Prezidentin imzaladığı əfv sərəncamı ilə azadlığa çıxanlar arasında ləğv olunmuş MTN-in iki sabiq generalı da var: Akif Çovdarov və Sübahir Qurbanov. Akif Çovdarovun azadlığa çıxması, ardınca villasında əlində badə ilə fotosunun yayılması, daha sonra isə Bakı metrosunun sabiq rəisi Tağı Əhmədovla uzun illərdir davam edən intriqasının gündəmə gəlməsi general Sübahir Qurbanovun personasını kölgədə qoydu.
Musavat.com olaraq bu yazıda Sübahir Qurbanovun həbs edilməsi, ona qarşı irəli sürülən ittihamlar barədə məlumat verəcəyik.
Əvvəlcə Sübahir Qurbanov haqda...
S.Qurbanov 1954-cü ildə Masallı rayonunda anadan olub. 1980-ci ildə Bakı Dövlət Universitetini bitirib. Universiteti bitirdikdən sonra Daxili İşlər Nazirliyində bir sıra vəzifələrdə işləyib, 2004-cü ildən MTN-də şöbə rəisi vəzifəsindən, sonuncu iş yeri olan- Transmilli Mütəşəkkili Cinayətkarlığa Qarşı Mübarizə Baş İdarəsinin rəisi vəzifəsinədək xidmət keçib.
3-cü dərəcəli “Vətənə xidmətə görə” ordeni, “Hərbi xidmətlərə görə” medalı ilə təltif olunub.
Sübahir Qurbanov nə üçün həbs edildi?
Generalın rəhbərlik etdiyi dəstə vəzifəli şəxsləri, iş adamlarını, müxtəlif peşə sahiblərini adam oğurluğu ilə bağlı olmayan qanunsuz azadlıqdan məhrum etmə ilə hədələyib, onlara qarşı zor tətbiq edib pullarını ələ keçirməkdə suçlanırdı.
Ona qarşı Cinayət Məcəlləsinin qanunsuz azadlıqdan məhrum etmə, hədə-qorxu ilə tələb etmə, rüşvət alma kimi ümumilikdə 9 maddəsi ilə ittiham irəli sürülmüşdü.
Həmin cinayət işi üzrə zərərçəkmişlərdən Saleh Səmədov İmişli Rayon İcra Hakimiyyəti başçısının keçmiş müavini, Standartlaşdırma, Metrologiya və Patent üzrə Dövlət Komitəsinin İmişli ərazi sınaq və sertifikatlaşdırma şöbəsinin müdiri idi.
O deyib ki, 2003-cü ildə “Araz” MMC-ni təsis edib və az sonra cəmiyyətin istehsal müəssisəsi - İmişli konservləşdirilmiş şirələr və konyak zavodu işə düşüb. Onu MTN-ə çağırıb şirkətin vergidən yayındığını deyiblər, həbs olunmamasından ötrü 1 milyon dollar pul istəyiblər. O da 300 min dollar verməyə razılaşıb.
Digər zərərçəkmiş Ağaisa Mahmudov isə “Bakı Telefon Rabitə” İstehsalat Birliyinin keçmiş rəhbəri Beytulla Hüseynovun (sabiq MTN naziri Eldar Mahmudovun qohumudur və hazırda həbsdədir) villasını aldığına görə MTN-ə çağırıldığını bildirib. MTN-də ona saxta aksiz markalarından istifadə etdiyi deyilib və əvvəlcə bu məsələyə görə 50 min manat alınıb.
S.Qurbanov həmçinin Rabitə və Yüksək Texnologiyalar Nazirliyinin Aparat rəhbəri olmuş Vidadi Zeynalovdan aylıq paket almaqda da təqsirləndirilirdi.
General bu ittihamları qəbul etməsə də, məhkəmə bütün bu ittihamların sübuta yetirildiyi qənaətinə gələrək onu 14 il müddətinə azadlıqdan məhrum etdi.
