“MƏN TANRININ GÖNDƏRDİYİ VƏKİLƏM”
Rusiyada yaşayan həmyerlimiz, məşhur ekstrasens Zirəddin Rzayevin ANS PRESS-ə eksklüziv müsahibəsini təqdim edirik:
İyul ayının 26-da Rusiyanın birinci kanalında “Gəl evlənək”, “Давай поженимся”, verilişində qonaq qismində çıxış edən müğənni Mart Romanov (Radiona Babayan) adlı erməni özünü Zirəddin Rzayevi dostu kimi təqdim etdi... Zirəddin də həmin verilişdə erməni müğənnilə çox mehriban idi. Doğrudanmı Zirəddin Rzayev həmin erməni ilə yaxın dostdur?
-Yox, Mart Romanov mənim dostum deyil, sadəcə müğənni kimi tanışımdır. Mənim müğənni tanışlarım çoxdur. Onun soyadı rus soyadıdır. Demə onun ata tərəfi erməni imiş. Mən axı hardan biləydim ki, bunun əvvəlki soyadı “yan”dır. Sən bilərdinmi ki, qarşındakı rus soyadlı biri əslən ermənidir? Başladılar ki, Zirəddin erməni Babayan ilə kanallara çıxır. Bildirmək istəyirəm ki, mən ermənilərlə dostluq etmirəm.
İnsanları maraqlandıran digər məsələlərdən biri təbii fəlakətlərlə, zəlzələlərlə bağlıdır. Demişdin ki, 2012-ci il qanlı-qadalı ildir. Artıq ilin yarısını başa vurmuşuq. Azərbaycan üçün son altı ayda nələr gözlənilir?
-Mən söz vermişəm ki, Azərbaycanla bağlı proqnoz verməyim. Sadəcə olaraq bunu demək istərdim ki, Azərbaycanın böyük gələcəyi var. Mən ölkəmiz üçün qorxulu heç nə görmürəm. Bizim uğurlarımız hələ qarşıdadır. Azərbaycanda nə qorxulu təbii fəlakət olacaq, nə də ciddi bir hadisə.
Bəs gələn il bizi nələr gözləyir?
-Mən hələlik 2013-cü ilin proqnozunu işləməmişəm. Söz verirəm ki, gələn ilin proqnozu hazır olan kimi ANS PRESS vasitəsilə bildirəcəyəm.
2013-cü ildən söz düşmükən, deyirlər gələn il olmayacaq. Fərziyələrə görə, 2012-ci ilin dekabrın 12-də dünyanın sonu olacaq. Doğrudanmı biz son ilimizi yaşayırıq?
-Yox, yalan söhbətdir. Hamısı cəfəngiyyatdır. Qiyamətin baş verəcəyini, qiyamətin qopacağını qabaqcadan, hətta 2 saat əvvəlcədən deyə biləcək bir adamın olmasına inanmıram. Çünki bunu Allahdan başqa heç kimi deyə bilməz. Bu dünyanı yaradanın cahan ilə bağlı öz sirridir. Quranda da yazılır ki, qiyamətin əlamətləri var. Məsələn: homoseksuallığın yayılması, müharibələr, böyük binaların inşa edilməsi, dinlər arasında baş verən terror aktları və s. hamısı qiyamətin yaxınlaşdığından xəbər verir. Lakin hansı vaxtda, hansı ildə heç kim bilə bilməz. Bunu peyğəmbərlər bilmirdisə, adi insan necə görə bilər?
2012-ci ilin dünyanın sonu olması ilə bağlı kinolar çəkildi. Bu sadəcə olaraq bir piyar, bir reklam idi ki, kinonun reytinqi qalxsın. Elə də oldu, bu ilin ən reytinqli filmi oldu bu kino. Bizneslə məşğul olan hər kəs istəyər ki, onun biznesi inkişaf etsin. Ona görə də, öz işlərini reklam edirlər. Bu da sadəcə bir piyar idi.
Builki proqnozunda Amerika ilə bağlı xoşagəlməz fikirlər demişdiniz. İstərdim bir də həmin fikirlərə qayıdaq...
- Demişdim ki, Amerikanın bir tərəfini qırmızı görürəm. O zaman bilmirdim bu nə hadisə olacaq. Amma Amerikada baş verən yanğın və oranın yarısını bürüyən qırmızı alov dediklərimi sonradan mənə aydınlaşdırdı. İrandakı terror aktını qabaqcadan demişdim. Türkiyədə zəlzələ olacağını demişdim.
İndi də Amerikanın Suriyaya müdaxiləsində xoş heç nə görmürəm. Görürəm ki, bu Amerikaya çox baha başa gələcək. Ümumiyyətlə Amerikanın müqəddəs torpaqları bombardman etməsi, Amerikanın bu hegemonluğu ona ucuz başa gəlməyəcək. Çox keçməyəcək ki, Amerika buna cavab verəcək. Amerikanı Allah özü cəzalandıracaq. Amerikada böyük təbii fəlakətlər olacaq. Bu ölkənin gələcəyini çox pis görürəm.
