Məlum olduğu kimi, Təhsil Nazirliyi Azərbaycan İctimai-Siyasi Universitetinin fəaliyyətinə verilmiş lisenziyanın müddətinin uzadılmaması barədə bu ilin iyul ayının 7-də qərar qəbul edib. Təhsil Nazirliyindən verilən məlumata görə, özəl ali təhsil müəssisəsi olan Azərbaycan İctimai-Siyasi Universitetinin (AİSU) fəaliyyətinə verilmiş 5 illik lisenziyanın müddəti 2013-cü ilin sonunda başa çatıb.
Lisenziyanın müddətinin uzadılması ilə bağlı universitet tərəfindən təqdim edilmiş sənədlər diqqətlə araşdırılıb, habelə Təhsil Nazirliyinin əmri ilə yaradılmış ekspert qrupu ali məktəbin fəaliyyəti ilə yerində tanış olub. Aparılmış araşdırma nəticəsində AİSU-da tədris prosesinin formal xarakter daşıdığı, elmi-pedaqoji heyətin pozuntularla komplektləşdirildiyi və kafedraların mövcud qaydalara zidd təşkil olunduğu müəyyən edilib. Universitetin maddi-texniki bazasının yerində yoxlanılması göstərib ki, ayrı-ayrı şəxslərdən icarəyə götürülmüş mənzillərdə yerləşən bu ali təhsil müəssisəsində yaradılmış şərait Azərbaycan Respublikası Nazirlər Kabinetinin 3 avqust 2012-ci il tarixli, 171 nömrəli qərarı ilə təsdiq edilmiş "Təhsil müəssisələrinin tikintisinə, maddi-texniki təchizatına dair vahid normalar, ümumi sanitariya-gigiyena tələbləri, şagird yerləri ilə təminat normativləri"nin minimal tələblərinə uyğun gəlmir. Qeyd olunan nöqsan və çatışmazlıqların bu ali təhsil müəssisəsində tədris prosesinin davam etdirilməsinin qeyri-mümkün etdiyini nəzərə alaraq, Təhsil Nazirliyi Azərbaycan İctimai-Siyasi Universitetinin fəaliyyətinə verilmiş lisenziyanın qüvvədə olma müddətinin uzadılmasından imtina edilməsi barədə qərar qəbul edib. Universitetdə təhsil alan tələbələr isə digər ali məktəblərə yerləşdiriliblər. Deyilənə görə, Azərbaycan İctimai-Siyasi Universitetinin rektoru Rasim Nəbiyev təhsil ocağının lisenziyasının uzaldılması üçün nə qədər cəhd göstərsə də, heç bir nəticə verməyib. Çünki həqiqətən də, sözügedən universitetdə təhsil formal xarakter daşıyırdı. Dəfələrlə bu universitetdən reportaj hazırlamış bir şəxs kimi deyə bilərəm ki, Azərbaycan İctimai-Siyasi Universitetində təhsil sistemi heç kollec səviyyəsində belə təşkil olunmamışdı. Bir neçə mənzildə yerləşən universitetə universitet demək də düzgün deyildi. Sadəcə, keçmiş rektorun sabiq nazir Misir Mərdanovla yaxın münasibətlərə malik olması AİSU-nun fəaliyyət göstərməsinə zəmin yaradırdı. Rasim Nəbiyev, o cümlədən onun təhsil ocağında müxtəlif vəzifələri tutan yaxın qohumları açıq-aşkar qanunsuz işlərlə məşğul idilər. Təhsil naziri Mikayıl Cabbarov mövcud nöqsanları nəzərə alaraq universitetin lisenziyasını uzatmadı, düz də etdi. Nazirin bu qərarını alqışlayırıq. Amma bu gün Rasim Nəbiyevin cəzasız qalması, daha dəqiq desək, onun universitetə rəhbərlik etdiyi illərdəki fəaliyyətinin araşdırılmaması bizdə təəssüf hissi yaradır. Açığı çoxları onun həbs ediləcəyini gözləyirdi, lakin hələlik bu baş verməyib. Biz tam əminliklə deyə bilərik ki, Azərbaycan İctimai-Siyasi Universiteti fəaliyyət göstərdiyi illərdə təhsil müəssisəsinə testdənkənar yollarla tələbə qəbulu aparılıb. Həmçinin bəzi tələbələr adıçəkilən universitetdən digər ali məktəblərə keçmək üçün "tramplin" kimi istifadə ediblər. Bu faktlar araşdırılsa, bütün həqiqətlər üzə çıxar. Hələ biz tələbələrdən illik təhsil haqqının hansı formada yığılmasından və imtahanların nəyin qarşılığında verilməsindən danışmırıq. Bu başqa yazının mövzusudur. Aidiyyəti hüquq-mühafizə orqanlarının əməkdaşları Rasim Nəbiyevin vaxtilə həyata keçirdiyi özbaşına əməlləri araşdırmalıdır. Yadımdadır bir vaxtlar, Azərbaycan Beynəlxalq Universitetində də bu cür qanunsuzluq yaşanmış, təhsilin formal xarakter daşıdığı, o cümlədən qanunsuz tələbə qəbulu aparılması barədə faktlar üzə çıxmışdı. Həmin ssenari Azərbaycan İctimai-Siyasi Universitetinin simasında yenidən təkrarlandı. Fikrimizcə, Təhsil Nazirliyinin yetkili əməkdaşları universitetdə aşkar etdikləri neqativ halları toplayıb istintaq orqanlarına təqdim etməlidir. Ona görə ki, Rasim Nəbiyevin adı vaxtilə çox dəhşətli məsələlərdə hallandırılıb. Və ən əsası o ABU-nun sabiq rektoru Elşad Abdullayevin əməllərini təkrarlayıb. Hansı ki, həmin məsələlər araşdırılsa, sabiq rektor ağır həbs cəzasına məhkum edilməlidir. Keçmiş rektor uzun müddət ölkəmizin ali təhsil sistemini bərbad hala salıb, savadlı kadrların yetişməsinə imkan verməyib. Məhz buna görə onun keçmişdəki fəaliyyəti dərindən araşdırılmalı və Rasim Nəbiyevin barəsində konkret cəza tədbirləri görülməlidir. Həmçinin onu da qeyd edək ki, törətdiyi bir sıra qanundankənar işlərin qarşılığında cəzasız qalan Rasim Nəbiyev biznesini genişləndirməklə məşğuldur. Bizə çatan məlumatlara görə, sabiq nazir Misir Mərdanovla dost olan Rasim Nəbiyev "Bakıxanov" çörək zavodunun, "Səhram" marketlər şəbəkəsinin və paytaxt ərazisindəki bir neçə ticarət obyektinin sahibidir. Onun Sabunçu rayonu Anaşkin küçəsində iki böyük imarətinin olması da yayılan məlumatlar arasındadır. Növbəti saylarımızda Rasim Nəbiyevin kimin vasitəsilə müxalifətə yardımlar etməsi barədə şok faktları açıqlayacağıq. Bizi izləyin. \\ GünBakı \\
