“Əfsuslar olsun ki, qışda qaz, yayda isə su kəsilir”.

Bu sözləri AĞ Partiya başqanı Tural Abbaslı “Cümhuriyət”-ə açıqlamasında deyib.

O bildirib ki, qış aylarında qazın təzyiqi aşağı düşür, yayda isə günlərlə su kəsilir:

“Üstəlik, rəsmi qurumlar bunun səbəbi olaraq tələbatın artmasını əsas gətirirlər. Ancaq bu, həmin dövlət qurumlarının öz işini icra edə bilməmələrindən irəli gəlir. Çünki həmin qurumların işi vətəndaşları qaz və su ilə təmin etməkdir. Hər kəs özünə təbii qaz və ya su tapacaqsa, bu dövlət qurumları nəyə lazımdır? Bütün bunlara ciddi nəzarət etmək lazımdır”.

Siyasətçi müvafiq qurumların açıqlamalarını da tənqid edib:

“Məsələn, “Azəriqaz” qışda qarın yağmasını gözlənilməz adlandırır və buna görə qaza tələbatın artdığını deyir. Bu səbəblərə görə də təbii qazın verilmə təzyiqinin düşdüyünü əsas gətirir. Amma onsuz da qışda qar yağar. Bu, son dərəcə normaldır və “Azəriqaz” da ona uyğun hazırlıq aparmalıdır. Bizim dövlət qurumları öz işlərinin mahiyyətini başa düşmürlər.

“Azəriqaz” düşünmür ki, hər bir şəraitdə vətəndaşları keyfiyyətli qazla təmin etməlidir. Azərbaycan Dövlət Su Ehtiyatları Agentliyi isə vətəndaşları içməli və təmiz su ilə vaxtında təmin etməyi fikirləşmir. Halbuki bu, onların işidir. Onlar isə ancaq qazı, suyu açıb-bağlamağı və pul yığıb xərcləmək anlayışı ilə hərəkət edirlər. Heç bir yenilik və ya innovasiya yoxdur”.

Tural Abbaslı diqqətə çatdırıb ki, bəzi qurumlar vətəndaşları razı salmağa çalışmırlar:

“Hər kommunal xidmətdən istifadə edən milyonlarla abonent var. Hansısa abonent ödəniş etməyəndə kommunal xidmətlərin verilməsi dayandırılır. Bəs yaxşı qarşı tərəfin öhdəliyi varmı? Məsələn, ayın bir neçə günündə qaz, su və ya işıq verilməyəndə nə olur?

Bu, hansısa formada kompensasiya olunacaqmı? Bununla bağlı ödəniş olacaq və ya aylıq ödənişin vaxtı uzanacaqmı? İndiyə kimi belə bir kompensasiya verilməyib. Bunun birtərəfli öhdəlik olduğu görünür. Lakin həmin qurumlara kimsə nə isə demir. Ona görə də istənilən vaxt qaz, işıq və su kəsilə bilir. Bu da o deməkdir ki, vətəndaşın məmnuniyyəti və mövqeyi nəzərə alınmır”.

Partiya sədri vurğulayıb ki, kommunal xidmətlərin dayandırılmasına görə kimsə məsuliyyət daşımır:

“Maraqlıdır, nəyə görə işığın, suyun, təbii qazın saatlarla və ya günlərlə kəsilməsinə görə kimsə cəzalandırılmır, həbs olunmur? Məsələn, Yasamalda 3 gün gecə-gündüz su gəlmədi. Ancaq bununla bağlı hansısa yoxlanış aparılmadı və kimsə məsuliyyətə cəlb olunmadı. Dövlət işığa, suya və qaza görə milyonlarla pul xərcləyir. Buna rəğmən, kiminsə verdiyi ziyana görə kommunal xidmətlərin verilməsi dayanır.

Yaxşı, bəs səhv kimdədir? Kimsə avtomobili ilə səhvən işıq dirəyinə dəyən kimi dövlət əmlakına ziyan vurduğu üçün cəzalandırılır. Bəs bu qurumların verdiyi ziyanların cəriməsini kim ödəyəcək? Hesab edirəm ki, vətəndaşlar da öz haqlarını tələb etməlidirlər.

Sovet təfəkküründə qalmaq olmaz. “Yoxdur, işlətməyəcəm, olacaq işlədəcəyəm” demək Sovet düşüncəsidir. Biz artıq sosialist rejimdə deyilik, kapitalizmdəyik. Yəni, “al gülüm, ver gülüm” prinsipi ilə yanaşmaq lazımdır. Pulu ödəyiriksə, məhsulu və xidməti keyfiyyətli şəkildə almalıyıq. Həmçinin, dövlətin müvafiq qurumları da işlərini düzgün görməlidir”.