Ağsu rayonu, Qaraqaşlı kənd sakini Nadirə Qədirovaya məxsus üçotaqlı fərdi ev ötən ilin fevralında həmin ərazidə baş verən güclü zəlzələ nəticəsində qəzalı vəziyyətə düşüb. DİA.AZ-ın məlumatına görə, Nadirə Qədirova bildirib ki, məsələ ilə bağlı Ağsu Rayon İcra Hakimiyyətinə, həmçinin Fövqəladə Hallar Nazirliyi Zəlzələ bölgəsi üzrə Qərargahına müraciət edib. Hər iki qurumdan nümayəndələr gələrək evə baxış keçiriblər və təmir-bərpa olunmasına dair akt tərtib olunub. Lakin Nadirə Qədirova evinin təmir-bərpasına razı olmayıb:
“Çünki ev bərbad vəziyyətdədir, bünövrəsi yoxdur, 1950-ci ildə kərpicdən tikilib. Dəfələrlə keçmiş icra başçısı Ənvər Seyidəliyevin yanına getdim. Vəziyyəti ona izah etdim. Bizə boş vədlər verdi. Hər dəfə dedi ki, gedin, növbəniz çatanda gəlib, evinizi tikəcəklər. Lakin gəlmədilər, bizi aldatdılar. Yeni icra başçısı Vahid Tağıyev isə deyir ki, evlə bağlı şikayətlə üstümə gəlməyin, bu işə mən baxmıram. Təkrar gedəndə isə bizi qəbul etməyib”.
Nadirə Qədirovanın evinin təmir-bərpası podratçı şirkət “TALEH TT” Məhdud Məsuliyyətli Cəmiyyəti tərəfindən aparılmalı imiş. Şikayətçinin dediyinə görə, şirkətin rəhbəri Əlşah Dəmirov evin sökülərək, yenidən tikilməsinə razılıq verib: “Orada vəziyyəti izah etdik, dedik ki, külək əsəndə ev yırğalanır, yağış yağanda suyun hamısı içəridədir. Körpə nəvələrim var, qorxuruq ki, ev uçar, uşaqlar altında qalar. Oğlum ustadır, onlara dedik ki, fəhlə işini özümüz görərik. Siz həmin pulun əvəzinə bizə sement və daş verin. Evi tikək, bərpa işlərini də siz edərsiz. Evin ustapulu iki min manat edirdi. Onlar sement və daş verməyə razılaşdılar. Dedilər ki, evi sökün-tökün yerə. Biz sizə sement, daş almağa kömək edəcəyik.
Biz də iki otağı sökdük, birini də yaşamaq üçün saxladıq. Sonra onlara xəbər etdik. Boyunlarına almadılar ki, biz sizə “evi sökün” deməmişik. Üstündən üç ay keçib. İndi də yaxalarını kənara çəkiblər ki, bizlik deyil, özünüz bilərsiniz. Nə oyundursa, baş açmadıq. Şikayət edəcəyimizi deyəndə bildirdilər ki, bizlik deyil, hara istəyirsiniz deyin. Belə insafsızlıq olmaz. Onlara dedim ki, imkanım olsa, sizdən kömək istəməzdim. Bu cür evdə yaşamağı heç kim özünə rəva bilmir. Dedim ki, sən gəlib bu evi təmir etdin. Axı bu ev aşır. Bu il təmir etdin, gələn il ev uçacaq. Deyirdilər ki, koronavirus düşüb ortalığa, tikinti, təmir işləri dayandırıla bilər. Onlar belə deyəndən sonra biz məcbur olub, təmiri qəbul etdik. İndi də ev uçmuş vəziyyətd qalıb”.
Nadirə Qədirova üç körpə nəvəsi ilə qonşuda gecələdiyini deyir. Söyləyir ki, ev qəzalı olduğundan həmin bir otaqda yatmağa qorxur: “Nəvələrimi də götürüb hər axşam qayınım qızının evinə gedirəm. Gəlinimlə oğlum da uçuq damın altında qalıblar. On gün bundan əvvəl möhkəm külək əsirdi. Kafedə qabyuyan işləyirəm. İşdəydim, yarı canım evdə qalmışdı ki, ev uçdu, uşaqlar altında qaldı. Oğlum fikirdən nə günə düşüb. Kənddə neçə adamın evini tikiblər, oturub içində. Hamıya ev tikdilər. Nə işdirsə, mənim evimə çatanda gözləri bağlanır. Bir adam gəlib demir ki, bu ev uçub-tökülür. Bunu da tikmək lazımdır. Prezidentin qərarı olmasa deyərəm ki, yoxdur, uçuq evdə oturmuşuq. Axı qərar verilib, pul ayrılıb. Niyə mənim evimi tikmirlər? Ümid yerim qalmayıb, hamıya ağız açmışam. Çox yerlərə müraciət etmişəm, daha kimlərin qapısını döyməmişəm. Yalvarmışam, yaxarmışam, heç baxan da yoxdur”.
DİA.AZ xatırladır ki, 2019-cu il fevralın 5-də Pirqulu stansiyasından 7 km cənubda, Ağsu ərazisində 4,4 bal gücündə zəlzələ qeydə alınıb. Həmin zəlzələ episentrdə 5 bala yaxın, ətraf rayonlarda 4,3 bala qədər hiss olunub. Həmin gün Pirqulu stansiyasından 9 km cənub-qərbdə İsmayıllı ərazisində zəlzələ qeydə alınıb. Fevralın 9-da və 11-də də Pirqulu stansiyasından 8 və 9 km cənub-qərbdə və qərbdə yeraltı təkanlar baş verib.
Zəlzələ nəticəsində Şamaxı, İsmayıllı və Ağsu rayonlarında bir çox fərdi və çoxmənzilli yaşayış evlərinə ziyan dəyib.
Prezident İlham Əliyevin sərəncamına əsasən, indiyədək dövlət büdcəsindən təbii fəlakətdən zərər görmüş hər üç rayona ümumilikdə 7 milyon manat ayrılıb.
Zəlzələdən sonra ziyan dəymiş yaşayış evlərində təmir işlərini aparmaq üçün podratçı şirkətlərini Ağsu Rayon İcra Hakimiyyəti müəyyən edib.
2019-cu ilin yanvar-dekabr aylarında Ağsu rayonunda dövlət qurumları tərəfindən ümumi məbləği 9 milyon 15 min 246 manat olan 28 tender keçirilib. Ən çox tender keçirən Ağsu rayon İcra Hakimiyyəti olub. Qurum ümumi məbləği 8 milyon 244 min 671 manatlıq tender müqavilələri bağlayıb.
İcra hakimiyyətinin 1 milyondan böyük 3 tender olub. Tenderləri “TALEH TT” MMC, “Dərələyaz – 1” MMC şirkətləri qazanıb. “TALEH TT” MMC ümumi məbləği 3 milyon 304 min manat olan 2, “Dərələyaz – 1” MMC 1 milyon 696 min manat olan 1 tender qazanıb.
Rayonda ən çox tender udan şirkətlər “TALEH TT” MMC və “CEYHUN 1994” MMC-dir. “TALEH TT” MMC şirkəti 4 milyon 574 min 167 manat olan 5 tender, “CEYHUN 1994” MMC ümumi məbləği 142 min 700 manat olan 5 tenderin qalibi olub.
