Son zamanlar sosial şəbəkələrdə müxtəlif sorğular keçirilir, nəticələri maraqlı tərəflər və ya şəxslər “mütləq həqiqət” kimi təqdim etməyə çalışırlar.
Bununla da ictimai rəyə təsir etmək, yaxud onu azdırmaq üçün çaba göstərirlər. Təbii ki, oxucu və tamaşaçı kütləsinin sosial şəbəkələrə marağını inkar etmək olmaz. Ancaq bu maraq sorğuların keçirilməsinə imkan verirmi? Sosial şəbəkə üzərindən aparılan sorğu metodologiyası onun hər hansı həqiqəti nəinki əsk etdirməsinə imkan verir, əksinə, inkar edir.
Bugünlərdə belə bir sorğu təşkil olunub. Nəticədə isə Əli Kərimli yenə də qabağa çıxıb. Sorğu keçirənlər də, təşkil edənlər də sadəcə bir şeyi unudublar ki, Əli Kərimli ancaq AXCP-lərdə alternativ olur. Necə ki, 2000-ci ildə, 2002-ci ildə, 2015-ci ildə...
Lakin bu qondarma sorğunun nəticələri şərh edənlər bu dəfə də nəticəni "mütləq həqiqət" kimi qələmə verməyə çalışdıqları üçün bu sorğulardan ikisi üzərində dayanmağı vacib saydıq.
İlk olaraq, “YouTube” sosial şəbəkəsi üzərində fəaliyyət göstərən “Bumerang Media” internet kanalı keçirdiyi virtual sorğunun nəticələri üzərində dayanaq. İlk mərhələdə hər biri 5 partiya sədri olmaqla 3 sorğu keçirilib. Birinci mərhələdə 15 partiya sədri arasından seçilən 3 qalib növbəti mərhələyə çıxarılıb. Birinci mərhələdə “Azərbaycanda hansı müxalifət partiyasının liderini prezident görmək istərdiniz?” sualı təqdim olunub.
26 min virtual respondentin iştirakı ilə keçirilən ilk sorğuya 5 partiya sədrinin adı daxil edilb. Səsvermə nəticəsində AXCP sədri Əli Kərimli 45%, ikinci virtual səsvermədə HƏP sədri Əli İnsanov 62%, üçüncü virtual səsvermədə KXCP sədri Mirmahmud Mirəlioğlu 65% səs qazanıb. İkinci mərhələdə ilk dövrədə birinci yerə çıxan üç şəxsin adları və “prezident olmağa layiq müxalifət lideri yoxdur” bəndi səsverməyə çıxarılıb. Səsvermədə yenə də birinci yerə 46%-lə Əli Kərimli çıxarılıb.
“Prezident olmağa layiq müxalifət lideri yoxdur” sualına 45% müsbət cavab verib.
“Bumerang Media” ilə yanaşı, “Azad Söz” internet kanalı da eyni vaxtda bənzər sorğu keçirib. “Azərbaycanda hansı partiya rəhbərini daha çox dəstəkləyirsiniz?” sorğusunda 45 min virtual respondent iştirak edib. Bu sorğuda yalnız müxalifət partiyalarının rəhbərləri deyil, iqtidar partiyası olan YAP-ın sədri də daxil edilib. Bu virtual səsvermədə də AXCP sədri Əli Kərimli 40%-lə ən çox dəstək qazanıb.
