Xəbər verdiyimiz kimi, ölkə başçısı yanvarın 14-15-də Şuşa şəhərində səfərdə olub, erməni işğalından azad edilən şəhərin tarixi məkanlarını gəzib, bir çox məsələlərlə bağlı ciddi mesajlar səsləndirib. Səfər əsnasında Üzeyir Hacıbəyovun, Bülbül və Xurşidbanu Natəvanın güllələnmiş heykəlləri də Şuşaya aparılıb, öz əzəli yerinə qoyulub.
Moderator.az olaraq millət vəkili Məşhur Məmmədovla söhbətimizdə ölkə başçısının Şuşa səfəri və bu səfər haqqında səsləndirdiyi bəzi mesajları şərh etməyə çalışdıq.
-Məşhur müəllim, öncə ölkə başçısının Şuşa şəhərinə tarixi səfəri ilə bağlı düşüncənizi bilmək istərdik. Sizcə bu səfərin ölkəmiz, onun bu günü və gələcəyi ilə bağlı önəmi nədən ibarətdir?
-Prezidentimizin Şuşa səfərini hər şeydən öncə “Qarabağ Azərbaycandır” şüarına qoyulan əməli nida kimi dəyərləndirmək mümkündür. Hansı ki, ilk gündən ölkə başçısı bütün beynəlxalq konfranslarda məhz bu şüarla çıxış edib. Bu, həm də bizim Şuşaya – Qarabağımıza qayıdışımızın başlanğıcıdır.
Şuşaya edilən bu səfər ölkə başçısının tariximizə, mədəniyyətimizə olan sevgi və qayğısının təzahürü idi. Bu səfər zamanı dahi şəxsiyyətlərimizin güllələnmiş heykəlləri əvvəlki yerinə qoyuldu, bu heykəllərin erməni vəhşiliyinə məruz qalması, işğalçıların insanlarla yanaşı, heykəllərə də divan tutması faktına yenidən diqqət çəkildi. Odur ki, bu səfər, həm də dünyaya bir mesaj idi.Hər zaman erməniləri müdafiə edən, onlara görə dünyanı ayağa qaldıran qüvvələrə, dövlətlərə ünvanlanan bu mesajın mahiyyəti ondan ibarət idi ki, görün siz necə vəhşi, barbar, mədəniyyət və sivilizasiyadan tamamilə uzaq bir toplumu müdafiə edirsiniz. Bir toplum, bir cəmiyyət ki, cansız heykəllərə belə güllə atır, onlara divan tutmağa çalışır, bu toplumun hansı mədəniyyətindən, hansı insani dəyərindən danışmaq olar?
Cənab prezident Şuşa səfərində dönə-dönə vurğuladı ki, bura Azərbaycanın mədəniyyət paytaxtı, islam dünyasının mədəniyyət mərkəzidir.
Ölkə başçısı Şuşadakı hər bir binanın qarşısında dayanıb onların hər birini xüsusi diqqətlə nəzərdən keçirdi, ürək yanağısı ilə Şuşanın keçmişi və gələcəyi ilə bağlı fikirlərini dilə gətirdi. Prezident İlham Əliyevin Şuşa səfərindən, orada səsləndirdiyi mesajlardan hər bir azərbaycanlı böyük qürur hissi keçirdi.
-Sizə bu səfər Şuşanın abadlaşdırılmasına, dirçəldilməsinə də öz töhfəsini verəcəkmi?
-Bəli. Hər kəs əmin ola bilər ki, prezidentimiz, dövlətimiz Şuşanın yenidən abadalaşması, onun bərpası və inkişafı üçün əlindən gələni edəcəkdir. Bununla da dünyaya Şuşamızın timsalında qədim, zəngin mədəniyyət ocağını yenidən qazandıracağıq.
Təbii ki, Şuşanın, Qarabağın, Qarabağ ətrafındakı rayonlarımızın inkişafı, tərəqqisi ümumilikdə dövlətimizin inkişafına, onun güclənməsinə, beynəlxalq aləmdəki nüfuzunun daha da artmasına səbəb olacaq.
-Ölkə başçısı “güllələnmiş heykəllər”lə bağlı maraqlı bir fakta toxundu və qeyd etdi ki, ermənilərin bu heykəlləri əridib metal kimi satmaq niyyəti olub. Məhz ümummili lider Heydər Əliyevin müdaxiləsindən sonra bu heykəllər ermənilərdən alınıb.
Sizcə ermənilərin büstləri, heykəlləri belə əridib satmaq niyyəti onların sivilizasiyadan uzaq toplum olduğunu göstərməklə yanaşı, Heydər Əliyevun bu heykəlləri düşməndən alması onun tariximizə, mədəni irsimizə olan sevgi və ehtiramının daha bir isbatı kimi dəyərləndirilə bilərmi?
-Şübhəsiz. Bizim üçün o heykəllər hər şeydən öncə mənəvi dəyərdir. O heykəllər bizim mədəniyyətimiz, ruhumuz, Qarabağımızın səsi, nəfəsidir. O heykəllər bizim üçün Bülbülün səsi, Üzeyirin bəstəsi, Xurşidbanu Natəvanın sözüdür. Bu səbəbdən də bu heykəllər bizim üçün çox qiymətlidir. Ermənilər üçün isə bu heykəllər sadəcə, metal parçasıdır. Çünki onların tarixi, mədəniyyəti yoxdur. Onların hər şeyi – tarixi də, musiqisi də, mədəniyyəti də, incəsənəti də, mətbəxi də, arxitekturası da oğurluqdur. Ermənilər sivilizasiyadan məhrum toplum olduqları üçün, bu cür dəyərlər onlara yaddır.
