DİA.AZ: - Redaksiyamıza son günlər bəzi yerlərdə dolanışığın çətinləşməsi səbəbindən baş qaldıran etirazlar və bu etirazlara səbəb olan nədənləri təhlil edən məqalə göndərilib. Müəllifi Cavid Əliyev olan məqalənin DİA.AZ-a daxil olan mətnində deyilir:
“Rayonlarda etiraza qalxan insanların mütləq əksəriyyətinin şikayəti ünvanlı sosial yardım ala bilməməsi ilə bağlı idi. 2013-cü ildə ölkədə 150 min ailə ünvanlı sosial yardım alıb. Səlim Müslümov nazir olduqdan sonra yardım alan ailələrin sayı azalaraq 80 minə düşüb. 70 min ailə yardım almaqdan məhrum olub. Səlim Müslümov isə hər dəfə yardım alanların sayı filan faiz azaldı deyərək özünü reklam etdirməklə, Cənab Prezidentin yanında özünə xal toplamağa çalışırdı. Yardım alanların sayının azalmasını öz qəhrəmanlığı kimi qələmə verirdi. Nəticədə kasıb əhalinin yardımını kəsməklə onları ayağa qaldırdı. Bu isə birbaşa Cənab Prezidentə qarşı olmaq deməkdir.
Səlim Müslümov daha da irəli gedərək bəyan edirdi ki, əvvəllər yardım düşməyən adamlar da yardım alıb və mən bunu aradan qaldırdım. Şəffaflığı təmin etmişəm. Bununla ictimaiyəti çaşdırmağa çalışdı. Pafoslu danışıqları sayəsində bəzilərində o fikir yaranıb ki, doğurdan Səlim Müslümov bu sahədə rüşvəti aradan qaldırıb, şəffaflığı təmin edib. Hamı birmənalı bilməlidir ki, bu qətiyyən belə deyil. Əksinə, əgər əvvəllər sosial təminat idarələrində kasıb ailələrə 1 illiyə təyin olunan yardımın 4-5 ayını mənimsəyirdilərsə, Səlim Müslümov gələndən sonra 2 illiyə təyin olunan yardımın 9-10 ayı mənimsənilir. 2014-2015-ci illərdə ölkədə yardım alanların sayının az qala 50 faiz azalmasına baxmayaraq büdcədən ünvanlı yardıma ayrılan vəsaitlər nəinki azalmayıb, əksinə artıb. Səlim Müslümov bu sahədə baş verən maxinasiyanı gizlətmək üçün bəyan etdi ki, əgər əvvəllər 150 min ailənin hərəsinə 120 manat yardım verilirdisə, hazırda 80 min ailənin hərəsinə 155 manat yardım veririk. Burada Səlim Müslümovun əsas məqsədi ondan ibarət olub ki, az adama çox yardım verməklə işçiləri onlardan daha çox ayın yardımını mənimsəyərək nazirliyə ötürə bilsinlər. Rüşvəti az adamdan alaq, amma çox alaq. Belə olan halda bundan daha az adam xəbər tutar və insanlar Səlim Müslümovun şəffaf işlədiyinə inanarlar. Sadə hesablama aparmaq kifayətdir ki, büdcədən yardıma ayrılan vəsaitlərin Səlim Müslümov tərəfindən necə mənimsənildiyi üzə çıxsın. Axı gün kimi aydındır ki, 80 min ailənin hərəsinin 155 manat yardım almağındansa, 150 min ailənin hərəsinin 120 manat yardım alması həm dövlətin, həm də cəmiyyətin maraqlarına daha çox uyğundur.
Məlum oldu ki, Səlim Müslümov banklardan kredit götürdüklərinə görə kasıbları yardım almaqdan məhrum edib. Bu isə Cənab Prezidentin ölkədə apardığı sosial siyasətə ziddir. Bəs görəsən Səlim Müslümovun Prezidentin siyasətinə zidd addımlar ataraq, kasıb insanları narazı salmaqda məqsədi nə olub?
Açıq aydın görünür ki, Səlim Müslümov bu işi Prezidentə qarşı olan kimlərinsə diqtəsi ilə edib. Axı Səlim Müslümov iqtisadçı kimi azı onu bilməli idi ki, kasıbları yardım almaqdan məhrum etməklə onları küçəyə çıxmağa sövq edir. Görünür o bunu bilərək etdi. Axı ayrı vaxt o özünün güclü iqtisadçı olması ilə öyünür. Səlim Müslümova elə gəlir ki, Rusyanın Kazan şəhərində özünə elmlər dokturu dərəcəsi düzəltdirməklə iqtisadçı olmaq olur.
Nə yaxşı ki, Cənab Prezident vaxtında məsələyə müdaxilə edərək, krediti olanlara ünvanlı sosial yardım verməmək qadağasının aradan qaldırılmasına göstəriş verdi. Burada ən pis cəhət isə ondan ibarətdir ki, xəbər saytları və qəzetlər bunu da az qala Səlim Müslümovun etdiyi kimi qələmə verirlər. Axı bu absurddur. Səlim Müslümovun nə etdiklərini yazının əvvəlində yazdıq. Bu xoş addım isə birbaşa Cənab Prezidentə məxsusdur. Hər bir kasıb insan bilməlidir ki, bunu Cənab Prezident edibdir. Xəbər saytları və qəzetlər də bunu belə təqdim etməlidirlər.
Yaxşı olardı ki, bu məsələlər ətraflı araşdırılsın. Səlim Müslümovun kimlərin diqtəsi ilə Cənab Prezidentin siyasətinə zidd işlər gördüyünə aydınlıq gətirilsin. Cənab Prezident də məlumatlandırılmalıdır ki, Səlim Müslümovun apardığı işlər birbaşa onun əleyhinə yönəlibdir. Kasıb insanlarda artıq Səlim Müslümova qarşı böyük hiddət formalaşıb. Nə vaxta qədər Səlim Müslümov və Əjdər Cəbiyev cütlüyü sosial sahəyə rəhbərlik edəcəklər, o vaxta qədər o sistemdən rüşvət və yalan yığışmayacaq və insanların narazılığı aradan qalxmayacaq. Kim Cənab Prezidentə sadiqdirsə bu barədə Cənab Prezidentin məlumatlanmasına çalışmalıdır. Cənab Prezidentin nüfuzunun zədələnməsi hesabına özünə xal qazanmağa çalışan Səlim Müslümovun məncə nazir olmağa mənəvi haqqı yoxdur. Hamı bilməlidir ki, ünvanlı sosila yardımla bağlı Səlim Müslümovun ortaya atdığı "elektronlaşma" da bu sahədə rüşvətin yığışmasına xidmət etməyəcək, əksinə kasıblara əlavə problemlər yaradacaq.
Cavid Əliyev”
DİA.AZ-dan: Bütün maraqlı tərəfləri dinləməyə hazırıq...
