Siyəzən rayonunda sosial problemlər bitib-tükənmək bilmir. Rayondakı mötəbər mənbələrdən aldığımız məlumatlara görə, Siyəzən İcra Hakimiyyətinin başçısı Arif Qasımovun imza atdığı bir sıra xoşagəlməz işlər yerli əhalinin narazılığına səbəb olub. Mətləbə keçməmişdən öncə qısaca bildirək ki, Arif Qasımov 1965-ci ildə Naxçıvan Muxtar Respublikasının Şərur rayonunda anadan olub. O, Azərbaycan Dövlət İqtisad İnstitutunu iqtisadçı və Naxçıvan Dövlət Universitetini hüquqşünas ixtisasları üzrə bitirib.
Əmək fəaliyyətinə başladıqdan sonra müxtəlif vəzifələrdə, o cümlədən Naxçıvan Muxtar Respublikası dövlət əmlakı nazirinin köməkçisi, Binəqədi Rayonu İcra Hakimiyyəti başçısının Biləcəri qəsəbəsi üzrə nümayəndəsi, Nizami Rayonu İcra Hakimiyyəti başçısının Keşlə qəsəbəsi üzrə nümayəndəsi vəzifələrində işləyib. İcra hakimi vəzifəsinə təyin olunana qədər isə Nizami Bələdiyyəsinin sədri olub. Arif Qasımov prezidentin 19 iyul 2011-ci il tarixli sərəncamı ilə Siyəzən Rayon İcra Hakimiyyətinin başçısı təyin olunub. Mənbənin verdiyi məlumatda deyilir ki, Arif Qasımov Siyəzənə icra başçısı təyin olunandan sonra rayonda çoxsaylı sosial problemlər baş qaldırmağa və yerli məmurların özbaşına əməllərinin sayı artmağa başlayıb: "İlk növbədə, onu demək istəyirəm ki, icra başçısı bu vaxta qədər vətəndaşlarla normal münasibət qura bilməyib. Yerli idarə və müəssisələrin rəhbərləri vətəndaşlara qarşı haqsızlıq edirlər. Bundan narazı qalan insanlar başçı ilə görüşüb problemlərini ona danışmaq istəsələr də, buna nail ola bilmirlər. Çünki Arif müəllim hansısa problemlə bağlı onunla görüşmək istəyən şəxsləri qəbul etmir. İkincisi, son illər ərzində rayon ərazisində nəzərəçarpacaq quruculuq-abadlıq işləri aparılmayıb. Daha doğrusu, başçı prezidentin rayonun sosial-iqtisadi inkişafının sürətləndirilməsi məqsədilə ayırdığı külli miqdarda vəsaiti başqa-başqa işlərə sərf edərək Siyəzənin bərbad vəziyyətə düşməsinə zəmin yaradıb. Mərkəzi küçələr istisna olmaqla, kəndlərdə yolların vəziyyəti həddən artıq acınacaqlıdır. Bələdiyyələr üzərlərinə düşən işin öhdəsindən lazımi səviyyədə gələ bilmirlər. Buna baxmayaraq, rayon rəhbəri həmin bələdiyyələrin rəhbərlərini danlamır. Vətəndaşları narahat edən əsas problemlərdən biri də səhiyyə sistemindəki çatışmazlıqlarla bağlıdır. Belə ki, Siyəzən rayonunun səhiyyə şəbəkəsinin tabeliyindəki tibb ocaqlarında xoşagəlməyən işlər cərəyan edir. Dövlət büdcəsindən hər il güzəştli kateqoriyadan olan xəstələrin pulsuz dərman preparatları ilə təmin olunması üçün Siyəzən Rayon Mərkəzi Xəstəxanasına irihəcmli vəsaitlər ayrılır. Lakin başçının müdaxiləsi ilə bu vəsaitlərin müəyyən hissəsi təyinatdan kənar işlərə sərf edilir. Təhsil və mədəniyyət sahəsində də vəziyyət eynidir. Ümumiyyətlə, rayonda büdcə hesabına maliyyələşən nə qədər qurum varsa, onların rəhbərləri başçının bəzi maraqlarını təmin edirlər". Arif Qasımovun üç illik fəaliyyəti dövründə saysız-hesabsız qanun pozuntularına yol verdiyini deyən mənbə qeyd etdi ki, adıçəkilən məmur bunun nəticəsində rayonda böyük biznes şəkəbəsi yaradıb: "Məndə olan məlumata görə, onun bir neçə ferması, üzlük daş sexləri və digər ticarət obyektləri var. Başçı rayonda təmir-bərpa işlərinə lazım olan tikinti materiallarını və üzlük daşlarını özünə məxsus obyektlərdən aldırır. İcra hakiminin həmçinin Bakıda da bəzi obyektlərinin və bir neçə mənzilinin olduğu deyilir. Rayon camaatı isə böyük məhrumiyyətlər içərisində yaşayır. Siyəzəndə ölkənin müvafiq qanunları yox, yalnız başçının dediyi sözlər keçərlidir. Büdcədən ayrılan vəsaitlərin hara və necə xərclənməyindən heç kimin xəbəri yoxdur. Bu vaxta kimi görülən abadlıq işləri konkret sahibkarların pulu ilə olub. Başçının yaxın adamları, konkret olaraq müavinləri iş adamlarına deyir ki, filan işi görməlisən vəssalam. Sahibkarın ixtiyarı nədir ki, icra hakiminin göstərişinə əməl etməsin. Əks halda, Arif Qasımov həmin sahibkarların fəaliyyət göstərməsinə imkan vermir. Problemlərdən biri də torpaqların bölünməsi ilə bağlıdır. Başçı ayrı-ayrı sakinlərin istifadəsində olan torpaqları qeyri-qanuni şəkildə başqalarına satır. Ki, bu da narazılıq hallarının artmasına səbəb olub". Mənbənin sözlərinə görə, Siyəzəndə təmir-bərpa işlərinin görülməsi üçün keçirilən tenderlərin bir çoxunda icra hakiminə yaxın olan şirkətlər qalib gəlir: "Bir neçə faktı diqqətinizə çatdırmaq istəyirəm. Rayonun Məşrif yolunun təmiri üçün dövlət büdcəsindən 1 milyon 961 min manat pul ayrılmışdı. Mənim bildiyimə görə, bu yolun təmirinə cəmi 356 min manat vəsait sərf olunub. Yerdə qalan pulun isə hansı ünvana getdiyi məlumdur. Başçı Siyəzəndə YAP-ın binasının tikinti-təmir işlərini özünə yaxın olan "Exiles-STS" şirkətinə həvalə edib və nəticədə şəxsi büdcəsini xeyli genişləndirib. Problemlər saymaqla bitən deyil. Hazırda rayonda demək olar ki, hər sahədə problem var. İcra hakimi isə vətəndaşları narahat edən problemlərin həlli üçün heç bir iş görmür". Biz mənbənin söylədiyi fikirlərin həqiqətə uyğun olub-olmadığını tam əminliklə deyə bilmərik. Hər halda, vətəndaşlar problemlə üzləşməsəydi, başçının qanunsuz əməllərindən şikayət etməzdi. Yəqin ki, hörmətli Arif müəllim bu tənqidlərdən sonra özbaşına əməllərindən əl çəkəcək və vətəndaşların qayğısına qalacaq. Növbəti saylarımızda icra başçısının paytaxtın Nizami rayonu ilə bağlı planları və tələbə oğlunun kübar həyat tərzi ilə bağlı şok faktları ortaya qoyacağıq. Bizi izləməyi unutmayın. \\ gundelik-baki \\