Bura qədər hər şeyi rəqəmlərin üstünə yükləmək olar. Amma Azərbaycanın siyasi palitrasını az-çox bilən istənilən şəxs anlayır ki, bu sorğuların keçirilmə məqsədinin də, nəticələrin üzə çıxma şəraitinin də həqiqətlə yaxından-uzaqdan heç bir əlaqəsi yoxdur. Birincisi ona görə ki, siyasət meydanı deyəndə ancaq sosial şəbəkələri nəzərdə tutan siyasətçilər var və onların başında Əli Kərimli dayanır. Dəfələrlə öz yaxın ətrafı tərəfindən də sübut olunub ki, Əli Kərimlinin özünün, komandasının hər bir üzvünün sayı yüzlərlə hesabanan saxta profili var və bu profillər “trolluq” fəaliyyəti göstərir. İstər Əli Kərimlinin çıxışları olsun, istər onunla bağlı bu kimi sorğularda məhz bu saxta profillər meydana buraxılır. Buna görə də bir nəfər qısa müddətə Kərimlinin lehinə bir neçə yüz səs verir. Odur ki, bu kimi sorğularda Kərimlinin önə çıxması heç kəsə təəccüblü gəlmir. Başqa sözlə, Kərimli bu nəticələrə görə öz fəaliyyətinə, əhali arasındakı nüfuzuna yox, məhz öz trollarına minnətdar olmalıdır.
O da məlumdur ki, Kərimli indi nəinki hakimiyyətə alternativdir, heç müxalifətə də alternativ olacaq ranqda biri deyil. Ömrü boyu müxalifətə müxaliftçilik edən bu adamın əsas məqsədi də məhz bu mövqeni qoruyub saxlamaq olub. Son 20 ildə Azərbaycan siyasətində müxalifət arasındakı alınmayan istəniln birliyin altından məhz Əli Kərimlinin əli çıxıb. Siyasi cameədə onu nəinki qəbul edirlər, əksinə, bu fəaliyyətinə görə daim açıq tənqid olunur.
Kərimli hakimiyyət uğrunda mübarizə aparmır, əslində heç vaxt da belə bir mübarizə aparmayıb. Çünki potensialını və nüfuzunu yaxşı bilir. Kərimli heç siyasətlə də məşğul olmur. Ancaq sosial media aktivi olaraq var. Uzun illərdir ki, onun fəaliyyətinin ancaq bir adı var- bloggerlik və bu bloggerliklə mövcudluğunu qoruyub saxlamaq.
O ki qaldı xalq kütlələrinə, kimlərsə populist çıxışlara aludə ola bilərlər, ancaq onlar belə zamanla Kərimlinin ancaq “yaxşı danışmaq”dan başqa heç bir işin sahibi olmadığını anlayırlar. Buna görə də indi Kərimlinin ölkə başçısına alternativ kimi göstərmək nəinki qeyri-mümkündür, müqayisə cəhdi belə yanlışdır.
Xüsusilə 44 günlük müharibədə Azərbaycanın qazandığı qələbə, torpaqların işğaldan azad edilməsi, müharibə günlərində dövlət başçısının şəxsən özünün sərgilədiyi qətiyyət, siyasi iradə, qələbədən sonra başlayan quruculuq işləri Azərbaycan Prezidentinin mövqeyini kifayət qədər möhkəmləndirib. Ali Baş Komandan İlham Əliyevin Qarabağa hər səfərinə daxili və xarici aləmdən olan reaksiyaları təhlil etmək bu mövqenin nə qədər möhkəm olduğunu söyləməyə yetərlidir. Şuşanı işğaldan azad edən bir ordunun Ali Baş Komandanı adını qazanmış İlham Əliyevin xalq arasındakı nüfuzu heç nə ilə müqayisə olunmayacaq səviyyədədir və buna qarşı alternativ olacaq güc hələlik yoxdur.
Əli Kərimlinin isə xalqın bu düşüncələriylə yarışmaq gücü və hətta həvəsi yoxdur. AXCP sədrinə uduzmağa məhkum olduğu mübarizəyə başlamaqdansa, sosial şəbəkə “qəhrəmanına” çevrilmək daha maraqlıdır. Qazancı məhz buradan təmin olunur, eqosunu da məhz belə sorğuların məlum nəticələri ilə təmin edir. Ona görə də az qala hər gün “Facebook”da “admin heyəti” adından çıxışları yayılır, canlı yayımlara çıxır, illərdir hər gün dediyi fikirləri təkrarlayır. Bir sözlə, unudulmağa məhkum olunmamaq üçün Markın yaratdığı hər fürsətdən gen-bol yararlanır. Eyni zamanda, bilir ki, bu, siyasət deyil və o da siyasətlə məşğul olmur.
Cebhe.info
