SAKİNLƏRİ DİNLƏYƏN YOXDUR
DİA.AZ: - Bakıda tikinti şirkətlərinin özbaşınalığı barədə mətbuatda ardıcıl məlumatlar dərc olunmaqdadır. Müəyyən qüvvələrə arxayın olaraq ölkədə tikinti şirkətləri təsis edən bir qrup şəxslər insanları aldatmaqla, qanunsuzluq etməklə məşğul olur. Bu da sonda insanların zərər çəkməsilə nəticələnir. Ya insanlar aldadılır, ya yaşayış binasına yaxın həyətyanı sahələri zəbt edir, yaşıllıq zolaqlarını qanunsuz olaraq məhv edir, sakinlərə təzyiqlər göstərir və sair.
Bu cür tikinti şirkətlərinin rəhbəri adı ilə fəaliyyət göstərən şəxslər barədə mediada kifayət qədər faktlar var. Belə şirkətlərdən biri də Bakının lap mərkəzində, Səbail rayonu ərazisindəı peyda olub. Bu barədə DİA.AZ-a Səbail rayonunun Badamdar qəsəbəsi, Tofiq Məmmədov küçəsi 1 və 3 saylı binanın sakinləri müraciət ediblər. Sakinlərin dediyinə görə, adıçəkilən binalarda 24 ailə yaşayır. Uzun illərdir ki, həmin ailələr iki binanın həyətini qoruyub saxlayıb, coxillik ağaclar əkiblər. Bina sakinləri həmin həyətdə əməlli-başlı park salıb. Sakinlər deyirlər ki, parkda onlarla böyük ağaclar var: “Şəhərdə hamı bilir ki, nəfəs almaq çətinləşir. Badamdar qəsəbəsi isə sürüşmə zonasıdır. Bu məqsədlə özümüz, bina sakinləri ərazini abadlaşdırıb park yaratmışıq. Səbail rayon İcra Hakimiyyəti də bu parkın abadlaşmasında sakinlərə bəzi yardımlar edib. Buradakı bu park təkcə iki binanın deyil, digər binaların da sakinlərinin istirahət yeridir. Binanın uşaqlarının oynaması üçün yeganə yer bu park kimi düzəltdirdiyimiz həyətdir. Parkın ərazisi 5-6 sota yaxındır. Parkda sakinlərin hesabına uşaqların əylənməsi, yaşlı insanların asudə vaxtlarını keçirməsi üçün şərait də yaradılıb. Bir neçə binanın sakinləri asudə vaxtlarını burada keçirir, uşaqlar bu parkda əylənirlər. Neçə illərdir ki, parkda sakinlər hər il öz hesablarına cari təmir işləri də aparırlar ki, park sıradan çıxmasın. Amma, bu il, iki ay öncə park hansısa məmurun gözünə gəlib”.
Şirkət parkın ərazisini zəbt etmək istəyir
Sakinlər deyirlər ki, bu il iyun ayının 6-da bir qrup naməlum şəxs əraziyə gələrək parkı hasarlayıb. Məsələdən xəbər tutan sakinlər həmin şəxslərin hərəkətləri barədə maraqlananda işçilər bildiriblər ki, guya onlar Səbail rayon İcra Hakimiyyətinin əməkdaşlarıdır və park təmirə bağlanır. Həmin şəxslər bildiriblər ki, guya parkda əsaslı təmir işləri aparılandan sonra yenidən bina sakinlərinin istifadəsinə veriləcək. Sakinlər əvvəlcə icra hakimiyyətinin bu hərəkətini alqışlayıb və onlara dəstək verəcəyini bildiriblər. Amma sonradan məlum olub ki, parkı hasarlayan şəxslər icra hakimiyyətinin işçiləri deyil. Sakinlərin araşdırması zamanı məlum olub ki, həmin şəxslər parkın yaxınlığında 3 sot torpaq sahəsi alan “Dəli dağ” tikinti şirkətinin sahibi Ələddin adlı şəxsin fəhlələridir və o parkın ərazisini zəbt etmək üçün rayon icra hakimiyyətinin adından isitifadə edir . Məsələdən xəbər tutan sakinlər dərhal həmin şəxsləri ərazidən uzaqlaşdırıb və hasarları söküb: “ Bizi aldatmaq istəsələr də, mümkün olmadı. Araşdırdıq və məlum oldu ki, həmin Ələddin adlı şəxs özünə məxsus 3 sot ərazidə hündürmərtəbəli bina inşa etdirmək istəyir, amma həmin əraziyə onun istədiyi layihədə bina tikmək mümkün deyil. Ona görə də, bizim həyətdəki yeganə istirahət parkını zəbt etmək qərarına gəlib”.
