Koronavirusa yoluxma sayı bütün dünyada arta bilər, bunu kimsə inkar etmir, lakin ölkələrin, onların səhiyyə orqanlarının mübarizə üsulları bir-birindən kəskin fərqlənir.
Xüsusən inkişaf etmiş və tibbi sığortası olan ölkələrdə karantin şərtləri, testlərin sayı bizimlə müqayisə belə oluna bilməz. Biz sanki Somaliyik.
Bu nöqteyi-nəzərdən Səhiyyə Nazirliyi və TƏBİB Azərbaycanda əhalini fəlakətin astanasına yaxınlaşdırıb, ölkəni uçurumun həddinə çatdırıb.
Amma çox təəssüflə müşahidəmizi qeyd etməyi zəruri bilirik ki, çoxunun obyektivliyinə, nisbətən plüralizmə, fikir müxtəlifliyinə yer verdiyinə inandığı İctimai Televiziya (İTV) bu qurumlara qahmar çıxır.
Belə ki, İTV-də yayımlanan “Sabaha saxlamayaq” verilişində aparıcılar sözügedən orqanları elə müdafiə edirlər, süddən çıxmış ağ qaşıqdırlar.
Anaxeber.info məlumat verir ki, İTV-çilər Səhiyyə Nazirliyinin və TƏBİB-in gərgin iş rejimində çalışdığını əsaslandırmağa çalışırdılar.
Onların sözlərinə görə, hər iki struktur həddindən artıq yüklənib, çağırışları çatdıra bilmir, guya SN və TƏBİB bunu etiraf da edirlər.
Efirə qonaq çağırılan həkim Qalib Əsədov isə real faktlarla aparıcıları da, hər iki tibb qurumunu da mat qoymağı bacarır.
Həkimin sözlərinə görə, əvvəla SMS sistemi mənasız qərardır, ikincisi, apteklərdə antiviral dərmanları çatışmır, şok terapiyası yaşanmaqdadır.
Amma bu istiqamətdə heç bir iş görülmür, tələbat ödənmir, dərmanlar lazımı qədər verilmir, vətəndaşlar apteklərdən ümidsiz qayıdırlar.
Bununla belə İTV-nin aparıcıları problemi malalamağa, TƏBİB və SN-nə qahmar çıxmağa çalışırlar. Sanki pandemiyanın yaratdığı bu problemin günahı müvafiq strukturlarda deyil, Azərbaycan vətəndaşlarındadır.
Digər mühüm problem isə testlərin sayının defisitliyi ilə əlaqədardır. Daha doğrusu, buna çatışmazlıq yox, hazırlıqsız vəziyyətə düşmək, hesablanmamış addım atmaq deyilməlidir.
Çünki yay mövsümündən həyəcan təbili çalınır, deyilirdi “payız dalğası” gəlir, qışa hazırlaşmaq lazımdır. Ancaq məlum olur ki, testlərin sayı lazımı qədər deyil. Üstəlik, testin cavabı bir neçə gün sonra gəlir.
Bu müddətdə xəstənin vəziyyəti ya pisləşir, ya da sağalmağa doğru gedir, o halda testin nəticəsinin əhəmiyyəti qalmır. Həkim Q.Əsədov onu da efirdə açıqlayır ki, Belarusla Azərbaycanın əhalisi sayca eynidir.
Amma dost ölkədə 4 milyon insan test verib, bizdə isə cəmi 1,6 milyon insandan test götürülüb. Üstəlik, onlarda 1200, Azərbaycanda 1700 nəfər infeksiyadan ölüb.0
Buna baxmayaraq, İTV-nin xanım aparıcısı yenə malalayır; bütün dünyanın sərt karantin keçdiyini arqument gətirməyə çalışır, TƏBİB-lə SN-nin çağırışların çox olması səbəbindən çatdıra bilmədiyini, bu iki işəyaramaz qurumu qorumağa can atır. Halbuki, test sayının az olmasının məsuliyyətini məhz adıçəkilən orqanlar daşıyır.
Anaxeber.info yazır ki, beləliklə, pandemiya tüğyan edir, əvəzində isə apteklərdə antiviral dərmanlar çatışmır, test sayı yetərli qədər deyil, ən əsası cavablar çox gecikir, evlərdən edilən çağırışlara operativ reaksiya verilmir, bu gedişlə yoluxma daha kəskin xarakter ala bilər, ölkə İtaliyanın vəziyyəti ilə qarşılaşmaq həndəvərinə çatıb, İTV isə günahı xalqda axtarır.
Günahı xalqda axtaran telejurnalistlər yaxşı olar ki, elə həmkarlarının yazdıqlarına, başlarına gələnlərə də nəzər salsınlar. Məsələn, APA-nın baş direktoru Vüsalə Mahirqızının sözlərinə görə, bir neçə gün əvvəl koronavirus testi verib:
“Bu dəfə həm yaxma, həm də qandan test elətdirdim. Qan testinin nəticəsində göründü ki, mən əvvəl koronavirusa yoluxmuşam, amma yaxma da pozitiv oldu.
