Azərbaycanda “Media Savadlılığı” həftəsidir.

Dekabrın 16-dan 22 -dək davam edən “Media savadlılığı” həftəsi Medianın İnkişafı Agentliyinin təşkilatçılığı ilə keçirilir.

Cəmiyyətin inkişafı üçün vacib məqamlardan olan media savadlılığı insanların mediadan aldığı mesajlarn düzgün şəkildə başa düşülməsi üçün atılan mühüm addımdır.

Media savadlılığı mediadan gələn informasiyaların doğruluğunu təmin edir, məlumatların kim tərəfindən və hansı məqsədlə yayıldığını aydınlaşdırır, həmçinin informasiyaların obyektiv şəkildə analiz olunmasına kömək edir.

Bildiyimiz kimi, müasir dövrdə informasiyalar sürətlə yayıldıqca dezinformasiyaların da yayılma sürətır artır.

Məhz bu dövrdə manipulyativ məlumatların, həmçinin xarici mərkəzlərdən gələn təxribatların qarşısını almaq üçün media savadlılığı vacibdir. Çünki media savadlılığı insanların şəxsi və ictimai həyatında şüurlu olmalarına kömək edir, dezinformasiya və manipulyasiyadan qoruyur.

Gununsesi.info -ya açıqlamasında media eksperti Azər Həsrət qeyd edib ki, cəmiyyətin media savadlılığına ehtiyacı olduğu bir dövrdə “Media savadlılığı” həftəsi çərçivəsində bir sıra məsələlərin izah edilməsi üçün cəhdlər göstərilir.

Onun sözlərinə görə, bir həftə içində görüləcək tədbirlər hər şeyi kökündən həll etməsə də, yaxşı başlanğıc olaraq bunu daha genişləndirmək və məsələnin kökündən həllinə çox böyük töhfə verə bilər:“Media savadlılığı yüksək olan şəxsləri aldatmaq mümkün deyil, onlar qarşılarına çıxan istənilən informasiyaya şübhəli yanaşırlar. Əmin olmadıqları məlumatlarda araşdırma zərurəti hiss edirlər, eyni zamanda xəbərlərin hansı mənbələrdən yayımlandığına da diqqət edirlər. Məlum məsələdir ki, bir çox naməlum xəbər portalları var ki, onlara etibar etmək mümkün deyil.

Bu gün cəmiyyətdə media ilə məşğul olanların əksəriyyəti media peşəkarı deyil, media ilə məşğul olmur. Amma yeni texnologiyaların sayəsində istənilən şəxs media ilə məşğul olmağa başlaya bilər. Bu kimi qeyri-peşakarlar da yanıltıcı informasiyaların tirajlamasında media savadı olmayanları rahatlıqla alətə çevirə bilir.

Əbəttə, media savadı olan şəxs onun alətinə çevrilməyəcək və saxta xəbərlərin təsirinə düşməyəcək. Ona görə də bu kimi məsələlərdə media savadlılığının yeri əvəz edilməzdir”.

A.Həsrət hesab edir ki, dezinformasiyaların və yalan informasiyaların qarşısının alınmasında media savadlılığı böyük silahdır.

“Azərbaycan istər daxildən, istərsə də xaricdən daimi olaraq media üzərindən dezinformasiya hücumlarına məruz qalır. Bu, daha çox erməni və onların arxasında duran qüvvələr, eyni zamanda, anti-Azərbaycan mövqeyində dayanıb, xaricdən ölkəyə hücum edən vətəndaşlarımızdır. Təəssüf ki, ölkədə vəziyyəti gərginləşdirmək üçün gecə- gündüz çalışan bu şəxslərin addımları media savadlılığı yetərincə olmayan insanlara mənfi təsir edir, onların fikirlərini yayır.

Bu gün ölkə daxilindəki siyasi qüvvələrin də mənfi təbliğatları az deyil. İnsanları daima nigaran və narazı saxlamaq üçün daima yanlış informasiyaları tirajlamaqla və ya istənilən doğru informasiyanı tragik bir şəkildə təqdim etməklə cəmiyyətin emosiyalarını gərginləşdirməklə məşğuldurlqr. Bütün bunlara görə Media savadlılığının artması vacibdir və bir məsələlərin həllində çox mühüm rol oynaya bilər.

Təəssüf ki, cəmiyyəti gərginləşdirmək, insanları qarşıdurmalara sürükləmək, dövlətlə vətəndaş arasında uçurum yaratmaq istəyənlər media savadlılığı olmayan şəxslərə çox rahat təsir edə bilirlər”, – deyə ekspert fikirlərini yekunlaşdırıb.