Rusiya, Vaşinqton razılaşmasından sonra Paşinyana qarşı addım atmağı planlaşdırmır. Bu iddia ilə "Hraparak" qəzeti çıxış edib. Nəşr yazır ki, Rusiya rəsmiləri erməni tərəfinə bildirib ki, əgər baş verənlər erməni xalqını qane edirsə, onlar müdaxilə etməyəcəklər:
"Moskva vəziyyətin Ukrayna cəbhəsində necə inkişaf edəcəyini gözləyərək, gözləmə mövqeyi tutmağa üstünlük verir.
Rusiya hakimiyyəti çoxsaylı “gizli məqamlar” səbəbindən Vaşinqton razılaşmasının reallaşmasını “az ehtimal olunan” hesab edir. Eyni zamanda Moskva sərt addımların atılması üçün zamanın yetirmədiyinə inanır".
Politoloq Zeynal Əmrəliyev Sherg.az-a deyib ki, ABŞ-də Donald Tramp, İlham Əliyev və Nikol Paşinyan arasında təşkil olunan görüş Rusiya tərəfindən ciddi narazılıqla qarşılanır:
"Moskva bu görüşün nəticələrini sabotaj etmək üçün addımlar ata bilər. Ancaq Rusiyanın Azərbaycana təsir imkanları o qədər də geniş deyil. Əslində demək olar ki, yoxdur. Artıq biz Bakı-Moskva münasibətlərində gərginliyin müəyyən hallarda üzə çıxdığını, Rusiyanın isə çox cüzi məsələlərlə Azərbaycana qarşı addımlar atmağa çalışdığını müşahidə edirik. Bunun əksinə olaraq, Ermənistana təsir imkanları daha genişdir. Çünki regionda Rusiyanın ən böyük hərbi kontingenti məhz Ermənistan ərazisində yerləşir. Üstəlik, Ermənistanda Rusiyaya bağlı olan “5-ci kolon” fəaliyyət göstərir. Bu qüvvələr hazırda Qərbə doğru inteqrasiya prosesinə başlamış Nikol Paşinyana qarşı çıxan qruplardır. Buraya ənənəvi müxalifət olan keçmiş prezidentlər Robert Köçəryan və Serj Sarkisyan tərəfdarları, həmçinin Qarabağ klanı daxildir. Eyni zamanda Rusiyaya bağlı olan milyarderlərin qrupları da var. Onlardan biri olan hazırda həbsdə olan Samvel Karapetyan artıq yeni siyasi hərəkat yaratmağa çalışır. Bundan əlavə, Ermənistan Apostol Kilsəsi də faktiki olaraq Rusiyanın “5-ci kolonu” kimi fəaliyyət göstərir. Yəni, Rusiyanın Ermənistana təsir imkanları həm siyasi, həm də hərbi cəhətdən daha güclüdür. Bu səbəbdən "Hraparak" qəzeti belə bir məlumat yayıb ki, Rusiya Ermənistanda siyasi proseslərə müdaxilə edərək Vaşinqton görüşünün nəticələrinin reallaşmasına mane ola bilər".
Analitikin fikrincə, Moskvanın İrəvana təsir məsələsinə gəlincə, son sözü Ermənistan xalqı deməlidir:
"Mən düşünmürəm ki, onlar bu məsələdə Rusiyanı müdafiə etsin. Əksinə, Vaşinqton görüşünün nəticələrinin reallaşması tamamilə Ermənistan xalqının maraqlarına uyğundur. Düzgün strategiya və düzgün siyasət aparılarsa, erməni xalqı Nikol Paşinyanı bu məsələdə sona qədər dəstəkləsə, Rusiya heç bir halda Ermənistanda təzyiq siyasəti həyata keçirə bilməyəcək. Sağlam düşüncəli erməni ictimaiyyəti baş verən proseslərin fərqindədir və prosesin sonuna qədər yekunlaşması üçün Paşinyanı bu siyasətdə müdafiə edəcək".
