"Deyilənə görə, Azəriqazda vəzifə pillələrini qalxmağın da öz bazar qiyməti var. Mühəndis olmaq istəyirsən — bir qiymət, böyük mühəndis olmaq istəyirsən — başqa qiymət, xidmət rəisi olmaq istəyirsən — artıq cibinin də rəis səviyyəsində olması lazımdır..." "DİA-AZ" xəbər verir ki, bunu özünün sosial şəbəkə hesabındakı paylaşımında SOCAR Azəriqaz İstehsalat Birliyinin işçisi Daşqın Abbasov qeyd edib.

Narazı SOCAR işçisi müraciətində belə davam edir: "Əlbəttə, bunlar qeyri-rəsmi məlumatlardır. Amma belə söhbətlər dolaşırsa, deməli, ortada ən azı cavablandırılmalı suallar var.

Görünür, bəzi yerlərdə diplom, savad, təcrübə və illərlə çəkilən zəhmət karyera üçün kifayət etmir. Deyəsən, bunların yanına daha bir ixtisas əlavə olunub: maliyyə imkanlarına uyğun vəzifə seçimi!

Çilingər işləyirsən, mühəndis olmaq istəyirsən? Nə gözəl! Özünü inkişaf etdirmək əvəzinə, deyilən qiymətə uyğunlaş. Böyük mühəndis olmaq istəyirsən? Buyur, növbəti tarifə keç. Xidmət rəisi olmaq istəyirsən? Təbriklər, artıq idarəetmə bacarığından əvvəl maliyyə dayanıqlığın yoxlanıla bilər!

Bəs illərini işə həsr edən, öz sahəsini dərindən bilən, Vətən uğrunda sağlamlığını riskə atan, müharibə veteranı olan, Prezidentin medalları ilə təltif edilən əməkdaş nə etsin?

Ona deyirlər:

— Vakansiyanı izlə!

Nə qədər müasir yanaşmadır! İnsan Vətəni qoruyur, illərlə əmək sərf edir, təcrübə toplayır, amma karyera qurmaq üçün ən vacib bacarığı gözləməyi öyrənmək olur. Bəlkə, gələcəkdə vakansiyaları izləmək üçün ayrıca ştat da açıldı? Təbii ki, o vəzifənin də öz dərəcəsi, öz tələbi, bəlkə də öz qiyməti olar!

İndi gələk Ağsu Regional Qaz İstismar İdarəsinin Kommersiya şöbəsinə.

Orada 12-ci dərəcəli böyük mühəndis vəzifəsi niyə vakansiyaya çıxmır?

Bu vəzifəyə ehtiyac yoxdur? Ştat doludur? Yoxsa vakansiyanın elan edilməsini zəruri edən şərtlər hələ yetişməyib?

Bəlkə də hər şey tam qanunidir. Elədirsə, bunu izah etmək çox asandır. Şəffaflıq olan yerdə sual təhlükə deyil, cavab isə problem yaratmır.

Amma əməkdaşlar arasında vəzifələrin qiyməti barədə söhbətlər dolaşırsa, bir vəzifə uzun müddət vakansiyaya çıxmırsa, zəhməti və təcrübəsi olan insanlar irəli çəkilmədiklərini düşünürlərsə, deməli, aydınlığa ehtiyac var.

Görəsən, həmin 12-ci dərəcəli böyük mühəndis vəzifəsi vakansiyaya çıxsa, namizədlər biliklərinə görə yarışacaqlar, yoxsa bizə məlum olmayan başqa meyarlar da var?

Yoxsa o vəzifə elə bir sirli xəzinədir ki, xəritəsi yalnız seçilmiş adamlardadır?

Kim bilir... Bəlkə, vəzifə satılmayıb, sadəcə elan olunmaq üçün növbəsini gözləyir. Maraqlıdır, görəsən, növbənin özü də vakansiyaya çıxacaqmı?

Bir həqiqət var: müəssisədə vəzifələr əməkdaşların biliyinə, təcrübəsinə, məsuliyyətinə və peşəkarlığına əsasən bölüşdürülməlidir. Əgər kimsə bunun əksini düşünürsə, şəffaf seçim mexanizmi bütün şübhələrə son qoya bilər.

Çünki Vətən uğrunda xidmət edən veteranın qarşısında qapılar bağlanır, vəzifələrin bazar qiyməti barədə isə söz-söhbətlər dolaşırsa, burada ən azı bir məsələ ciddi şəkildə araşdırılmalıdır.

Əməkdaşın zəhmətinin qiyməti olmalıdır, vəzifənin gizli qiyməti yox!

..

Ağsu Regional Qaz İstismar İdarəsinin rəhbərliyindən soruşmaq istərdim: Kommersiya şöbəsinin 12-ci dərəcəli böyük mühəndis vəzifəsi hansı səbəbdən vakansiyaya çıxarılmır? Həmin ştat üzrə seçim meyarları nələrdir? Əməkdaşların bu suallara aydın cavab almaq hüququ yoxdurmu?

Axı şəffaflıqdan qorxan heç nə yoxdur. Əgər hər şey qaydasındadırsa, cavab verin, məsələ bitsin. Yox, əgər sistemdə problem varsa, onu da bilmək lazımdır.

Çünki vəzifə kreslosu kiminsə şəxsi mülkü deyil, əmək isə kiminsə cibinin qalınlığına görə ölçülməməlidir!.."