Heç bir əlamət yox, hər şey normal, ailə üzvlərinin test nəticələri neqativ, üstəlik qan testinə görə hazırda yaxma test cavabı pozitiv çıxa bilməz. Yenidən test elətdirdim, bu dəfə cavab neqativ oldu. Testləri qarşılaşdırdılar və s.
Yekun qərara gəldilər ki, test cavabı neqativdir, mən koronavirusa yoluxmamışam. Bunu da TƏBİB-in sistemində əks etdirdilər”.
Bir sözlə, tamamilə rüsvayçılıq. Bu biabırçı testlərlə vətəndaşların başlarına oyun açırlar, ancaq İTV bu orqanları müdafiə edir.
V.Mahirqızı əlavə edir ki, karantinlə bağlı icazə almaq lazım olanda məlum olur icazə alına bilməz, çünki “koronavirus xəstəsiyəm”
Jurnalist soruşur: “Niyə TƏBİB-in sistemindəki sonuncu məlumat deyil, testin cavabının müsbət çıxdığı məlumat əsas götürür?
ASAN-ın İcazə portalı APİ ilə məlumatı çəkirsə, yenilənmiş məlumatı niyə çəkmir?
Testin səhv nəticəsinə görə mən niyə 14 gün təcrid olunub, işimdən gücümdən qalmalıyam? Kim verib bu haqqı bu adamlara?
TƏBİB bu 5 gün ərzində niyə məni bir dəfə axtarmayıb, koronavirus xəstəsi olmağım barədə məlumat niyə telefonuma, emailimə gəlməyib?
Niyə bir zəng belə olmayıb? Cavab var: çünki testin neqativ cavabını əsas götürüblər. Yaxşı bəs icazə almaq lazım olanda niyə testin müsbət cavabını əsas götürürlər?
Bəs polis yoxlanışı hansı sistem əsasında aparır? Əgər yoxlanış TƏBİB sistemi əsasında aparılırsa, orda mən koronavirus xəstəsi deyiləm, buna görə də polis məni saxlayıb yoxlamayıb.
Bəs axı mən bu 5 gündə xeyli adamı yoluxdurmuş oluram. Bunun məsuliyyətini kim çəkəcək, ey TƏBİB? Və sonuncu sual: ümumiyyətlə, siz nə iş gördüyünüzü bilirsiniz, ey TƏBİB?”
Bu suallar ritorikdir, çünki cavabını xalq da, İTV də, biz də, TƏBİB də yaxşı bilir - onlar nə iş gördüklərini özləri belə bilmir...
Onlar milləti hansı faciə ilə üz-üzə qoyduqlarını qəbul etmək istəmirlər. Üstəgəl, əhalinin izolyasiya şəraitində hansı psixoloji çətinliklər yaşadıqlarını, maddi problemlərlə üzləşdiklərini düşünmürlər.
Bu mövzuda “Yeni Müsavat”ın əməkdaşı, koronavirusa yoluxmuş Məğrur Salmanov xəstəliyin neçəyə başa gəldiyini yazıb.
“Premium klinikasında korona qan testi 50 manat, rentgen 40 manat, həkim qəbulu 40 manat. Qanda laxtalanma analizi, ümumi analiz 20 manat, 5 ədəd 16 manatlıq “Clocsin” antibiotik 80 manat, evə gələn tibb bacısı 11 sistem - 110 manat, vitaminlər və koronavirusa aid dərmanlar...
Nəhayət, ringer və natri xlor mayesi 160 manat, bunu ödəmək iqtidarında olmayanlar nə edir? Bir evdən bir neçə nəfər xəstələnəndə isə fəlakət. Sosial şəbəkələrdə gördüm, kredit götürüb, müalicə olunanlar var. Allah milləti qorusun, xəstələrə şəfa versin”.
Jurnalist Əli Rəis qeyd edib ki, defisiti 36 orqanın fəaliyyətinə mənfi təsir edən “D” vitamini əksər apteklərdə ya tapılmır, ya da çox bahadır:
“Yayda çimərlikləri bağlamaqla vəziyyəti pisə doğru çəkdilər. Araşdırmalarda qeyd edilir ki, loru dillə ifadə etsək, bina evlərində yaşamaq insan orqanizminə xeyli mənfi təsir edir.
Söhbət təkcə covid 19-a yoluxmadan getmir. Təbiətə məxsus olan insanın evə qapadılması əlavə problemlər deməkdir. Ona görə də dünyada qapatmağa çox da meyl etmirlər... Ümid vaksinə və qızmar Günəşədir”.
Bütün bu problemləri bizə yaşadan, ölkəni İtaliyanın, İspaniyanın gününə qoyan isə TƏBİB-lə SN-dir.
Anaxeber.info
