hallara yol verirlər. Daha dəqiq desək, o, konkret Bakı Şəhər Baş Polis İdarəsinin kadrlar şöbəsinin rəisinin bu kimi əməllərindən bəhs etmişdi. Mən bununla bağlı bir müddət araşdırma apardım. İctimai araşdırma nəticəsində bəlli oldu ki, həqiqətən də BŞBPİ-nin kadrlar şöbəsinin rəisi Mahmud Tağıyevdən ev alacağı adıyla 15 min dollar pul almış, bir müddət sonra isə onu polis orqanlarında işə düzəltmişdir. Bundan bir müddət sonra isə Mahmud Tağıyev Rasim Abdullayev adlı həmin polis əməkdaşından öz pulunu istədikdə, şöbə rəisi ona deyib ki, bəs, onu polis sistemində işə düzəldib və verdiyi 15 min dollar pul da bu məsələ ilə bağlı haqq-hesab edilib. Bunun ardınca isə Mahmud Tağıyev müəyyən instansiyalara müraciətlər etmişdi. Təbii ki, bütün bu edilən müraciətlər də tamamilə haqlı əsaslara söykənirdi. Çünki, M.Tağıyevdən pul alan şəxs yüksək rütbəli dövlət məmurudu, polis işçisidi. Rasim Abdullayev sıravi şəxs deyil. Vəzifəli şəxsdir. Və vəzifəsindən sui-istifadə edərək, vətəndaşları aldatmaqla məşğuldur. Əlbəttə ki, belə bir halda mütləq onun bu fəaliyyəti haqda yuxarılara, Rasim Abdullayevin rəhbərliyinə şikayət edilməli, onları öz işçilərinin bu cür əməlindən xəbərdar etmək lazım idi ki, rəhbərlik görsün ki, polis orqanlarında işləyən əməkdaşları yerlərdə nə işlərlə məşğuldurlar?!
- Ümimiyyətlə, M.Tağıyevin Rasim Abdullayev barədə DİN rəhbərliyinə və digər orqanlara məlumat verməsinin özündə hər hansı bir hüquqi yalnışlıq varmı?
- Təbii ki, ortaya suallar çıxa bilər ki, nəyə görə, Mahmud Tağıyev o zaman bu borcu notarial qaydada təsdiqlətdirməyib və ya vaxtında məhkəməyə müraciət etməyib?! Bilirsiniz, bu sualların qoyuluşu belə düzgün deyil. Çünki, yenə qeyd edirəm, Rasim Abdullayev yüksək vəzifəli polis nəfəridir. O, mülki vətəndaş olsaydı, bu suallar haqlı ola bilərdi. Ancaq o, vəzifəli şəxs olduğu üçün Mahmud Tağıyev tamamilə haqlı addım ataraq, onun fəaliyyətindən cənab daxili işlər nazirinə şikayət ünvanlayıb. Rasim Abdullayevin törətdiyi əməl sırf cinayət xarakterlidir. Vəzifəsindən sui-istifadə edərək, vətəndaşın külli-miqdarda pulunu mənimsəyib. Mahmud Tağıyev bu məsələni ictimailəşdirənə qədər də müxtəlif orqanlara şikayət edirdi. Ancaq həmin şikayətlər müəyyən orqanlarda ilişib qalırdı və cənab nazirə çatdırılmırdı. Hətta, həmin ərəfədə Mahmud Tağıyevi DİN daxili təhqiqatlar idarəsinə də dəvət edib, məsələ ilə maraqlanıblar. Orda isə Möhübbət Hüseynov bildirib ki, sən ona pul vermisən, o da səni işə düzəldib, əvəz-əvəz olmusunuz. Belə olan halda da bircə yol qalırdı ki, mətbuat konfransı keçirərək, bu məsələni nazirin diqqətinə çatdırılsın. Mahmud Tağıyev də bunu edib.
- DİN rəhbərliyinin bu məsələyə dərhal reaksiya verməsini necə qiymətləndirirsiniz?
