Məlumdur ki, indiyə kimi respublikamızda təhsil sahəsinin daha da inkişaf etdirilməsi istiqamətində əsaslı islahat proqramları həyata keçirilsə də, hələ də bu sahənin tam şəkildə inkişafına nail olmaq, problemlərini aradan qaldırmaq mümkün olmayıb. Faktdır ki, hal-hazırda ölkəmizin təhsil sahəsində çox ciddi problemlər mövcuddur və bu gün onların həlli zəruri məsələlərdən birinə çevrilib. Qeyd edək ki, bəzən təhsil sistemində tənzimləmə, idarəetmə və nəzarət funksiyalarının dəqiq müəyyən edilməməsi səbəbindən, bu və ya digər təhsil müəssisələrində çox ciddi problemlər yaşanmaqda davam edir. Bu sırada Tovuz rayonundakı Məharət Məmmədov adına Qovlar şəhər Humanitar Təmayüllü Məktəb-Lisey də, ən böyük problemlər məngənəsində boğulan təhsil müəssisələrindən biri hesab olunur. Məsələn, bu təhsil ocağı haqda onu deyə bilərik ki, Qovlar şəhərinin mərkəzi ərazisində fəaliyyət göstərən məktəb-liseydə yaşanan durum, digər şəhər və rayonların təhsil müəssisələrindəki durumdan kəskin şəkildə fərqlənir. Buna əsas səbəb, aidiyyatı dövlət qurumlarının bu təhsil ocağını diqqətdən kənarda saxlamalarıdır. Əldə etdiyimiz bəzi məlumatlara görə, hazırda Fatimə xanım Allahverdiyevanın rəhbərlik etdiyi və Tovuz rayonu, Qovlar şəhəri, Şəhriyar küçəsində fəaliyyət göstərən Məharət Məmmədov adına Qovlar şəhər Humanitar Təmayüllü Məktəb-Liseydə təqribən 100 nəfərdən çox müəllim pedoqoji fəaliyyətlə məşğul olur, 700 nəfərdən çox sagird isə elmi biliklərə yiyələnirlər. Bütün bunlara baxmayaraq, hazırda bu təhsil ocağında sanki fedodalizm dövrünün ab-havası yaşanmaqdadır. Yəni, rəhbər qurumların, ələlxüsus Təhsil nazirliyinin baxımsızlığı ucbatından bu təhsil ocağı uçub-dağılmaq təhlükəsi ilə üz-üzə qalıb. Belə ki, ikimərtəbəli binada fəaliyyət göstərən Məharət Məmmədov adına Qovlar şəhər Humanitar Təmayüllü Məktəb-Liseyin sinif otaqlarına baxış keçirilərkən bəlli olur ki, şəhərin mərkəzi ərazisində yerləşən bu məktəbdə hələ də odundan yanacaq vasitəsi kimi istifadə olunur, sinif otaqlarının pəncərələri və giriş qapıları sınıq-salxaqdır, arakəsmələrdəki şüşələr və s. hər kəsin həyatı üçün təhlükə yaradır. Bir sözlə, hazırda adı çəkilən bu təhsil ocağının ya yenidən qurulmasına, ya da ki, əsaslı şəkildə təmir olunmasına ciddi ehtiyac var. Əgər yaxın vaxtlarda bu yöndə heç br addım atılmazsa, o halda belə qənaətə gəlmək olar ki, Tovuzun təhsil sistemi yenə də “axsamaqda davam edəcək”.
Düşündürücü hal odur ki, hazırda Qovlar şəhərində təqribən 15200 nəfər şəxsin yaşadığı, dörd orta məktəbin, bir musiqi məktəbinin, bir internat və bir texniki peşə məktəbinin, həmçinin bir dövlət sosial iqtisad kollecinin fəaliyyət göstərdiyi bildirilir. Bütün bunlara baxmayaraq, Qovlar şəhərinin mərkəzi ərazisində fəaliyyət göstərən Məharət Məmmədov adına Qovlar şəhər Humanitar Təmayüllü Məktəb-Liseydə isə, hazırda belə bir biabırçı ab-hava hökm sürməkdə davam edir. Axı, bu gün 21-ci əsrdir və indiyə kimi ən ucqar dağ kəndlərində olsa belə məktəblər yenidən qurulub, bəzilərində əsaslı şəkildə təmir-bərpa işləri həyata keçirilib. O halda sual oluna bilər ki, görəsən Qovlar şəhərinin mərkəzi ərazisində fəaliyyət göstərən bu təhsil ocağına bəslənən ögey münasibətin kökündə nələr durur? Axı, şəhər sakinləri mövcud vəziyyətlə bağlı heç cür barışmaq istəmirlər və onlar övladlarının təhsil aldıqları bu məktəbin qaydaya salınmasını və bunun nəticəsi olaraq dərslərin tədris olunmasının səviyyəsinin yaxşılaşdırılmasını istəyirlər.
Onu da qeyd etmək yerinə düşər ki, Məharət Məmmədov adına Qovlar şəhər Humanitar Təmayüllü Məktəb-Liseyin yenidən qurulması, yaxud da bu təhsil ocağında əsaslı şəkildə təmir-bərpa işlərinin həyata keçirilməsi nə məktəb rəhbərliyinin, nə də ki, hansısa vəzifə sahibinin səlahiyyətinə aid olmayan məsələlərdir. Düşünürük ki, adı çəkilən bu təhsil ocağında yaşanan biabırçılıqların ictimailəşdirilməsi təhsil naziri Emin Əmrullayevin diqqətini cəlb edəcək və cənab Nazir mövcud problemlərin aradan qaldırılması istiqamətində müvafiq addımını da atacaq.
Bəli, bu gün tam əksəriyyətin nəzər-diqqəti Məharət Məmmədov adına Qovlar şəhər Humanitar Təmayüllü Məktəb-Liseydəki duruma yönəldiyindən, inanırıq ki, cənab Nazir qısa zaman kəsiyində müvafiq qərarını açıqlayacaq və bu təhsil ocağına yeni bir ab-hava, yeni bir nəfəs də bəxş edəcək.
