Hərbi cinayətlər törətməkdə təqsirləndirilən erməniəsilli şəxslərin cinayət işi üzrə məhkəmənin baxış iclası davam etdirilir. Proses Bakı Məhkəmə Kompleksində Bakı Hərbi Məhkəməsinin hakimi Zeynal Ağayevin sədrliyi ilə baş tutur. Təqsirləndirilən şəxslər Ermənistan dövləti və onun silahlı qüvvələri, o cümlədən Ermənistan tərəfindən Azərbaycanın işğal olunmuş ərazilərində yaradılmış qondarma Dağlıq Qarabağ respublikası və onun qanunsuz silahlı birləşmələri tərəfindən Azərbaycana və xalqına qarşı sülh və insanlıq əleyhinə cinayətlər, müharibə cinayətləri, o cümlədən təcavüzkar müharibə aparma, soyqırımı, əhalini məcburi köçürmə, təqib, işgəncə, hərbi soyğunçuluq və digər qanunsuz əməllərdə ittiham olunur. Ermənistan Respublikası və onun silahlı qüvvələri, o cümlədən Ermənistanın yaratdığı qanunsuz “Dağlıq Qarabağ respublikası” və onun qanunsuz silahlı birləşmələr tərəfindən törədilən cinayətlərdə ittiham olunan 15 nəfər arasında Ermənistan Respublikasının vətəndaşları Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və başqaları var.
Məhkəmə prosesinə maraq və diqqət təbii böyükdür. Eyni zamanda məhkəmə prosesində yerli jurnalistlərin iştirak etməməsi, separatçılar barədə hansı hökmün çıxarılacağı, hökmdən sonra ekstradisiya məsələsinin gündəmə gələ biləcəyi də müzakirə mövzusudur.
Məhkəmə prosesini mütəmadi izləyən Müstəqil Jurnalistlərə Texniki və Hüquqi Yardım İctimai Birliyinin sədri, əslən Qarabağdan olan jurnalist Asəf Quliyev Sherg.az-a açıqlamasında qeyd etdi ki, sözügedən məhkəmə prosesində jurnalistlərin iştirakının təmin edilməsini, sözsüz ki, istərdi:
- Əlbəttə, yerli media orqanlarının, jurnalistlərin məhkəmə prosesini izləmələrinə imkan yaradılsaydı, əla olardı. Başa düşürəm, informasiya təhlükəsizliyini qorumaq baxımından buna icazə verilmir. Ehtiyatsız bir ifadə, hər hansı səhv məlumat Azərbaycanın beynəlxalq imicinə ziyan vura bilər. Amma bizim həmkarlarımız, hansı ki Qarabağ müharibəsinin, əhalinin başına gətirilən müsibətlərin canlı şahidləridir, Hikmət Sabiroğlu, Rey Kərimoğlu, onlar zərərçəkmiş şəxs kimi məhkəmə prosesində iştirak ediblər. Və iştirakdan sonra məhkəmə barədə yazıları cəmiyyətdə rezonans doğurub, paylaşılıb, xeyli sayda oxunub. Məhkəmə proseslərindən standart informasiyalar, materiallarsa o qədər də rezonans doğurmur. Oxunma sayı da o qədər deyil. Bu mənada, məhkəmə prosesindən dolğun informasiyaların verilməsi baxımından jurnalistlərin iştirakının təmini yaxşı olardı. Tanıdığım jurnalistlər var ki, beynəlxalq platformalara çıxış imkanları var. Şəxsən mən beynəlxalq platformada reportajlar hazırlamaq istərdim. Müttəhimlər kürsüsündə əyləşənlər arasında özlərini, hətta ailə üzvlərinə qədər tanıdığım şəxslər var. Onlardan müsahibə almaq istərdim. Bu yanaşma ilə yazı yazmaq bir az fərqli olardı və daha effektiv təqdimat olardı, məncə.
İttiham olunanların fərqli davranışlar sərgiləmələrinə gəlincə, A.Quliyev qeyd etdi ki, bu, özünümüdafiə instinktindən irəli gəlir:
- Bu davranışlar cəzaların yüngülləşməsi istəyindən doğur. Nəticə etibarilə onlar da insandır. Özünümüdafiə instinkti hər bir canlıya aiddir. Odur ki, məsum görünməyə çalışırlar, hər biri digərindən daha az cinayət törətdiyini isbat etməyə çalışır. Onların davranışlarını başa düşürəm. Müxtəlif üsullara əl atırlar. Yaltaqlıq edəni də var. Bəzən çox cılız görünürlər. Məlumdur, bu şəxslər xalqımıza, mülki əhaliyə olmazın məhrumiyyətlər, işgəncələr yaşadıblar... Amma özlərini elə aparırlar, sanki kimlərsə bunları məcbur edib, istəmədən ediblər. Belə görüntü yaratmağa çalışırlar.
“Erməni separatçılarına necə hökm çıxarılacaq, onların ekstradisiyası mümkün olacaqmı, sizcə” sualına cavabında A.Quliyev qeyd etdi ki, bu, gələcəyin işidir. Hələ ki məhkəmə prosesi davam edir, bu, uzun sürən bir prosesdir:
