"Ermənistanla Azərbaycan arasında uzunmüddətli sülhün bərqərar olması nəinki mümkün, həm də realdır". Bu sözləri Ermənistan Bbaş naziri Nikol Paşinyan “İrəvan dialoqu” ikinci beynəlxalq forumu zamanı deyib. Onun sözlərinə görə, Ermənistan hökuməti sülh gündəmini həyata keçirməkdə qərarlıdır: “Biz bu yola tam sadiqik və bütün regionda vəziyyəti dəyişdirəcək və xalqlarımızın gələcəyinə təsir edəcək sülh müqaviləsi və onu müşayiət edən sənədlərin imzalanması məqsədilə Azərbaycanla danışıqları davam etdirməyə hazırıq”. Paşinyan vurğulayıb ki, Ermənistan sülhün lehinə addımlar atmağa hazırdır. O, hətta mümkün təxribatlar qarşısında belə iki ölkə arasında yeni müharibənin olmayacağına əminliyini ifadə edib: “Bizim yolumuz sülhdür. Ermənistanın məqsədi qonşuları ilə qarşılıqlı hörmət və əməkdaşlığa əsaslanan sabit və aydın münasibətlər qurmaqdır”. Baş nazir əlavə edib ki, əgər Konstitusiya Məhkəməsi Azərbaycanla sülh sazişini təsdiq etməzsə, Ermənistanın əsas qanununa dəyişiklik edilməsi təşəbbüsü ilə şəxsən çıxış edəcək. O vurğulayıb ki, dəyişikliklərin məqsədi ictimaiyyətə təqdim olunacaq: "Məqsəd uzunmüddətli və davamlı sülhə nail olmaqdır. Sazişi Konstitusiya Məhkəməsinə göndərməliyik. Burada seçim yoxdur. Əgər Konstitusiya Məhkəməsi razılaşmanın Ermənistan qanunlarına uyğun olmadığı barədə qərar çıxarsa, o zaman mənim şəxsi mövqeyim ondan ibarətdir ki, mən konstitusiyaya dəyişikliklərlə bağlı təşəbbüs göstərəcəyəm, çünki hesab edirəm ki, sülh bağlamaq fürsətini əldən vermək olmaz". Paşinyan qeyd edib ki, Ermənistan kommunikasiyaların açılması ilə bağlı Azərbaycana konkret təkliflər verib: "Müzakirələr davam edir və Azərbaycanın qərb rayonlarından Naxçıvana daşımaların təşkili (yolların açılması) ilə bağlı Azərbaycana konkret təkliflər verilib". İrəvan hökumətinin başçısı deyib ki, Azərbaycan və Türkiyə ilə yollar açılanda Şimalla Cənub, Qərblə Şərqi birləşdirməyə yeni imkan yaranacaq.
Azərbaycan Xarici İşlər Nazirliyinin mətbuat katibi Ayxan Hacızadə Ermənistan baş nazirinin sözlərinə münasibət bildirib. A.Hacızadə vurğulayıb ki, Nikol Paşinyanın təkrarladığı mövqe, Ermənistanın ərazi iddialarını aradan qaldırmaq üçün Konstitusiyasında dəyişiklik etməyə və sülh prosesindəki mövcud problemlərin həllinə hazır olmadığını nümayiş etdirməklə yanaşı, İrəvanın sülhə sadiqliyi ilə bağlı suallar doğurur. Bundan əlavə, Minsk qrupunun rəsmi olaraq ləğvi barədə çağırışları heçə sayaraq, bunun sülh müqaviləsi ilə əlaqələndirilməsi, Ermənistanın regionun reallıqlarına artıq uyğun olmayan bu köhnəlmiş mexanizmi nə üçün bütün üsullarla saxlamağa çalışdığı ilə bağlı suallar yaradır: "Minsk qrupunun fəaliyyət sahəsi olan münaqişə həll olunduğuna görə, Azərbaycan haqlı olaraq bu qrupun ləğvini tələb edib. Bu addımın təxirə salınması Ermənistanın niyyətləri barədə şübhələri artırır". Ayxan Hacızadə qeyd edib ki, Azərbaycanın maneəsiz tranzit barədə mövqeyi regional əməkdaşlıq və iqtisadi inteqrasiya ilə uyğundur və heç bir şəkildə Ermənistanın suverenliyinə hörmətsizlik kimi qiymətləndirilə bilməz.

