Professor, İqtisad elmləri doktoru, Azərbaycan Dövlət İqtisad Universiteti rektorunun sabiq müşaviri Bədirxan Musayevin Azərbaycan preizdenti İlham Əliyevə və müxtəlif dövlət qurumlarının rəhbərlərinə bu yaxınlarda etdiyi müraciətə cavablar gəlib.
Bu barədə Mia.az-a B.Musayevin özü məlumat verib.
Onun sözlərinə görə, YAP Səbail rayon təşkilatının sədri, deputat Şəmsəddin Hacıyevin vaxtı ilə ona qarşı qanunsuz əməllərindən, universitetdəki korrupsiya və rüşvətxorluqla bağlı ölkə rəhbərliynə etdiyi şikayətə cavab verilib:
"Bir neçə gün əvvəl müraciətimə Prezident Administrasiyasından, Prokurorluqdan, Ali Məhkəmədən cavablar gəlib. Məsələn, Baş Prokurorluq mənə yazıb ki, müraciətim baxılmaq üçün Milli Məclisə göndərilib.
Maraqlı burasıdır ki, Ali Məhkəmə də cavab verir ki, "müraciətiniz baxılması üçün Baş Prokurorluğa göndərilib". Hələ də anlaya bilmirəm ki, bu qurumlar niyə şikayətləri bir-birinin üzərinə atırlar ki?!
Ən əvvəl onu da qeyd edim ki, mənnim əsas müraciətim Ulu Öndər Heydər Əliyevin məzarına edilmişdi. Hesab edirəm ki, bu şikayətimə birbaşa ölkə prezidenti, hörmətli İlham Əliyevin şəxsi nəzarətiylə baxılmalı idi. Ancaq yuxarıda qeyd etdiyim kimi, dövlət qurumları müraciətimi yuxarıdan aşağıya doğru bir-birinin üzərinə yönləndirməklə, sanki Şəmsəddin Hacıyevin yanında gözükölgəli olduqlarını təsdiqləyirlər.
Yenə də bütün bunlara rəğmən, ümid edirəm ki, Mili Məclis, Baş Prokurorluq və ya Ali Məhkəmə bu dəfə vəzifələrinə sadiq qalaraq, müraciətimi obyektiv araşdıracaq və Şəmsəddin Hacıyevi layiq olduğu şəkildə cəzalandıracaqlar.
Hərçənd, təkrar edirəm, buna inanmağım da möcüzədir. Ən azı ona görə ki, mən Milli Məclisin rəhbərliyinə də inanmıram. Çünki Milli Məclisin aparat rəhbəri Səfa Mirzəyevin Ali Məhkəmənin sədr müavini olan qardaşı Hikmət Mirzəyev Şəmsəddin Hacıyevlə çox yaxın dostdur. Hətta mən rektorun müşaviri olan zaman Şəmsəddin Hacıyev dekan Telman Babayevlə məhkəmə çəkişməsini məhz Hikmət Mirzəyevin dəstəyi, hakimlərə qanunsuz təsiri və rüşvətin gücüylə uddu. O, məhz Hikmət Mirzəyevin dəstəyi ilə mənim də məhkəmə orqanlarında qanuni haqlarımı bərpa etməyimə, rüşvət, korrupsuya, universitetin əmlaklarının talanması və digər faktlarla bağlı iddialarıma obyektiv baxılmasına imkan vermədi. Hacıyev demək olar hakimlər korpusunu satın alaraq, istədiyi qanunsuz qərarları çıxartdırır".
Professor deyir kİ, bu barədə də ötən müraciətlərində ölkə rəhbərliyinə detallı müraciət edib:
"Ona görə budəfəki müraciətlərimə də obyektiv baxılacağına inamım azdır. Odur ki, buradan bəyan edirəm, əgər bu dəfə də şikayətlərimə hüquqi qiymət verilməzsə, Hacıyev haqq etdiyi cəzanı almaza, yaşımın bu çağında cəmiyyəti silkələyəcək hərəkətə imza atacam. Qoy bütün dünya görsün ki, bir ovuc rüşvətxor məmurlar Azərbaycanda haqqı necə satın alırlar...".
Xatırladaq ki, Dövlət İqtisad Universiteti rektorunun sabiq müşaviri, kafedra müdiri, iqtisad elmləri doktoru, professor Bədirxan Musayev YAP-ın Səbail təşkilatına sədrlik edən sabiq rektor, deputat Ş.Hacıyevin onu əsassız, saxta əmrlər, şantajla vəzifələrindən azad etdiyini bildirir.
Professor Musayev onu da bildirib ki, son 5 ildə Prezident İlham Əliyevə və məmurlara Şəmsəddin Hacıyevin ona qarşı əməlləri və yol verdiyi qanunsuzluqlar haqda 340-350 dəfə müraciət edib:
"Məmurların hər birinə 100 səhifədən çox Ş.Hacıyevin əməllərinin araşdırılması haqda inkar olunmaz sənədlər təqdim etmişəm. 4100 nəfərdən çox respublika ziyalıları tərəfindən Sizə 6 dəfə müraciət olunubdur. 150 dəfədən çox cari mətbuatda Ş.Hacıyevin barəsində tədbir görülməsinə çağırış edən faktoloji məqaləm çap olunub.
Hörmətli Prezident! Ş.Hacıyev Dərbənd filialına tələbə qəbulundan 145-150 milyon manat, daxili və xarici köçürmələrdən 80-100 milyon manat, digər mənbələrdən 350-400 milyon manat qazanmışdır. Təmir-tikinti işlərinin lahiyə dəyərinin 40%-i yayındırılıb....
Eyni zamanda, Dərbənd şəhərində universitet vəsaiti hesabına öz adına 0,5 hektar torpaq sahəsini sənədləşdirmiş və 3 dəfə universitetə satmışdır. Universitetdə qeyri-qanuni "İqtisadçı 2005”, "Turan 2009” şirkətləri yaratmış, universitetin kooperativ binasının böyük hissəsini özəlləşdirmiş, Quba rayonunun Nügədi kəndində olan istirahət bağını xarabazarlığa çevirmişdir”.
Priofessor daha sonra universitetin baş mühəndisi Şahmurad Qədim oğlu Hüseynovun ölüm faktını, keçmiş dekan Kamil Qafarovun oğlunun qaynını öldürmə səbəbi, Muhasibat fakültəsinin keçmiş dekanı Telman Babayevin başına açılan oyunlar, Şəmsəddin Hacıyevin "Ticarət” kafedrasının əməkdaşı M.Ağamalıyevin üzünə arvadını niyə durdurub, ailəsini dağıtmasını, şəxsən özünü kimin vasitəsiylə öldürülməyə təhrik edilməsini, canını və qanını H. Əliyev yolunda qurban verməyə hazır olan Həsən Allahverdiyevi YAP Universitet şöbəsindən min hiylə ilə azad edib, dissertasiyası və avtoreferatında H.Əliyevi təhqir edən Zəfər Bayramovu onun yerinə gətirməsini, Professor Abrik Hüseynovun ölümünü, Professor Akif Musayevin kafedra müdirliyindən azad edib, universitetdən qovdurmasının, Əlixan Əliyev kimi birinin arxasında niyə gizlənməsi kimi olduqca sensasion iddia və faktlar açıqlayıb.
Qarşı tərəfi də dinləməyə hazırıq.