III dünya müharibəsinin başlanacağı ilə bağlı müxtəlif fikirlər səslənir, bu barədə nə deyə bilərsiniz?
-Artıq III dünya müharibəsi başlayıb. Yəni soyuq müharibə gedir. Mən bu müharibənin elə bu minvalla da davam edəcəyini görürəm.
Hansı dinə xidmət edənlər bu müharibədən qalib çıxacaq?
-Deyim ki, hər bir din Allahı təbliğ edir və hər bir dinin öz peyğəmbəri var. Bu müharibədə heç bir din qazanmayacaq. İtirən bəşər əhli olacaq. Çünki dinlər arasında olan müharibələr elə bizim dinsizliyimizdən irəli gəlir. Əgər xiristianlar, yəhudilər, müsəlmanlar dinlərini yaxşı bilsəydilər müharibədən uzaq olardılar. Heç bir din müharibəni dəstəkləmir.
Siz xarici ölkələrdə çox olursunuz və oradakı şou-biznes əhli ilə də münasibətiniz var... Qonşu ölkələrlə müqayisədə Azərbaycanda şou-biznesində nələr çatışmır?
-Ən azından xaricdə olan şou-biznes əhli bir neçə dil bilir. Xaricdə şou-biznes əhlinin 100-də 90 faizinin öz potensialı, istedadı, qabiliyyəti varsa, yalnız 10 faizi pula və müxtəlif səbəblərə görə məşhurlaşıb. Bizim şou-biznes əhlinin isə yalnız 5 faiz istedadı var. (gülür). Hər şey göz qabağındadır.
Amma Azərbaycan mədəniyyətində Üzeyir Hacıbəyov, Cəfər Cabbarlı, M.F.Axundov, C.Məmmədquluzadə kimi tanınmışlarımız var. Mən bu dəqiqə Allah şahidiyəm ki, Rusiyada Ömər Xəyyamı sevə-sevə oxuyurlar. Əslində budur bizim mədəniyyətimiz, milli mədəni sərvətimiz. Ancaq hazırkı şou-biznes əhlini Avropa ilə müqayisə etmək düzgün deyil, çünki bunların arasında yerlə-göy qədər fərq var.
Azərbaycanda hansı müğənniləri xoşlayırsınız?
-Röyanın səsini çox xoşlayıram. Nadir Qafarzadənin oxu tərzini xoşlayıram. Ən çox sevdiyim müğənnilər Gülyaz və Gülyanaq bacılarıdır. Aygün Hümbətovanın ifasını sevirəm.
Zirəddin Rzayev danışanda deputat kimi danışır. Deyəsən millət vəkili olmaq fikriniz var?
(gülür). Allah eləməsin ki, mən Azərbaycanda millət vəkili olum.
Ruslar sizi yaman çox istəyir, bəlkə Rusiyada deputat olmaq fikriniz var?
-Yox mənim ümumiyyətlə siyasətə qarışmaq fikrim yoxdur. Çünki siyasət başqa sahədir, mən tam ayrı sahədəyəm. Mən İlahi tərəfindən seçilmiş deputatam. Ehtiyacım yoxdur ki, hansısa millətim vəkili olam. Mən Tanrının yer üzərinə göndərdiyi bir vəkiləm.
Bayaqdan hiss edirəm ki, suallarıma çox ehtiyatla cavab verirsiniz. Nədənsə çəkinirsiniz. Allahın yer üzünə göndərdiyi vəkil nədənsə qorxarmı?
-Sadəcə çox vaxt mətbuatda dediklərimi sonradan kimlərsə təhrif edir deyə, çalışıram danışanda 100 ölçüm, 1 biçim. Dediklərim təhrif olunduğu üçün çalışıram Azərbaycanla bağlı proqnozlar verməyim. Ona görə çalışıram ki, digər mətbuat nümayəndələrilə görüşəndə Azərbaycanla bağlı heç nə deməyim.
Hazırda müalicə etdiyiniz xəstələr çoxdur?
-Yox artıq mən müalicə ilə məşğul olmuram. Çünki müalicələrdən sonra sağlamlığımla bağlı əziyyət çəkirəm. Onların xəstəliyini özümə götürürəm, sonradan həmin xəstəlikləri çıxaranda özümü narahat hiss edirəm. Müalicəni müvəqqəti dayandırmışam. İndiki fəaliyyətim konsultasiyadan ibarətdir. Bundan başqa, ailə-biznes problemləri ilə bağlı, xəstəliklərin dioqnoztikası sahəsində çalışıram. Yaxın günlərdə isə istirahətə çıxacağam. Yunanıstana gedəcəyəm. İstirahəti orada keçirəcəyəm.
