DİA.AZ: - Bir neçə gün öncə "Aqrolizinq" ASC-də baş verən misli-bərabəri olmayan korrupsiya faktları barədə məlumat vermişdik. Məlumatlarda bildirilirdi ki, kənd təsərrüfatı naziri İsmət Abbasov yaxın adamları vasitəsilə bu sahəyə ayrılan vəsaitləri mənimsəməklə özünə sərvət toplamaqla məşğuldur. Təbii ki, bu mənimsəmələrdən nazirin yaxın adamları da külli miqdarda gəlir əldə edirlər. Belə məmurlar sırasında kənd təsərrüfatı naziri İsmət Abbasovun "sağ" əli kimi tanınan, "Aqrolizinq" ASC-nin İdarə Heyətinin sədr müavini Elçin Mirzəyevin də adı keçir. Məlumatlara görə, Elçin Mirzəyev tək kənd təsərrüfatı məhsullarının istehsalçılarına əkin sahəsinin becərilməsində istifadə edilən yanacaq və mator yağlarından il ərzində dövlətin bu sahəyə ayırdığı milyonlarla vəsaitləri mənimsəyir. Kənd təsərrüfatı məhsullarının istehsalı üçün sərf olunan yanacaq və motor yağlarının dəyərinin orta hesabla 50 faizi dövlət tərəfindən ödənilirməsinin təmin edilməsi üçün dövlət büdcəsindən ayrılması nəzərdə tutulmuş vəsait hesabına istehsalçılara hər hektar əkin sahəsinin və çoxillik əkmələrin becərilməsinə görə (istehsal etdiyi məhsulun növündən asılı olmayaraq) 40 manat məbləğində yardım verilməsi müəyyən edilir. Lakin Elçin Mirzəyevin həmin yardımları su içmək kimi mənimsəyir. Şişirdilmiş rəqəmlər hesabına aparılan hesabatlarda "Aqrolizinq" ASC-nin sədr müavini vəsaitin verilməsi qaydaları və şətlərinə əl gəzdirir. Proses təxminən belə baş verir. İstehsalçıların siyahısını tərtibi zamanı analoqu olmayan rəqəmlər göstərilir. Bundan sonra istehsalçıların becərdikləri hər hektar əkin sahəsinə və çoxillik əkmələrə görə dövlət büdcəsindən ayrılan pullar mənimsənilir. Ümumiyyətlə isə dövlət büdcəsindən hər il kənd təsərrüfatı məhsullarının istehsalı üçün sərf olunan yanacaq və motor yağlarının ödənilməsinin təmin edilməsi üçün 80 milyon manat pul ayrılır. Amma həmin milyonlar təyinatı üzrə xərclənmir. DİA.AZ bildirir ki, bu barədə 30gun.az portalı xəbər yayıb.
Bundan başqa daxil olan digər məlumatlarda isə qeyd edilirdi ki, taxıl yığımı dövründə yaranmış kombayn böhranını aradan qaldırmaq üçün kənd təsərrüfatı naziri İsmət Abasov Maliyə Naziri Samir Şərifova əlavə vəsaitlərin ayrilmasi üçün müraciət edib. Maliyə nazirinin İsmət Abasovla münasibətləri gərgin olduğundan, o, əlinə düşmüş imkandan istifadə edərək kənd təsərrüfatı nazirinə tutarlı zərbə vurur. Maliyyə naziri Samir Şərifov dövlət başçısı İlham Əliyevə müraciət edib ki, kənd təsərrüfatına ayrılan vəsaitlər imkan verirdi ki, bütün ehtiyaclar ödənilsin. Maliyə naziri müraciətində xüsusi vurğulayıb ki, Kənd Təsərrüfatı Nazirliyinə ayrılmış subsidiyalar, digər vəsaitlər mənimsənilir, təyinatı üzrə xərclənmir. İlham Əliyev də maliyyə nazirinin müraciətinə əsaslanaraq yoxlama təyin edib. Yoxlama Maliyyə Nazirliyinə həvalə olunub. Aparılan araşdırmalar nəticəsində külli miqdarda korrupsiya faktları üzə çıxıb. Akt tərtib edilib, materiallar Respublika Prokurorluğuna göndərilib. Mütəxəssis kimi bu araşdırmaya cəlb olunmuş Kənd Təsərrüfatı Nazirliyinin texniki nəzarət şöbəsinin baş məsləhətçisi Faiq Bayramov İsmət Abasovun göstərişi ilə aktı imzalamaqdan imtina edib və təcili məzuniyyətə göndərilib. Nazir İsmət Abasov faktları ört-basdır etməyə çalışır. Çünki bu korrupsiya faktlarının onun özünə gedib çıxacağından ehtiyat edir. Məlumatlarda həmçinin bildirilirdi ki, külli miqdarda mənimsəmələrə yol vermiş Şəki “Aqroservis” xidmətinin rəhbəri Rasim Qurbanovdan, onun qardaşı, Şəki ərazi kənd təsərrüfatı idarəsinin rəisi Cavanşir Qurbanovdan, “Aqrolizinq” ASC sədrinin müavini Elçin Mirzəyevdən işdən çıxarılmaları ilə bağlı ərizələri alınıb. Lakin nazir İsmət Abasov onlarin əmrlərini verməyə tələsmir, prokurorluğun araşdırmalarının sonunu gözləyir.