Bundan sonra Sübahir Qurbanov və digərlərinin işi Bakı Apelyasiya Məhkəməsində davam etdi. İlk dəfə bu cinayət işi üzrə məhkəmə iclası jurnalistlərin iştirakı ilə baş tutdu.
Həmin məhkəmədə Sübahir Qurbanovun müavini, polkovnik Füzuli Əliyevin ifadəsi ölkədə böyük rezonans doğurdu. F.Əliyev dövlət təşkilatlarının büdcə vəsaitlərini adı olub, özü olmayan şirkətlər, bu iş üzrə peşəkarlaşan dəllallar vasitəsilə dağıdılması və başqa məsələlərdən danışmışdı.
Həmin məhkəmə iclasında Füzuli Əliyev gəmi təmiri ilə məşğul olan “Techmarine LTD” MMC-nin təsisçisi Arif Həsənovu “əməkdar zərərçəkmiş” kimi təqdim edərək sözlərinə belə davam etmişdi: “Arif Həsənov Hərbi Dəniz Qüvvələrinin sabiq komandanı Şahin Sultanovun üzünə durdu, prokurorluğun bir müstəntiqini işdən çıxartdırdı. Belələrinin sözü ilə dövlətinə, xalqına xidmət eləmiş zabiti şərləmək... Nə bilim vallah. Biz özümüz də sifarişli işlərdə sübut bazası yaratmaq üçün əlimizdə olan mənasız adamlardan, Arif Həsənov kimilərdən istifadə edirdik, bizə qarşı da elə elədilər”.
Polkovnikin bu sözlərindən sonra məhkəmə iclaslarının qapalı keçirilməsi ilə bağlı qərar verildi. Bu ifadə MTN zabitlərinə, generallarına qarşı irəli sürülmüş ittihamların bir qismini qəti olaraq sübuta yetirirdi.
Sübahir Qurbanova daha bir ağır ittiham...
Sübahir Qurbanovun adı daha bir qalmaqallı işdə keçirdi. Dövlət Bayrağı Meydanı İdarəsinin sabiq rəisi Rəşad Məmmədovun həbsi ölkədə böyük səs-küyə səbəb olan hadisələrdən biri idi. Onun MTN tərəfindən həbs edildiyi deyilirdi.
Rəşad Məmmədovun cinayət işi üzrə məhkəməsi davam edən ərəfədə MTN ləğv edildi. 1 ildən artıq həbsdə qalan Rəşad Məmmədov məhkəmə zalından azadlığa buraxıldı.
MTN ləğv edilən zaman məlum oldu ki, Sübahir Qurbanov Eldar Mahmudovun göstərişi ilə Zabil Salmanova zor tətbiq edərək Rəşad Məmmədovun əleyhinə ifadə alıb.
Generalın qohumlarının həbsi...
Sübahir Qurbanov həbs edildikdən sonra onun iki qohumu barəsində də cinayət işi açıldı.
Generalın bacanağı Müsənnif Talıbov Cinayət Məcəlləsinin 312-ci (rüşvət vermə) və 178-ci (dələduzluq) maddələri ilə ittiham edilərək 4 il azadlıqdan məhrum edildi.
O, qonşusuna qarşı dələduzluq etməkdə günahlandırılırdı.
Bu iş üzrə Sübahir Qurbanovun digər qohumu Elçin Qurbanov da həbs edilib.
Elçin Qurbanov Bakı Şəhər Prokurorluğunun Təşkilat-analitik şöbəsinin böyük mütəxəssisi-dəftərxananın sabiq müdiri olub. Elçin Qurbanov 4 il 6 ay müddətinə azadlıqdan məhrum edilib.
O, dələduzluqda ittiham edilir. Qurbanov həbsdə olan şəxsin adını əfv siyahısına saldıracağını vəd edərək dələduzluq etməkdə günahlandırılıb.
“Yeni Müsavat”