- Həqiqətən də, məsələ cənab nazirin diqqətinə çatdırılan kimi, o əmr verdi və BŞBPİ-nin kadrlar idarəsində yoxlamalar aparıldı və aşkarlanan nöqsanlar nəticəsində Rasim Abdullayev, həmçinin, DİN-nin kadrlar idarəsinin rəisi İlqar Əzimov vəzifələrindən azad olundu. Rasim Abdullayev bu hərəkətləri ilə polis orqanlarını ləkələdiyi üçün onun əməllərindən cənab naziri məlumatlandırmaq lazımdı idi. Əsas məqsəd bu idi. Ki, cənab nazir də bunu etdi. Mən, bunu alqışlayıram və cənab Ramil Usubova təşəkkür edirəm.
- Bunun ardınca isə Rasim Abdullayev Mahmud Tağıyevi məhkəməyə verdi...
- Bəli, indi, Rasim Abdullayev onun qanunsuz əməllərindən cənab nazirə məlumat verdiyi üçün Mahmud Tağıyevi məhkəməyə verir, bu haqda yazan qəzetləri təhdid edir. Görün, bu adamlar məhkəmədə nə irəli sürürlər?! Yazılan yazılarda onun şərəf və layaqəti alçaldılıb, guya utanır cəmiyyət içinə çıxmağa, qohumları stress keçirib və s. Cəmiyyət Rasim Abdullayev kimilərin polis sistemində nə oyunlardan çıxdığını yaxşı bilir?! Mən sual vermək istəyirəm ki, əgər Mahmud Tağıyevin gördüyü iş, dediyi sözlər haqsız idisə, nəyə görə, cənab nazir buna reaksiya verdi və sizləri işdə yol verdiyiniz nöqsanlara görə vəzifədən azad etdi?!
Mən Rasim Abdullayevin başqa bir cinayət əməlinə də toxunmaq istəyirəm. Son məhkəmə prosesində o, yenə vəzifəsindən sui-istifadə edərək, hansısa qeyri-qanuni yolla Mahmud Tağıyevin şəxsi işindən çıxarılış etmiş, onun polis sistemindən niyə çıxdığı barədə sənəd gətirmişdilər. Heç bir hüquqi əsası, işlə yaxından-uzaqdan əlaqəsi olmayan bu sənədin məhkəməyə gətirilməsi belə, onu göstərir ki, bu adam hələ də vəzifəsindən sui-istifadə etməklə məşğuldur. Bunun özü belə, ayrıca bir cinayət tərkibi daşıyır. Açıqlasınlar görək, həmin sənədi şəxsi işdən hansı yolla çıxarıblar? Təəssüflər olsun ki, məhkəmə də bu qeyri-qanuni əməllə bağlı bir xəbərdarlıq eləmədi. Bu da onu göstərir ki, yekunda yəqin ki, məhkəmə sifarişli qərar çıxaracaq. Özlərini haqlı çıxarmaq üçün min-bir üsula baş vururlar. Rasim Abdullayevin vəkili məhkəmədə söz atmadığı adam qoymadı qalsın. Bunlar hamısı onu göstərir ki, onlar qorxu içərisindədir.
Mahmud Tağıyevin tərəfindən çıxış edən adamlara danışmağa imkan vermirdilər. Məhkəmədə saxtakarcasına iddia edirdilər ki, Mahmud Tağıyevin polis orqanlarında işləyərkən nöqsanları olub. Buna don geyindirmək üçün də onun şəxsi işindən qeyri-qanuni yolla çıxarış etmişdilər.
- Sizcə, iddiaçı tərəfin dediyi kimi ortada şərəf və ləyaqətin alçaldılması faktı varmı?
