Sürgündə Güney Azərbaycan Parlamentinin yaradılması ilə bağlı müzakirələr davam edir. Bir müddət öncə müzakirələr zamanı isə arzuolunmaz hallar yaşanıb. “Ümid” Partiyasının sədri, millət vəkili İqbal Ağazadə yaranmış fikir müxtəlifliyinə görə, Günaz.TV-nin rəhbəri Əhməd Obalıya zəng vuraraq, onu təhqir və təhdid edib. Bu məsələnin təfərrüatı və yaxın perspektivdə atılacaq addımlarla bağlı Əhməd Obalı BayMediaaz.space-a müsahibəsində aydınlıq gətirdi.
- Güney Azərbaycan Parlamenti ilə bağlı 4 ilə yaxındır ki, müzakirlər aparılır. Bununla bağlı televiziyada təxminən 6-7 dəfə də söhbətimiz olub. Son dəfə bu barədə 2013-cü ilin axırlarında da danışmışıq. Bildirmişik ki, Sürgündə Güney Azərbaycan Parlamenti yaradılmalıdır. Bu parlament fərqli insanları bir araya gətirməlidir. İstəyirik ki, demokratik ölkələrin parlamentinə bənzər bir qurum olsun. Hərçənd bizim mühacirətdə olanların sayı azdır, amma buna baxmayaraq bir iş görə bilərik. Onun üçün də bu ilin mart ayında bir toplantı oldu. Məni də ora dəvət etmişdilər. Məqsəd lazımsız söz söhbətlərə son qoymaq idi. Orada İqbal Ağazadə və onun “Səhər” televiziyasında təqribən 15 il çalışmış Rüfət adlı müavini də orada idi. Orada müzakirələr zamanı belə qənaət yarandı ki, İqbal Ağazadə barışdırıcı mövqedən çıxış etmir, barışdırma adı altında özünün planlarını həyata keçirməyə çalışır. Hətta orada belə bir fikir irəli sürdü ki, “gəlin Güney Azərbaycanın müstəqilliyini elan edək”. Təsəvvür edin, Danimarkada bir oteldə 10-15 nəfər yığışıb Güney Azərbaycanın müstəqilliyini elan etməlidir. Mən buna qarşı çıxdım. Sonra belə qərara gəlindi ki, parlament yaradılsın. Biz, bu sənədə imza atandan sonra gördük ki, həmin kağızda başqa məsaələlər də yazılıb. Buna etiraz edərək ki, bildirdik ki, biz, parlament yaratmırıq, sadəcə buna kömək edə bilərik. Gördük ki, İqbal Ağazadə burada özünə bir yer ayırmaq istəyir. Mən hamının – 15 nəfərin yanında İqbal Ağazadəyə 3 dəfə dedim ki, bizim Dünya Azərbaycanlıları Konqresindən (DAK) acı təcrübəmiz var. Baxmayaraq, DAK Bütöv Azərbaycanla bağlı idi, bu isə yalnız Güney Azərbaycanla bağlıdır. Burada Quzey Azərbaycandan heç bir şəxs təmsil olunmamalıdır, yalnız güneylilər yer almalıldırlar.
-Sizin bu təklifinizə münasibət necə oldu?
-Biz dedik ki, quzeydən kimsə, özəlliklə İqbal Ağazadə parlamentdə təmsil olunmasın. Biz buradan ayrılandan sonra 9 nəfərlə Parlamentin qurulması üçün yer və tarix müəyyənləşdirmək üçün qərara gəldik. Hamı yığışsın və bu ümumi çağırış əsasında olsun ki, sonra kimsə dəvət olunub olunmamasına görə narazılıq etməsin. Bu məsələnin üzərindən 1 həftə keçəndən sonra bizə məlumat gəldi ki, İqbal Ağazadə artıq parlament qurduğunu elan edib və parlament üzvlərinin sayının 45 nəfərə çatdırılacağını bildirib. Təbii ki? biz, buna qarşı çıxdıq. Adam seçmək ən azı gələnlərin vəzifəsi olmalıdır. Bir gün də iclas təyin etmişdilər, mən də ora gedəndə gördüm ki, nizamnamədən danışırlar. Mən dostlara dedim ki, aramızda bir nəfər də hüquqşünas yoxdur və nizamnamə yazmaq haqqında qərarımız da olmayıb. Biz sadəcə parlamentin yaradılmasınını yerini və tarixini müəyyənləşdirmək barədə qərar qəbul etmişik. İclasdan sonra dostlarla əlavə söhbətlərimiz və millətə müraciətimiz oldu. Nəhayət 2 həftə bundan əvvəl bəyanat qəbul etdik ki, ümumi çağırış əsasənda demoktatik parlament qurulmalıdır.
İqbal Ağazadə o bəyanatı oxuyandan sonra mənə zəng vurdu. Məni təhqir və təhdid etdi. Bəyanata imza atanları təhqir etməsindən bəlli oldu ki, o, çox narahat olub.
-Əgər parlament yaradılırsa və bununla bağlı müzakirələr, polemika aparılırsa narahatlığa nə əsas var?
