Rusiya Prezidenti Vladimir Putin Təhlükəsizlik Şurasının iclasını keçirib. Eyni zamanda Zəngəzur dəhlizinin açılması ehtimalı İranda narahatlıqla qarşılanır. Bu təşəbbüs Tehranda potensial təhlükə kimi qiymətləndirilir. Həm Moskva, həm də Tehran bu prosesin onların bölgədəki təsir imkanlarını zəiflədə biləcəyindən ehtiyat edir. Yeni geosiyasi reallıqlar fonunda regional güclər mövqelərini qorumaq üçün fəallaşmağa başlayıblar.

"ABŞ-Azərbaycan-Ermənistan arasında sazişin və digər sənədlərin imzalanması Bakının milli maraqlarına, təhlükəsizlik hədəflərinə cavab verdiyinə görə bu addımların atılması zəruridir. Bu sənədlər eyni zamanda bölgədə Rusiyanın son dövrlərdə nümayiş etdirdiyi aqressiv və təcavüzkar siyasətinə, o cümlədən Azərbaycana qarşı yönəlmiş fəaliyyətinə qarşı mühüm əks tədbir kimi qiymətləndirilə bilər. Bu baxımdan ABŞ-nin vasitəçiliyi ilə həyata keçirilən proseslərin geopolitik əhəmiyyəti də diqqətəlayiqdir. Lakin bütün hallarda əsas məsuliyyət və yük şübhəsiz ki, Azərbaycanın üzərinə düşəcək".

" Cənub qonşumuzda dəhlizin açılmasını və regionda sülhün olmasını istəyənlər var. Amma İranda anti-Azərbaycan mövqeyini qoruyub saxlayan qüvvələri hələ də üstünlük təşkil edir. Prinsipcə Zəngəzur dəhlizinə münasibətdə fərqli yanaşmanın sərgilənməsi istisna deyil. Əgər Azərbaycana qarşı hər hansı müdaxilə və ya təhlükə yaranarsa, bu təhdidlərin qarşısı ilk növbədə diplomatik vasitələrlə alınmalıdır. Zərurət yarandıqda isə bütün imkanlardan, o cümlədən silahlı qüvvələrdən istifadə etməklə müqavimət göstərilməlidir. Azərbaycan dövləti belə bir qərar versə, düşünürəm ki, cəmiyyətin mütləq əksəriyyəti bu addımı dəstəkləyəcək. Dövlət və xalq müqaviməti milli iradə içərisində ortaya qoyulsa, Azərbaycanın bu prosesdə qalib gəlmək imkanları daha böyük olacaq.".