- Bilirsiniz, yenə deyirəm, Mahmud Tağıyevin məqsədi Rasim Abdullayevin şərəf və ləyaqətini alçaltmaq olmayıb. Məqsəd o olub ki, cənab nazir bu məsələdən xəbərdar olsun və Rasim Abdullayev öz əməlinin cəzasını çəksin. Ki, nəticədə belə də oldu. Cənab nazir R.Abdullayevi vəzifədən azad etdi. Gətirsin, qoysun ortalığa görək, cənab nazir onu niyə işdən kənarlaşdırıb? “İşdə yol verdiyi nöqsanlar” nələrdən ibarətdir? Bəlkə hansısa sənədin yerini səhv qoyub və ya hansısa arayışı düz yazmamısan?! Necə oldu ki, Mahmud Tağıyev mətbuat konfransı keçirdikdən sonra, cənab nazir bu məsələdən xəbər tutduqdan sonra işdən çıxarıldı?! Açıqlansın, bəlkə elə Mahmud Tağıyevin qabartdığı məsələyə görə cəzalandırıb cənab nazir onu?
Təəssüfverici məqam ondan ibarət ki, polis orqanlarına əməlləri ilə ləkə gətirdiyi üçün cənab Ramil Usubovun əmri ilə işdən azad edilən bu şəxs hələ də polis sistemindən uzaqlaşdırılmayıb. Ona yeni vəzifə vəriblər. Hazırda Bakı Şəhər Dövlət Yol Polisi İdarəsinin analitik şöbəsinin baş inspektoru vəzifəsində işləyir. Mən burdan cənab nazirə müraciət edirəm. Xahiş edirəm, belə adamları ümumiyyətlə polis orqanlarından uzaqlaşdırın. Siz, özünüz polis orqanlarını nümunəvi bir quruma çevirmək istəyirsiniz. Ancaq bu cü əməllərlə məşğul olan adamlar hələ də sistemdə təmsil olunurlar.
- İyulun 2-də Nərimanov rayon Məhkəməsi işlə bağlı qərar verəcək. Sizcə qərar necə olacaq?
- Biz, Azərbaycanda məhkəmə sisteminin necə və hansı şərtlərlə işlədiyini bilirik. Hesab edirəm ki, məhkəmə məsələyə obyektiv baxmayacaq. Əgər Rasim Abdullayev hazırda polis sistemindən kənarda olsaydı, məhkəmənin yekun qərarının ədalətli olacağını düşünmək olardı. Ancaq nəzərə alsaq ki, R.Abdullayev hələ də vəzifədədir, o, müəyyən vasitələrlə məhkəməyə təsir rıçaqlarını işə salmağa çalışacaq. Ancaq məhkəmə prosesində tam mənada sübuta yetirilib ki, iddia tamamilə əssassızdır.
Başqa bir məsələ də var ki, iddiaçı tərəf maddi sübut kimi məhkəməyə bia.az saytında Mahmud Tağıyevin adından dərc olunan açıqlanı təqdim edir. Halbuki, bunun heç bir hüquqi əsası yoxdu. Əvvəla, M.Tağıyev bia.az saytının rəhbərliyinə bununla bağlı müraciət etməyib, ikincisi də, onun buna heç ehtiyacı da olmayıb axı. Mahmud Tağıyev özü bir media qurumunun təsisçisidir. İstəsəydi, təsisçisi olduğu media qurumunda yazardı, deyərdi. Mahmud Tağıyev sadəcə bia.az saytının rəhbəri Südeyif Məcidli ilə şəxsi söhbətlərində bu barədə danışıblar. O isə M.Tağıyevdən xəbərsiz aralarında olan söhbəti öz məqsədi üçün ictimailəşdirib. R.Abdullayev isə bunu maddi sübut kimi məhkəməyə təqdim edir. Onu da nəzərə alaq ki, S.Məcidlinin rəhbəri olduğu saytda əvvələr də belə materiallar verilib və onlar daha sonra buna görə üzr istəyiblər. Məhkəməyə maddi sübut kimi təqdim olunan yazılar da, yəqin ki, bu qəbildəndir.
