Vaşinqton görüşündən sonra Ermənistan Baş naziri Nikol Paşinyanın diplomatik fəallığı nəzərəçarpacaq dərəcədə artıb. Baş nazir qısa müddət ərzində Fransa Prezidenti Emmanuel Makron, Rusiya Prezidenti Vladimir Putin, İran Prezidenti Məsud Pezeşkian, Türkiyə Prezidenti Rəcəb Tayyib Ərdoğan, Avropa Şurasının prezidenti, Qazaxıstan rəhbəri və digər liderlərlə telefon əlaqələri saxlayıb. Paşinyan son günlərdə baş verənlərlə bağlı həmkarlarını məlumatlandırıb. Ekspertlərin fikrincə, Paşinyanın telefon zəngləri Vaşinqton danışıqlarının nəticələrini və regiondakı yeni siyasi reallıqları müxtəlif tərəfdaşlarla müzakirə etmək, həmçinin Ermənistanın xarici siyasət kursunu balanslaşdırmaq cəhdidir. Paşinyanın hər tərəflə apardığı dialoqların həm regional təhlükəsizlik, həm də ikitərəfli münasibətlərin gələcək istiqamətləri baxımından əhəmiyyət kəsb etdiyi görünür. Qeyd edək ki, Vaşinqton görüşündən sonra Azərbaycan Prezidenti sadəcə qardaş Türkiyənin lideri R.T.Ərdoğanla telefon əlaqəsi saxlayıb. Prezident ABŞ-yə səfəri çərçivəsində imzalanan sənədlərin, xüsusilə Birgə Bəyanatın, Azərbaycanla Ermənistan arasında sülh və dövlətlərarası münasibətlərin qurulması haqqında Sazişin paraflanmasının regionda davamlı sülhün və sabitliyin təmin olunması baxımdan əhəmiyyətinə toxunub.
Siyasi şərhçi Tural İrfan Sherg.az-a deyib ki, Vaşinqton görüşü barədə yüksək fikirlər var və həqiqətən bu görüşün əhəmiyyəti böyükdür. Ekspert vurğulayıb ki, Rusiya və İran ilk növbədə bu görüşün nəticəsindən narahatlıq keçirirlər:
"Ermənistan vaxtilə bu dövlətlərin təsir dairəsində olub. Müxtəlif mövzularda aralarında anlaşmalar olub. İndi regionda durum dəyişir və Rusiya, İranın Ermənistan vasitəsilə yaratmış olduğu gərginlik aradan qalxır. Münaqişələr, müharibələr dövrü bitir, sülh və inkişaf dövrü başlayır. Ona görə də Paşinyanın Rusiya və İranla müzakirə etməli məsələlər var. Bu reallığı onların da qəbullanması üçün mövcud reallığı Rusiya və İran qəbul etməyə məcburdur. Təbii ki, artıq Ermənistan Rusiyanın təsirindən uzaqlaşaraq Qərbə yönəlib. Eyni zamanda İranın da təsirindən uzaqlaşmaq üzrədir. Çünki bu iki dövlət Ermənistanı öz maraqları naminə istifadə edərək təcrid etmişdilər. Artıq Ermənistan bunu anlayır və çıxış yolları üçün müvafiq addımlar atır. Paşinyanın Ərdoğana zəngi də həmçinin Türkiyə ilə inkişaf etməkdə olan əlaqələrin təməlini sağlam qurmaq naminə zəruri addım hesab oluna bilər. Zəngəzur dəhlizi məsələsinin ABŞ-nin iştirakı ilə açılmasında Azərbaycan və Ermənistan rəhbərliyinin razılığı və bu məsələ ilə bağlı digər mövzuların Türkiyə ilə müzakirəsi də vacib amillərdəndir. Region dövlətlərinin bu məsələ ilə bağlı zəngləşməsi, müzakirəsi işin önəmini və ciddiyyətini göstərir".
T.İrfan diqqətə çatdırıb ki, Azərbaycan Prezidenti İlham Əliyevin də Rəcəb Tayyib Ərdoğanla müzakirəsi iki dost və qardaş ölkənin bu mövzudakı mövqeyinin bir daha ortaq maraqlara xidmət etdiyinin göstəricisidir:
"Tehranın reaksiyasının yumşalması Prezident Pezeşkianın məsələ ilə bağlı açıqlamasından hiss olunur. O bəyan etdi ki, Zəngəzur dəhlizi maneə yaratmır. Sadəcə, İranda hakimiyyətin mühafizəkar qanadı dəhlizə meneələr yaratmağa çalışır. Şübhəsiz ki, Paşinyanla İran rəsmilərinin danışıqlarında bu məsələ də öz həllini tapmağa doğrudur. Çünki İran artıq bu məsələdə real hədələrə keçsə, Azərbaycan və Ermənistanla deyil, ABŞ ilə üz-üzə qala bilər. Ola bilsin, Paşinyan bu həqiqəti İran rəsmilərinə çatdırsın".
