"Azərbaycan və Gürcüstanı tarixi uzun əsrlərə dayanan qonşuluq və əməkdaşlıq əlaqələri birləşdirir. Müəyyən tarixi mərhələlərdə iki dövlət arasında müəyyən anlaşılmazlıq və fikir ayrılıqlarına rast gəlinsə də, hər iki xalqın problemlərin həllinə müdrikliklə yanaşması münasibətlərin dinc qonşuluq və birgəyaşayış prinsipləri əsasında davam etdirilməsi ilə nəticələnib".

Bunu Sonxeber.az-a danışan Milli Məclisin deputatı Vasif Qafarov bildirib.

Deputat qeyd edib ki, Azərbaycan və Gürcüstan əlaqələrinin mehriban qonşuluq və strateji əməkdaşlıq prinsipləri üzərində qurulması heç şübhəsiz, hər iki ölkənin, eyni zamanda Cənubi Qafqaz regionunun siyasi-iqtisadi inkişafı baxımından olduqca mühüm əhəmiyyət daşıyır. Azərbaycan hal-hazırda Gürcüstanın etibarlı tərəfdaşı, bu ölkənin əsas enerji təminatçısı kimi çıxış edir. Gürcüstanda istehlak edilən təbii qazın 80 faizi Azərbaycanın payına düşür:

"Gürcüstanda fəaliyyət göstərən Azərbaycan şirkətləri ölkə iqtisadiyyatının inkişafında mühüm rol oynamaqdadırlar. Statistik məlumatlara nəzər salsaq görərik ki, Azərbaycan Gürcüstan iqtisadiyyatına 3,6 milyard ABŞ dolları həcmində sərmayə qoyub.Gürcüstan Respublikasının ərazisində çoxsaylı soydaşlarımızın yaşaması, habelə Azərbaycanın dünya okeanına çıxışını bu ölkə vasitəsilə reallaşdırması iki dövlət arasında münasibətlərin inkişafı üçün möhkəm zəmin yaradan amillərdəndir. Azərbaycan və Gürcüstanın müstəqilliyini bərpa etdiyi ilk dövrlərdə – 1991-1993-cü illərdə ölkələr arasında mövcud olan ənənəvi münasibətlərdə müəyyən dərəcədə durğunluq yaransa da, Azərbaycanda Ulu Öndər Heydər Əliyevin hakimiyyətə gəlməsindən sonra Cənubi Qafqazın bu iki respublikası öz əlaqələrini strateji tərəfdaşlıq səviyyəsinə qədər yüksəltdilər".

Deputat vurğulayıb ki, Prezident İlham Əliyevin hakimiyyəti dövründə isə bu iki qonşu dövlət arasındakı əlaqələr misilsiz dərəcədə inkişaf edib:

"İki ölkə arasında indiyədək 123 sənəd imzalanıb. Keçən əsrin 90-cı illərinin sonlarından başlayaraq Gürcüstan Azərbaycanın uğurlu enerji və infrastruktur layihələrinin həyata keçirilməsində, Azərbaycan neftinin dünya bazarına çıxarılmasında ölkəmizin əsas partnyorlarından birinə çevrildi. Azərbaycan Respublikasının Bakı-Supsa, Bakı-Tbilisi-Ceyhan neft kəmərləri, TANAP layihəsi, Bakı-Tbilisi-Ərzurum qaz boru xətti, Bakı-Tbilisi-Qars dəmir yolu xətti kimi nəhəng layihələrinin əsas iştirakçılarından biri də Gürcüstan Respublikasıdır. Azərbaycan hazırda 11 ölkəyə öz təbii qazını ixrac edir və ixracın həcmi ildən-ilə artır. Keçən il Gürcüstan tranziti vasitəsilə Azərbaycanın qaz icracı 25 milyard kubmetrə çatıb. Hazırda Azərbaycan və Gürcüstan böyük bir coğrafiyanı əhatə edən Orta Dəhliz layihəsinin əsas iştirakçılarındandır. Prezident İlham Əliyevin təbirincə desək "...yenə də Gürcüstanla Azərbaycan burada Avropa və Asiya arasında körpü rolunu uğurla oynayır".

Təkcə coğrafi yaxınlıq və iqtisadi mənafe deyil, eyni zamanda oxşar problemlər də gürcü və Azərbaycan xalqlarını birləşdirən amillərdəndir. Separatçılıq və ərazi bütövlüyünün pozulması kimi təhlükələrlə qarşılaşmış Gürcüstan və Azərbaycan öz hüquqlarını müdafiə etmək üçün bütün beynəlxalq platformalarda birgə çıxış edirlər. Tarixə nəzər salsaq məlum olur ki, hələ 1919-cu ildə iki respublika öz suverenliyi və ərazi bütövlüyünü qorumaq məqsədilə hərbi pakt bağlamış, qarşılıqlı şəkildə bir-birlərinə hərbi-texniki və iqtisadi yardım göstərmişlər. Bir faktı da qeyd etmək yerinə düşərdi ki, 1920-ci ilin aprelində Azərbaycana bolşevik müdaxiləsi təhlükəsinin artdığı şəraitdə Azərbaycan hökuməti kömək üçün məhz Gürcüstana müraciət etmişdi".

Deputat müasir dövrümüzdə də Azərbaycan və Gürcüstan mehriban qonşuluq və dostluq münasibətlərinə sadiq qaldıqlarını dəfələrlə sübut etdiklərini də qeyd edib:

"Hələ 1997-ci ildə hər iki respublika öz qanuni hüquqlarını müdafiə etmək məqsədilə digər dövlətlərlə birgə GUAM blokunu təşkil ediblər. Hər iki dövlət siyasi konyukturadan asılı olmayaraq öz qonşusunun qanuni hüquqlarına və ərazi bütövlüyünə hörmətlə yanaşdığını dəfələrlə sübut edib. 2008-ci ildə Rusiya-Gürcüstan hərbi münaqişəsi zamanı Rusiya ilə dostluq münasibətlərinə baxmayaraq, Azərbaycan Respublikası Gürcüstana mümkün olan diplomatik, siyasi dəstək verdi. Dostluq münasibətlərinə sadiq qalan Gürcüstan hökuməti də 2020-ci ildə öz hava məkanının Ermənistana silah daşıyan təyyarələr üçün bağladığını elan etdi. 2024-cü ilin oktyabrında Gürcüstanda keçirilən seçkilərdə xalqın öz azad iradəsini ifadə etməsi ilə barışmayan bəzi qüvvələrin bu ölkənin daxili işlərinə qarışması müəyyən siyasi gərginliyə səbəb oldu. Həmin zaman Azərbaycan Respublikası gürcü xalqının seçdiyi qanuni hakimiyyəti müdafiə edərək, suveren dövlətin daxili işlərinə qarışmağın yolverilməz olduğunu bütün dünyaya bəyan etdi. Bütün bunlar Azərbaycan-Gürcüstan əlaqələrinin sağlam təməllər üzərində qurulduğunu, dostluq, qardaşlıq və qarşılıqlı hörmət prinsiplərinə əsaslandığını bir daha sübut edir".