Avropa İttifaqı mülki missiyasının adı ilə tez-tez qarşılaşırıq. Azərbaycan-Ermənistan şərti sərhəddində yerləşdirilən bu missiyanın fəaliyyət müddətinin bitməsinə sayılı günlər qalıb. Missiyanın fəaliyyəti müddətində biz bu missiyanın “binokl” diplomatiyası ilə məşğul olduğuna da şahid olduq. Təbii ki, ölkə başçısı öz uzaqgörən siyasəti ilə Azərbaycana qarşı çıxan qüvvələrlə mübarizə aparır. Deputatlar, politoloqlar öz şərhlərini verir. Burada yenə də səsini çıxarmayanlar xaricdə yaşayan azərbaycanlılardır. "Onların səsini eşidən daha çox olar" deyə düşünürəm. Azərbaycana qarşı verilən qərarlara, qətnamələrə qarşı çıxmayan, şəkərbura-paxlava bişirib Novruz bayramını qeyd etməkdən başqa iş görməyən və bütün bunlarla yanaşı, ortada iş olmadan “mən Azərbaycan üçün mübarizə aparıram” deyən çox sayda xaricdə yaşayan azərbaycanlı var...
Hər şey bir kənara, biz Avropa İttifaqının bu mülki adı altında təşkilatlanan missiyası ilə nə edəcəyik?

“Avropa İttifaqının mülki missiyası cənab prezidentin də iştirakı ilə Avropada müzakirə edilib. Burada Fransa prezidenti Makron, Ermənistanın baş naziri və Avropa İttifaqı Şurasının prezidenti Şarl Mişelin də iştirakı ilə keçirilən görüşdə müzakirə olundu. Bu zaman qısa müddətlik Ermənistanda onların yerləşdirilməsi qərara alındı. Sonra da hər birimizin şahidi olduğumuz məsələlər ortaya çıxdı. Belə ki, artıq missiya öz mandatından əlavə funksiyaları icra etməyə başladı və tərkibi genişləndirildi, hərbçilərin sayı çoxaldıldı. Hətta müddəti uzadıldı, dislokasiya olduğu yerləri də genişləndirməyə başladılar”.

Bu barədə Bizimyol.info xəbər portalına Milli Məclisin deputatı Vüqar İskəndərov danışıb. Deputat qeyd edib ki, bütün bu məsələlərin əsas ilhamverici qüvvəsi Fransadır.

“Fransa Azərbaycanla Ermənistan arasında sülhün formalaşmasına bütün cəhdlərlə mane olmağa çalışır. Bölgədə sabitliyin olmaması üçün əlindən gələn bütün pislikləri etməklə məşğuldur. Fransa “Minsk” qrupunun üzvü olanda da və bu gün də məsələni sülh yolu ilə həll edilməsinə yox, münaqişənin dondurulmasına və son zamanlar tamamilə Ermənistanın xeyrinə həll etmək üçün çalışırdı. Azərbaycan prezidentinin uzaqgörənliyi, qətiyyəti və Azərbaycan cəmiyyəti birliyilə 2020-ci ildə 44 günlük Vətən müharibəsi və bir günlük lokal antiterror tədbirləri ilə məsələlərə son qoyuldu. Azərbaycan tarixi qələbəsini qazandı və öz ərazi bütövlüyünü bərpa etdi.

Artıq başqa formada bölgəyə təzyiq rıçaqları tapa bilməyən Fransa və digər qüvvələr bu yolla yenidən Azərbaycan və Ermənistanın şərti sərhədinə yerləşməyə başladılar. Qərb öz riyakar simasını ortaya qoydu. Onlar Ermənistanın yanında olmaqla, onu silahlandırmaqla iki ölkə arasındakı münasibətlərə yalnız xələl gətirirlər. Azərbaycan və Ermənistan bir çox vacib yerlərdə, sərhədlərin delimitasiya və demarkasiya olunması, sülh gündəliyindəki bəndlərin işləməsi və təkmilləşməsi üzrə çox yaxşı nümunə ortaya qoydular. Bu da bir daha onu göstərdi ki, vasitəçi olmadan da iki ölkə anlaşa bilər”-deyə deputat bildirib.

Vüqar İskəndərov qeyd edib ki, hazırkı “binokl” diplomatiyasının uğursuz nümayəndələri orada yerləşməklə sülh münasibətlərinə yalnız xələl gətirirlər. Deputat vurğulayıb ki, Azərbaycan Qərbin dəstək verdiyi məsələləri çox yaxşı görür.

“Buna Rusiya-Ukrayna müharibəsini misal çəkə bilərik. Uzun illər Ukraynaya dəstəkdən danışan Qərb artıq Ukrayna kimi böyük bir ölkənin dağılmasına rəvac verib. Artıq bu ölkə kifayət qədər böyük əraziləri itirib, hər gün böyük ərazilər itirir, milyonlarla vətəndaşı qaçqına çevrilib, dünyanın bir çox ölkələrinə səpələnib. Çıxış yolunu göstərən real dəstək olmaması, yalnız münaqişənin uzanmasına yönələn siyasətin həyata keçirilməsi Ukraynanı çox dərin bir bataqlığa salıb və ölkə çox çətin durumdadır”-deyə Vüqar İskəndərov əlavə edib.

“Ermənistan da Ukraynanın vəziyyətini yaxşı görməli və anlamalıdır. Uzun illər işğalçı siyasətlə məşğul olan bu ölkə dünya birliyi içərisində normal dövlət statusunu qazanmaq istəyirsə, qonşuları ilə sülh içində yaşamalıdır. İşğalçılıq siyasəti və niyyətindən tamamilə əl çəkməli, Azərbaycanla olan münasibətlərində Konstitusiyasındakı işğalçılıq və separatçılıq meyllərini kəsib kənara atmalı və real sülhə yönələn siyasət həyata keçirilməlidir. Təəssüflər olsun ki, hələ də Ermənistan Qərbin belə oyunlarına alət olmağa razılıq verir və bu Qərb missiyasını öz ərazisində yerləşdirməklə, onların müddətini uzatmaqla hələlik real və rasional sülhün yanında olmadığını göstərməkdədir. Rəsmi Bakı prosesləri izləyir. Həmin missiyanın vaxtı bitəndən sonra onların Ermənistandan çıxmasını və qeyri-konstruktiv mövqedən çəkinmələrini arzulayır. Ermənistan doğru -düzgün addım atmaq istəyirsə, artıq missiyanın müddətini uzatmamalı və onları ərazisindən çıxarmalıdır”-deyə deputat bildirib.

P.S. Dünyanın müxtəlif ölkələrində yaşayan, qürurla “mən azərbaycanlıyam” deyən, “mən Azərbaycan üçün mübarizə aparıram” deyən hər bir azərbaycanlı çox yox, bircə dəfə etirazını bildirmək üçün bir araya gəlsə, biz çox şey əldə edərik. Necə olur ki, kimsə Azərbaycan əleyhinə danışıb dünyaya səs sala bilir, siz azərbaycanlılar həqiqətləri iki-üç nəfərə çatdıra bilmirsiniz?