Ermənilər özlərini dünyaya xristian dininin təmsilçiləri kimi tanıtmağa çalışır. Məscidləri bir kənara qoyaq, ermənilərin kilsələrə olan münasibəti belə onların xristianlıqdan – dini dəyərlərdən uzaq olduğunu göstərir.
Heydər Əliyevin ruhu Azərbaycan xalqının tarixindən, mədəniyyətindən yoğrulub. Heydər Əliyev Azərbaycanın ruhu, zəngin mənəvi-mədəni dəyərləri ilə böyüyüb. Üzeyir bəy də, Bülbül də, Xurşidbanu Natəvan da digər böyük şəxsiyyətlərimiz kimi Heydər Əliyev üçün mənəvi sitimul, ruh və enerji mənbəyi idi. Onların hər biri Heydər Əliyev üçün Azərbaycanın bir parçası, onun bir hissəsi idi. Heydər Əliyev Azərbaycanı bu böyük şəxsiyyətlərsiz təsəvvür etmirdi. Ona görə də bu heykəlləri xilas etmək üçün düşmənlə danışığa getdi. Bu, ulu öndərin tariximizə, mədəniyyətimizə, dövlətimizə, xalqımıza, dəyərlərimizə olan sevgi və ehtiramından irəli gəlirdi. Bunu ancaq Heydər Əliyev kimi böyük bir şəxsiyyət edə bilərdi.
-Məşhur müəllim, son günlərin ən çox diqqət çəkən olaylarından biri ölkə başçısının fərmanı ilə Medianın İnkişafı Agentliyinin yaradılması oldu. Hansı ki, Vətən Müharibəsi, bu müharibə zamanı ölkə başçısının xarici KİV-lərə verdiyi müsahibələr medianın nə qədər önəmli olduğunu bir daha sübut etdi. Bu baxımdan söyləmək olarmı ki, Medianın İnkişafı Agentliyinin yaradılması milli maraqlarımızın, informasiya təhlükəsizliyimizin media müstəvisində, informasiya platformasında daha effektiv müdafiəsinə şərait yaradacaq?
-Vətən Müharibəsi zamanı düşmənlə yalnız hərbi müstəvidə mübarizə aparılmadı. Bu mübarizə həm də informasiya platformasında, diplomatiya müstəvisində - bütün cəbhə və koordinatlar üzrə reallaşdı. Ali Baş Komandanımızın rəhbərliyi altında qəhrəman ordumuz işğaldakı torpaqları azad etdiyi bir zamanda, mediamız düşmənin informasiya müstəvisindəki təxribatlarını uğurla ifşa etdi, Qarabağ həqiqətlərinin, ermənilərin müharibə əsnasında dinc, mülki insanları raket zərbələrinə məruz qoyması ilə bağlı reallıqların beynəlxalq miqyasda çevik və operativ şəkildə yayılmasını təmin etdi.
Bu məsələdə ölkə başçısının dünyanın nüfuzlu televiziyalarına, media orqanlarına verdiyi müsahibələrinin önəmini xüsusilə qeyd etmək lazımdır. Prezident İlham Əliyev bu müsahibələrdə nəinki Ermənistanın son 30 ildə törətdiyi cinayətləri təkzibedilməz faktlarla sübut etdi, həmçinin işğalçını, təcavüzkarı himayə edən qüvvələri, Azərbaycan xalqına qarşı törədilən cinayətləri uzun illərdir ki, susqunluqla izləyən bəzi beynəlxalq təşkilatları, iri dövlətləri də ifşa etdi. Məhz ölkə başçısının Vətən Müharibəsi dönəmində beynəlxalq media orqanlarına verdiyi açıqlamalar Ermənistanın informasiya müstəvisində uğur qazanmaq cəhdlərini heçə endirdi, rəsmi İrəvanın informasiya platformasında da ağır məğlubiyyətə uğraması ilə nəticələndi.
Bildiyiniz kimi, mili maraqlarımızın infromasiya platformasında etibarlı müdafiəsi medianın peşkarlığından, onun gücündən asılıdır. Ölkə daxilindəki neqativ olaylara qarşı mübarizə, cəmiyyətdəki eybəcərliklərin ifşa edilməsi də medianın fəaliyyətindən əhəmiyyətli dərəcədə asılıdır. Bu baxımdan ölkə başçısının Medianın İnkişafı Agentliyinin yaradılması ilə bağlı fərmanı medianın peşəkarlığının artırılmasına, onun daha effektiv fəaliyyətinin təmin edilməsinə, beynəlxalq tələblərə uyğunlaşdırılmasına, daha güclü medianın formalaşdırılmasına hesablanıb. İnanıram ki, məhz ölkə başçısının qayğısı sayəsində yaxın gələcəkdə mediamızda ciddi inkişafın, mütərəqqi yeniliklərin şahidi olacağıq. Mən bu işdə Medianın İnkişafı Agentliyinə də uğurlar arzulayıram.