Bakı Politoloqlar Klubunun sədri Zaur Məmmədov Sherg.az-a açıqlamasında deyib ki, erməniləri çox yaxşı tanıyan xalq olaraq fərqindəyik ki, Ermənistanı sülhə gətirmək heç də asan olmayacaq. Ekspert vurğulayıb ki, əslində, indi də bunun asan olmadığı görünür:

"İllər boyu torpaqlarımızı zəbt edən, işğalda saxlayan, azərbaycanlıları yurdundan qovan ermənilər bu gün də bizə kin-nifrət bəsləyirlər. Əgər erməni toplumu Azərbaycan xalqına qarşı soyqırımı, qətliam törədibsə, düşmənçilik edirsə, "böyük Ermənistan" xülyası ilə yaşayırsa, son 5 ildə birdən-birə dəyişməsi, sağlamlaşması möcüzə olardı. Son günlər baş verənlər də göstərir ki, Qarabağ erməniləri, separatçılar ötən 5 il ərzində fürsət gözləyiblər. Rusiya-Ukrayna müharibəsi, erməni toplumunun böyük hissəsinin N.Paşinyan ətrafında cəmləşməsi, Qərbə inteqrasiya prosesi separatçıları bir qədər gözlədirdi. Lakin Rusiya Prezident Administrasiyasındakı dəyişikliklər, Ukrayna ilə müharibədə mümkün anlaşma ehtimalı Ermənistan ətrafındakı proseslərin bir qədər dəyişməsinə səbəb olub. Ermənistan Baş naziri Nikol Paşinyan KTMT-ni hər həftə ciddi tənqid edirdi. Qərblə bağlı ağızdolusu danışırdı. Avropa İttifaqına üzvlükdən söz açırdı. Amma sonra Moskvada 9 may paradında iştirak etdi. Halbuki, ötən il Paşinyan Moskvadakı paradda iştirak etməmişdi və belə tədbirləri adətən aşağı səviyyəli rəsmilərlə yola verirdi. Baş nazir anlayır ki, Rusiya Ermənistandakı qüvvələr arasında seçim edəcək. Görünən odur ki, 2026-cı il seçkilərinə kimi Ermənistan daxilində ciddi qeyri-sabitlik hökm sürəcək".

Z.Məmmədovun qənaətincə, 2026-cı ildəki seçkilər sadəcə Ermənistanla əlaqəli deyil:
"Bu seçkilər həmçinin, bölgədə, Ermənistanda Qərbin, yoxsa Rusiyanın nəzarətinin davam etdirəcəyinin müəyyənləşməsidir. Seçkilərdə revanşın davam edəcəyi, yoxsa yeni siyasətin başlanacağı bəlli olacaq. Yeni Konstitusiyanın referendum vasitəsilə xalqa çatdırılıb-çatdırılmayacağı bilinəcək. Belə məqamda Azərbaycan Prezidentinin Minsk qrupu ilə bağlı tələbi heç də təsadüfi deyil. Minsk qrupu ilə bağlı məsələ müəyyən zaman sonra cızığından çıxa bilər. Son illərdə bəlli səbəblərdən bir yerdə olmayan üç həmsədr ölkə - Rusiya, ABŞ və Fransa sabah yenidən bir araya gələ bilərlər. Gülməli səslənsə də, "Qarabağ ermənilərinin qayıdışı" məsələsini Minsk qrupu çərçivəsində qaldıra bilərlər. Ona görə də Azərbaycan tələsir. Paşinyan bilməlidir ki, mütləq şəkildə, tez zamanda sülhlə bağlı öhdəliklərini icra etməlidir. Çünki indiki gedişat Paşinyanın da xeyrinə işləmir. Biz istəyirik ki, qərarı erməni xalqı versin. Əgər bunu referendum yolu ilə edəcəklərsə, köçəryanların, sarkisyanların, ABŞ-nin, Avropanın, Rusiyanın nə deməsindən asılı olmayaraq, heç kəsin Azərbaycana təzyiq etmək üçün de-yure haqqı olmayacaq".