-Bizə də maraqlıdır ki, əgər parlament qurulursa onda, o, niyə narahat olur? Buradan müxtəlif versiyalar meydana çıxır. Bu ya divident qazanmaq istəyirdi, ya da bizi, hansısa qrupun əlində oyuncağa çevirməyə çalışırdı. Onu da bacarmadığına görə çox narahat olub. Eşitdik ki, onunla həmfikir olan 4 nəfərə deyib ki, paralel parlament yaradılacaq. Biz, 100-dən artıq imza yığmışıq ki, ümumi çağırış əsasında parlament yaradaq. Onlar isə deyir ki, 9 nəfər parlamentə namizədləri seçəcəklər və 45 nəfərdən ibarət parlament quracaqlar. Bundan parlament olmaz, belə bir parlament ya yaranmaz, yaransa da heç bir iş görə bilməz. Onların nizamnaməsində yazılıb ki, parlament istiqlaliyyəti elan etməlidir. Bu, oyuncaqdan başqa bir şey deyil.
-Nə düşünürsüz, İqbal Ağazadənin bu məsələ ilə aqressiv mövqe sərgiləməsi nə ilə bağlıdır?
-Mənim üçün də əsas sual budur. Biz bu məsələıni araşdırırıq. Məntiq deyir ki, Azərbaycanda rəsmi müstəvidə bu məsələlərə müdaxilə ola bilməz. Ola bilər ki, onu kimlərsə önə atıb. Amma onu önə atanlar bilməlidirlər ki, Güney Azərbaycan məsələsi oyuncaq deyil. Bu barədə kiminsə bir fikri varsa ciddi adamlar vasitəçilik etməlidir. Ciddi adamlarla müzakirə aparmaq olar. Yəni 4-5 nəfər qohum-əqraba ilə qurulan parlament DAK-ın taleyini yaşayacaq. Bu da nə Azərbaycanın güneyinə, nə də quzeyinə xeyir gətirəcək. Onun müavininin İranla əlaqələri göz önünə gələndə isə düşünürük ki, o, bilərəkdən və ya bilməyərəkdən İranın oyununa düşüb. Çünki bu tərzdə parlament yaranmaz.
-Onlar 45 nəfərin necə seçilməsini nəzərdə tutub?
-Bunlar 45 nəfəri özləri təyin etmək istəyirlər. İqbal Ağazadə deyir ki, bu işdə yoxam. Amma arxadan işləri özü yönləndirir. Mənim sualım budur. İqbal Ağazdə, əgər bu işdə yoxsansa nədən özünü itirərək təhqiramiz sözlər danışdın?
...Bizim Güneydən – içəridən və xaricdən dəstəyimiz çoxdur. Bildirirlər ki, ümumi çağırış əsasında parlament qurulmalıdır, biz, onun arxasındayıq. Əgər bu ümumi çağırışa hər hansı bir güneyli hətta müxalif də olsa gəlirsə sevinirik. Gəlməyənlərin də seçiminə hörmətlə yanaşırıq.
-İqbal Ağazadəyə dəstək verən güneyli varmı?
-İqbal Ağazadənin 4 nəfər dəstəkçisi var. İqbal Ağazadənin dediyini həyata keçirməyə çalışırlar.
-Həmin o 4 nəfərə güneylilər arasında münasibət necədir?
-Münasibət ciddi deyil. Çoxluğun bəyanatına imza atanların içində isə ciddi adamlar, təşkilatlar-GAMAC, Günaz.TV, GAMOH-un rəhbəri, dilçilər, həkimlər var. Onlar İqbal Ağazadənin dediyindən əl çəkməsələr istər istəməz Güney Azərbaycvan Parlamentinə zərbə vuracaqlar.
-Ümumiyyətlə, Parlamentin neçə üzvü olacaq?
-Bizim nəzərimizcə Bir neçə yüz nəfərlik olmalıdır. Aktivliyinə, fəaliyyətinə baxaraq onların içindən nümayəndələr seçilməlidir. Bu 20, 40 və ya daha artlq ola bilər. Onu indidən təyin etmək olmaz. Düşünürük ki, daha çox olmalıdır.
-İqbal Ağazadə ilə bağlı məhkəməyə müraciət edəcəksiniz?
-İqbal Ağazadə Amerika, Avropa və Azərbaycan məhkəməsində cavab verməlidir. Təbii ki. mənim olduğum məmləkətlərə gəlirsə məhkəmədə cavab verməyəcək. Amma digər tərəfdən də Azərbaycanın hər hansı bir millət vəkilinin digər bir azərbaycanlı tərəfindən məhkəməyə verilməsi Azərbaycan üçün də yaxşı hal deyil. Mən də fikirləşirəm ki, bunu necə etmək lazımdır. Əgər İqbal Ağazadə təhdidlərinə davam edərsə, mən artlıq onu məhkəməyə verməyə məcbur olacağam. Təhdid yolu ilə bizi oyunlarına sala bilməzlər, yanlış qapını döyüblər.
