“Əbu-Dabidə Azərbaycan və Ermənistan liderlərinin görüşü, digər tərəfin iştirakı olmadan saatlarla müzakirə aparmaları böyük əhəmiyyətə malikdir və regionun gələcəyi baxımdan müsbət hadisədir. Üçüncü tərəfin iştirakı olmadan iki tərəfin bir araya gələrək öz problemlərini həll etmək cəhdləri yüksək qiymətləndirilməlidir. Çünki buradakı tərəflər hansı ad altında iştirak etmələrindən asılı olmayaraq, ümumi proseslərdə öz maraqlarını da güdürlər. Ona görə də, bu maraqların toqquşması bəzən problemin həllinə əngəl yarada bilir”.

Bu sözləri “Reytinq” qəzetinə açıqlamasında Azərbaycan Demokrat Partiyasının (ADP) sədri Sərdar Cəlaloğlu dünən Əbu-Dabidə Azərbaycan və Ermənistan liderlərinin bir araya gələrək sülh müqaviləsi ətrafında müzakirələr aparmasının əhəmiyyətindən danışarkən deyib.

Onun sözlərinə görə, bu cür görüşlər zamanı hər hansı bir ölkənin vasitəçiliyi əslində beynəlxalq güclərin ciddi rəqabətinə səbəb olur. Adətən bir beynəlxalq güc vasitəçilik imkanı əldə edən kimi, digər güclər prosesi pozmağa cəhd göstərir, bunun üçün əllərindən gələni edirlər. “Biz son 30-35 illik tariximizdə bu kimi halları çox görmüşük. Beləcə, imkan vermirlər ki, proses irəliyə getsin. Odur ki, Əbu-Dabi görüşünün ilk olaraq ən vacib əhəmiyyəti vasitəçinin iştirakı olmadan Azərbaycan və Ermənistanın bir araya gələrək danışıqlar və müzakirələr aparmasıdır. Mən bunu çox vacib məqam və uğurlu format hesab edirəm”,- deyə S. Cəlaloğlu əlavə edib.

ADP sədri qeyd edib ki, adətən vasitəçilər, eyni zamanda bu dövlətləri öz təsirinə salmaq məqsədilə addımlar atırlar:

“Vasitəçinin olmaması həm də hər iki dövlətin müstəqilliyinin və suverenliyinin möhkəmləndirilməsi istiqamətində atılan addım kimi qiymətləndirilməlidir. Bu vəziyyətdə ən vacib məsələ tərəflərin öz maraqlarını vasitəçi olmadan bir-birinə ifadə etmək imkanıdır. Bu zaman normal müzakirə və diskussiya gedə və tərəflərin mövqeyində yaxınlaşma qeydə alına bilər. Mən ən azından bu məqamlara görə, Əbu-Dabi görüşünü uğurlu və əhəmiyyətli hesab edirəm”.

Cəlaloğlu bildirib ki, yüz və ya daha çox tarixi olan azərbaycan-erməni məsələsinin dərhal həll ediləcəyinə ümid bəsləmək olmaz: “Amma ilk dəfə belə bir mühüm görüşün keçirilməsi və sonda kontaktların davam etdirilməsinin əhəmiyyətinin vurğulanması deməyə əsas verir ki, artıq Azərbaycan və Ermənistan arasında sülh müqaviləsi ikitərəfli qaydada həll edilmək istiqamətində inkişaf edəcək. Hesab edirəm ki, tərəflər daha ciddi naliyyətlər qazanacaqlar. Təbii ki, bu görüşdə konkret bir qərarın qəbul edilməməsi də siyasi uzaqgörənlikdən xəbər verir. Çünki bu addım atıldıqdan sonra bir müddət gözləmək lazımdır ki, məsələyə daxili güclər necə reaksiya verəcəklər. Xüsusilə, Ermənistanda. İctimai rəy adaptasiya olunduqdan, beynəlxalq ictimaiyyət ikitərəfli danışıqlar modeli ilə razılaşdıqdan sonra daha ciddi və real addımlar atılacaq”.

Partiya sədri hesab edir ki, son anda sülhün əldə edilməsi hər iki ölkənin maraqlarına uyğun olacaq.