Narazılıq edən sakinlər ölümlə hədələnir
Sakinlər deyirlər ki, “Dəli dağ” şirkəti bu özbaşınalığı gecə vaxtlarında etmək qərarına gəlib. Amma, hələlik onların bu hərəkəti də baş tutmayıb. Sakinlərin sayıqlığı nəticəsində şirkət işçilərinin parkı sökmək niyyətləri növbəti dəfə boşa çıxıb: “Bir gün axşam saatlarında baxdıq ki, həmin şəxslər parkdakı oturacaqları maşınlara yığırlar, parkı gecə sökmək istəyirlər. Bina sakinləri hamısı ayağa qalxdı və onları ərazidən yenidən qovduq. Amma, bununla da sakitləşmirlər”.
Sakinlər deyirlər ki, “Dəli dağ” şirkətinin rəhbəri sonda sakinlərə hədə-qorxular gəlməyə başlayıb. Şirkət rəhbəri Ələddin adlı şəxs bu yolla sakinləri susdurmaq istəyir: “Ələddin indi də bizi təhqir edir, ailəmizi hədələyir, kişiləri oğurlayıb öldürəcəyini deyir. Bir neçə gün əvvəl bizim həyətə gəlib bildirdi ki, burada narazılıq edən ailədəki cavanların başını kəsdirəcək. Həyətə gələndə küçə söyüşləri ilə bizi təhqir edir və bildirir ki, guya həmin ərazini alıb. Amma, bizə sənəd təqdim etmir”.
Park satılmadığı halda şirkət rəhbəri yalan danışır
Sakinlər məsələ ilə bağlı Bakı şəhər İcra Hakimiyyətinə, Səbail rayon İcra Hakimiyyətinə, əraziyə cavabdeh olan mənzil istismar sahəsinə müraciət ediblər. Amma, icra hakimiyyətləri bildiriblər ki, həmin ərazi satılmayıb və binaların həyətyanı parkı kimi qeydiyyatdadır. Ələddin adlı şəxs isə sakinləri hədələməklə məşğuldur.
Sakinlər deyirlər ki, Ələddin adlı bu şəxsin özbaşınalığına rayonun aidiyyəti qurumları da müdaxilə edə bilmir. Mənzil İstismar Sahəsi sahə müvəkkilinin üzərinə atır, sahə müvəkkili isə bələdiyyənin. Amma, heç kim bu özbaşına şirkət rəhbəri barədə tədbir görmək istəımir.
Prezidentə müraciətdən sonra proses nəzarətə götürülüb
Sakinlər DİA.AZ-a deyirlər ki, onlar məsələ barədə prezident İlham Əliyevə, Ekologiya və Təbii Sərvətlər Nazirliyinə, Ombudsman Elmira Süleymanovaya və digər aidiyyəti qurumlara müraciət edərək parkın zəbt olunmasının qarşısının alınmasını xahiş ediblər. Prezident Administrasiyasının müdaxiləsindən sonra Ombudsman Aparatı və Ekologiya və Təbii Sərvətlər Nazirliyi parkı nəzarətə götürüb. Amma, buna baxmayaraq, Ələddin adlı şəxs sakinlərə təzyiqlər edir. O hətta sakinləri mənzillərinin pəncərələrini bağlamaqla və ölümlə hədələməkdə davam edir.