Məlum olduğu kimi, dövlət başçısı İlham Əliyev 4 iyul 2013-cü ildə Kənd təsərrüfatı məhsulları istehsalçılarının kənd təsərrüfatı texnikası ilə təminatına əlavə dəstək haqqında sərəncam imzalayıb. Sərəncama əsasən taxılçılıqla məşğul olan kənd təsərrüfatı məhsulları istehsalçılarının bu il taxılyığan kombaynlara ehtiyacını təmin etmək üçün 2013-cü ilin dövlət büdcəsində nəzərdə tutulmuş prezidentinin ehtiyat fondundan “Aqrolizinq” Açıq Səhmdar Cəmiyyətinə 15 milyon manat ayrılıb.
Avqustun birinci dekadasında ölkədə taxıl biçini yekunlaşıb. Bu, o deməkdir ki, istehsalçı şirkət kombaynları sərəncam imzalandığı gündən göndərsə belə, yenə də bu ilin taxıl biçininə çatmayıb. Bu halda “kombaynların nə üçün alınması” sualı aktuallaşıb. 30gun.az məsələ ilə bağlı kiçik bir araşdırma aparıb.
Kənd Təsərrüfatı Nazirliyindəki mənbələrdən 30gun.az-a daxil olan məlumata görə, sərəncamda məhz bu ilin qeyd edilməsi nazir İsmət Abbasovun səyi nəticəsində baş verib. Çünki kombaynlar gələn il üçün nəzərdə tutulsaydı, satınalmalar tender yolu ilə həyata keçirilməli idi. Ancaq bu il üçün nəzərdə tutulduğundan vaxt çatışmazlığını əsas götürüb kombaynların tendersiz alınmasına qərar verilib. Bununla da İ.Abasov dövlət başçısı İlham Əliyevi aldatmış olub. Tendersiz satınalmalarda korrupsiya imkanları isə çox genişdir. Konkret faktlara keçək.
Araşdırmalarımız zamanı məlum olub ki, sözügedən kombaynların hazırda “Aqrolizinq” ASC-də qiyməti 112 min manatdır. Ancaq eyni markalı və eyni texniki göstəriciləri (125 at gücü) olan kombaynları ASC 2012-ci ildə 71 min manata lizinqlə satmışdır. Gördüyü kimi, 1 ilə qiymətlər 58 faiz qiymət bahalaşıb.
“Aqrolizinq” ASC isə bahalaşmanın səbəbini "yuxarılara" belə izah edib ki, 2012-ci ildə satılan kombaynlar Azərbaycana Yaponiya hökumətinin qrantı hesabına gətirilib. Bununla bağlı tender Yaponiyada keçirildiyindən qiymət ucuz olub. Bu il satılan kombaynlar isə, büdcə vəsaiti hesabına alınıb. Ona görə də qiymətlərdə 58 faiz artım olub.
Taxılyığan kombaynların istehsalçısı olan Finlandiyanın “Sampo Rosenflyu” şirkətinin məlumatına görə, ötən ildən indiyəcən taxılyığan kombayn qiymətlərində cəmi 2 faiz qiymət artımı olub. Belə olan halda onda görəsən niyə Azərbaycanda kombaynların qiyməti son 1 ildə 58 faiz bahalaşıb. Məlumatlara görə, “Sampo Rosenflyu” şirkəti birbaşa heç bir alıcıyla alış-veriş etmir. Satışları yalnız yerli distributorlar vasitəsilə ilə həyata keçirib.
“Sampo Rosenflyu” şirkətinin Azərbaycanda rəsmi distributoru Aydın Əzimov adlı bir şəxsdir. Bu məlumat istehsalçının internet səhifəsində də göstərilib (http://www.sampocomia.fi/world-dealers/?lang=en). Aydın Əzimovun kimliyini müəyyənləşdirmək üçün araşdırma zamanı bəlli oldu ki, A.Əzimov “Aqrolizinq” ASC-nin sədr müavinidir və İ.Abbasovun inanılmış adamlarından biri sayılır. Taxılyığan kombaynları isə o, Panamada qeydiyyatdan keçmiş İsmət Abbasova məxsus offşor şirkət vasitəsilə, istehsalçıdan alıb, qiymətləri 55-58 faiz şişirdərək “Aqrolizinq” ASC-yə satır. Bu, artıq təkzib olunmaz korrupsiya faktıdır.
Beləliklə, İ.Abbasovun kombaynların tendersiz alınmasına üstünlük verməsinin səbəbi aydınlaşır. Söhbət büdcə vəsaitlərinin offşor şirkətlər vasitəsi mənimsənilməsindən gedir.
Sadə hesablamalar aparsaq görərəik ki, 15 milyon manat yeni kombaynların alınmasına vəsait ayrılıb. 71 min manatdan hesablasaq bu pula 211 kombayn almaq olardı. Ancaq şişirdilmiş rəqəmlərlə bu pul 134 kombayn alınacaq. Rəqəmləri şişirtməklə 3 milyon manatdan çox vəsait aqrar sektor boslarının cibinə axır.
Son olaraq qeyd edək ki, İsmət Abbasovun "Aqrolizinq" maxinasiyaları bununla yekunlaşmır. 30gun.az-a bu sahədə baş verən total korrupsiya əməliyyatları barədə ilginc məlumatlar daxil olub. Məlumatlarda Maliyyə Nazirliyinin Kənd Təsərrüfatı Nazirliyinə "Kapital Bank" ASC-nin əsaslandırılmış sifarişi əsasında hər il dövlət büdcəsindən kənd təsərrüfatı məhsullarının istehsalı sahəsinə ayrılan milyonlarla vəsaitin mənimsənilməsi halları barədə geniş məlumat verəcəyik.
Araşdırmalarımız davam edir. Bizi izləyin...
